Read lugbara 'Ba Kolosaia 'Diyi 4 Bible Online

'Ba Kolosaia 'Diyi 4 - lugbara bible

'Ba Kolosaia 'Diyi 4

¹vusi, yi openi ’ba ku. Emi ’ba opiru ati’ba ma drilia ’diyi, emi fe afa kililiru azini ’yeke ati’ba emini dri, emini nile emi indi ovu Opi be ’buarisi.

²Emi ma fe emi asi Mungu zizu ’dani, ovuzu mile be Mungu ziza nde ma alia awa’difo be;

³emi ma zi Mungu ama dri indi, eri ma zi otile e’yo oluzuri ama dri, ma ma olu ani e’yo vale ku zizaru Kristoni mani ovuzu ani ombezaru arujoari beni,

⁴ma ma e’da eri kilili, ekile erini ovule azizaru ma dri e’yo oluzurile.

⁵Emi aci onduasi ’ba ovupi amveleru ’diyi ma milia, emi fe etu ma aga emi dria pirini ku.

⁶E’yo ’yoza emini ma ovu etuzu ’yeta anzutiri be ekile afa alupi a’isirile, emi ma ni ani e’yo omvizu ’ba alu alu ma tia ’yeke.

⁷Tukiko adripi mani lele tu, ’ba azi ma aza kopi asi adarisi, ovupi ma be ati’bo aziru Opi ma aliari nga e’yo mani olu emi tia dria.

⁸Ma pe eri ti emi vu pila e’yo ’disi, emi ma ni ani e’yo amani, azini eri ma omi emi asi indi,

⁹Onesimo be tualu, eri adripi asi adaru be mani lele tu, ovupi ’ba emini ma azi aluri’i. Yi nga e’yo dria i ’yepi ’doari olu emi ria ra.

¹⁰Arisitariko ovupi arujoa ma beri pi zi emi ci ci, Marako Baranaba ma amvipi ma mvi pie (yi azi e’yo erini emi dri ’bo-eri ka eca emi vu ra emi a’i eri),

¹¹Yesu omvele Yusito’iri pie. ’Ba agele liza be ’diyi ma eselia, ’ba ’diyi a’dule nga suru Munguni ma azi ma be tualu, yi ’ba ma asi omipi ’diyi.

¹²Epafra ati’bo Kristo Yesuni, ’ba emini ma azi aluri zi emi ci ci; eri o’bi okposi emi aza kozu, Mungu zizu emisi etuzu, emi ma so pa ani kirikiri ovuzu fudri ci a’ita be e’yo Munguni leleri ma alia dria.

¹³Te ma ovu ’ba e’yo erini ma eti nzepiri kini, eri ’ye azi amboru tu emi ma e’yosi, azini vini ’ba ovupi Laodikiaa ’diyi pi ma, e’yosi, Hierapolia ’diyi be.

¹⁴Luka ojou Ide turi pi zi emi ci ci Dema be.

¹⁵Emi ma zi adripi ovupi Laodikiaa ’diyi pi ci ci, Numfa pie, kanisa ovupi jo erini ma aliari pie.

¹⁶Yi ka waraga ’diri la emi eselia ’bo, emi ma fe yi ma la eri kanisa ’ba Laodikiaa ’diyini ma alia indi; azini emi ma la vini waraga engapi Laodikiaari indi.

¹⁷Te emi ma ’yo Arikipo ma ria kini, Mi ndre mi ma ’ye azi Opini fele mi driri de dria kililiru.

¹⁸’Di zita mani, mani sile ma ngulupi ma drisiri, ma’i Paulo. Emi ega anziriku mani ma e’yo fo! ’Yeta anzutiri ma ovu emi be.