Read lugbara 'Ba Kolosaia 'Diyi 3 Bible Online

'Ba Kolosaia 'Diyi 3 - lugbara bible

'Ba Kolosaia 'Diyi 3

¹Ka’dini emi ka-ovu engazaru ’ba draza ma eselia tualu Kristo be ’bo, emi ma nda e’yo ovupi uruleru, pari Kristoni ovuzu erini rizu Mungu ma dri ndiaria ’diyi.

²Emi ma dro asisile emini e’yo ovupi uruleru ’diyi ma dria, e’yo ovupi nyakua ’diyi ma dria ku.

³Emi odra ’bo, te idri emini ovu zizaru Kristo be tualu Mungu ma alia ’bo.

⁴Te Kristo ovupi idri amaniri kali nga i e’da ra, emi nga di e’da tualu eri be diza ma alia indi.

⁵Emi ma fu ani ma emini ma esele ovupi nyakuniru ’diyi: ali ’bazu pi, e’yo saaru onzikanyaruri pie, ava ruani pie, li onziri pie, li ’ba afasiri pie, ’di ekile Mungu andini inzizurile.

⁶E’yo ’diyisi adra Munguni emu anzi e’yo eripi ku ’diyi ma dria.

⁷Emi aci ndra e’yo ’diyi ma alia, emini de ndra adriria e’yo ’diyi ma alia.

⁸Te curu’do emi ma o’be e’yo ’diyi dria emi vusi ziri indi: ’aoko pi, adra pie, asi onzi pie, o’data pie, e’yo drinzani efupi emi tiliari pie.

⁹Emi ma li inzo emi eselia ku, a’disiku emi tru ’ba okuri emi ruaa ’yeta erini be ’bo,

¹⁰azini emi su ’ba o’diru, ovupi ’bazaru o’diru zozu ani e’yo vazasi ovozu tro tro ’ba eri ’bapiri ma wurani ovulerileri ’bo indi.

¹¹Eri ma alia ’ba ovuni ’ba Yunaniniru, kani ’ba Yahudiniru, ’ba agele liza be, kani ’ba agele liza kokoru, ’ba jururu, ’ba Sikutiniru, ati’boru, kani karimvare, ’dini ku, te Kristo ovu afa dria, azini e’yo dria ma alia.

¹²Emi ’ba Munguni opele alatararu, lele tu ’diyi, e’yo ’disi emi ma su ani asi ndriza yiki beri pi, asi onyiruri pie, asi afu kokoruri pie, asi e’yere pie, asi teza ande kokoruri pie,

¹³e’yo ’yezu emi eselia asi ndrizasi, e’yo onzi kuzu emi eselia, ’ba azini ka ovu e’yo be yi eselia; ekile Opini e’yo onzi emini kulerile, emi ’ye ’dinile indi.

¹⁴Te e’yo ’diyi ma dria dria emi ma su leta avasiri, ’di afa ombeza e’yo ’bani dri fuzu ciriniri’i.

¹⁵Asi anzuru Kristoni yini emi omvezu vunia rua alu ma aliari ma adri e’yo lizu emi asia; azini emi ma ovu awa’difo be.

¹⁶E’yo Kristoni ma adri emi alia lonyi be tre ondua driasi, emini emi imbazu azini emi asi omizu emi eselia; zaburi piyisi, ongo pie, ongo Orindini imbale ’diyi pie, emini ongo ngoria Mungu vu asi emini ma alia ’yeta anzutirisi,

¹⁷E’yo dria emini ’yele, kani e’yosi kani ’yetasi ’diyi, emi ma ’ye e’yo dria Opi Yesu ma rusi, awa’difo ’yozu Mungu Ata vu erisi.

¹⁸Oku, emi ma inzi agupi emini, te onyiru Opi ma aliarile.

¹⁹Agupi, emi ma le oku emini avasi, azini emi ma ovu asi okaru be yi vu ku.

²⁰Anzi, emi ma inzi ’ba emi tipi I’diyi e’yo dria ma alia, a’disiku e’yo I’diri ayiko fe Opi dri tu.

²¹Ata, emi ma ecandi anzi emini ku, yi ma ava kazu otizu ku.

²²Ati’ba, emi ma inzi ’ba ovupi opi eminiru nyaku ’dori ma dria ruasi ’diyi e’yo dria ma alia, ’yezu kiri yi ma milia a’dule ekile ’ba ayiko fepi ’ba dri ’diyile ’dini ku, te asi alusi, Opini ruzu.

²³Te e’yo dria alu alu emini ’yeleri, emi ma ’ye asi driasi, Opi dri te ’ba dri ku,

²⁴a’disiku emi ni ra emi nga awuruso isu oya eminiru Opi dri; te emi azi ati’boni nga Opi Kristo dri.

²⁵Te ’ba e’yo onzi ’yepici nga panga onzi isu e’yo onzi erini ’yeleri