Read lugbara 1 'Ba Tesalonikia 'Diyi 5 Bible Online

1 'Ba Tesalonikia 'Diyi 5 - lugbara bible

1 'Ba Tesalonikia 'Diyi 5

¹Te e’yo o’du pinisi ewu be; adripi, leni ma ma si e’yo azini emi vu ku.

²Te emi ma ngulupi ni kilili kini o’du Opiniri nga emu ekile oguouni emule ini berile.

³’Bani de ’yoria, E’yo ’ya pi asi anzuru be, coti dri jazani nga emu yi ma dria rugbu, ekile mva azoni okporovu e’dulerile, te yi ngani yi pa aluni ku.

⁴Te emi’i, adripi, emi ovuni angu biza ma alia, o’du nderini emi isuzu ani oguoule ’dini ku.

⁵Emi dria anzi dizani, emi anzi etuni; ama ovuni ini pini angu biza be ku.

⁶Ka’dini ama ma ko o’du ekile ’ba azi ’diyile ku, te ama ma te mile be azini asisile be.

⁷A’disiku ’ba o’du kopi ’diyi yi o’du ko inisi, azini ’ba trapi ewasi ’diyi yi tra inisi.

⁸Te ama’i ovupi etuni ’diyi, ama ma te asisile be, gombere a’ita pini leta beri suzu, azini biri paria asi ’baza pata tezuri’i.

⁹Mungu peni ama aoko isuzu ku, te pe ama pata a’izu Opi amani Yesul Kristo

¹⁰drapi amasirisi, ’dini ama ka ovu mile be, kani ama ka o’du ko, ama ma ovu ani idriru tualu eri be.

¹¹Ka’dini emi omi emi asi emi eselia, emi otuzu emi eselia emi agyi be, ekile emini ’yelerile.

¹²Te ama matu ’ba emi vu, adripi, emi ma ama ’ba azi ngapi emi eselia, ovupi emi drilia Opi ma alia, emi imbapi ’diyi ma e’yo,

¹³azini emi ma inzi yi tu aga ra leta avasirisi azi yini ma e’yosi. Emi ma ovu asi anzuru be emi eselia.

¹⁴Te ama emi imba, adripi, emi ma ega ’ba ’yepi saaru ’diyi ma dria, emi ma omvi ’ba asi tepi ku’diyi ma asi, emi ko ’ba okpo kokoru ’diyi ma aza, emi ovu asi teza be ’ba dria vu.

¹⁵Emi ovu mile be ’ba aluni ma omvi e’yo onzi e’yo onzi ma paria agyi ini vu ku, te emi ma bi e’yo onyiruri ma vuti etuzu ’dani emi ma eselia azini ’ba dria vu.

¹⁶Emi ovu ayikosi etuzu ’dani,

¹⁷emi ma ku Mungu zizu ku,

¹⁸emi fe awa’difo e’yo driasi; te ’diri e’yo Munguni de emi vu Kristo Yesu ma aliari’i,

¹⁹Emi ma inyu Orindi ku,

²⁰emi ’ba e’yo ondriza aparakaru ku,

²¹te emi o’bi e’yo dria; emi bi e’yo ovupi onyiruri ci,

²²emi ona emi e’yo onzi ma suruti driasi.

²³Mungu asi anzuruniri ma ngulupi ma ’ba emi alatararu teketeke; eri ma mba emi ma ngulupi ma,orindi pi ma ta, asi pie, ma pie dria, emi isuzu e’yo kokoru o’du Opi amani Yesu Kristoni emvizurisi,

²⁴’Ba emi omvepiri ovu asi ada be, eri nga ’ye ra.

²⁵Adripi, emi zi Mungu ama dri indi.

²⁶Emi zi adripi dria ci ci o’deza ava alatararusirisi.

²⁷Ma emi azi oyo sozasi Opi ma rusi, emi ma la waraga ’did adripi dria dri.

²⁸’Yeta anzutiri Opi amani Yesu Kristoniri ma ovu emi be.