Read lugbara Yosua 1 Bible Online

Yosua 1 - lugbara bible

Yosua 1

¹Te e’yoni nga eca drata Musa ati’bo Yehovanirini ma vutia ’dini, Yehova ’yo Yosua Nuni mvi ’ba azi ngapi Musa driri ma tia, kini,

²Ati’bo mani Musa dra ’bo; ka’dini mi enga curu’do, mi zo Yoridani ’diri, mi’i ’ba ’diyi pie dria, angu mani fele yi dri, yi anzi Israelini ’diyi driria,

³Pari dria emini ngale pa agele ’bazu driniari ma fe emi dri ’bo, ekile mani ndra ’yole Musa ma tiarile.

⁴Engazu angu roko dria azini Lebanoni ’diria, cazu yi ara amboruria, eri yi ara Ufirate’i, angu dria ’ba Hitiniri azini cazu miri amboru etuni ’derialeruria dria nga ovu angu emi vileri.

⁵’Ba aluni ngani eco pa sozaru angu atrizu mi drilia ku o’du mini adrizu idriruria dria; ekile mani ndra aci rile Musa berile, ’dinile ma nga adri mi be indi;ma ngani ece mi ma azakozu ku, ma ngani mi ku ku indi.

⁶Mi ovu di ani okporu, asi agupirusi indio a’disiku mi nga fe ’ba ’diyini angu mani mira oyo sozu fezu yi ma atapi driri a’izu awita yiniru.

⁷Te di, mi ma adri okporu asi agupirusi indi, e’yo ndrezu mi ma ’ye ekile azita dria ati’bo mani Musani azile mi tiarile ani; mi ma oja mi ani dri ndialeru kani dri ejialeru azita nde kuzu ku, ’dini mi ma ovu drilebaru pari mini muzuria dria.

⁸Buku azitani ’diri ma ku mi tile ku, te mi ma dro asisile drinia etusi inisi dria, ’dini mi ma ndre mi ma ’ye ani ekile e’yo dria ovupi sizaru aleniarile; ka’dini mi di nga geri mini ’ba ovuzu onyiru, mi di nga drileba isu ani.

⁹Ma azini te mi tia ra ku ya? Mi ma ovu okporu asi agupirusi indi; mi ma ovu urisi ku, mi asi ma oti ku indi; Yehova Mungu minirini ovule mi be pari mini muzuria driarisi.

¹⁰Yosua nga di azi ’ba amboru ’ba nde dri cepi ’diyi ma tia kini,

¹¹Emi aga pari yini hema asozu nde ’diri ma alesi, emi azi ’ba ma tia kini, Emi ede nyaka emini; a’disiku o’du na ka aga ’bo emi nga Yoridani ’diri zo ’aa’dasi, fizu angu Yehova Mungu eminirini fele emi dri ovuzu eminiruria, eri ’duzu eminiru.

¹²Yosua ’yo ’ba Rubenini piyi ma tia, ’ba Gadini pie, suru Manaseni ma egalapi pie, kini,

¹³Emi ma ega e’yo Musa ati’bo Yehovanini ndra azile emi tia kini, Yehova Mungu mini fe emi dri ava liza, azini eri nga emi dri angu ’diri fe-ri’i.

¹⁴Oku emini, anzi emini nyiri ’diyi pie, anyapa emini pie nga adri angu ndra Musani fele emi dri Yoridania ’aa’dasiria; te emi nga zo adripi emini ma drilia afa ombani ’diyi be, emi ’ba dria okpo be asi agupirusi ’diyi, emi nga yi ma aza ko ra,

¹⁵kpere Yehovani ava liza feria emi adripi dri ekile erini fele emi dri ’borile, kpere yini angu Yehova Mungu eminirini fele yi driri a’iria ’boria alu indi; emi di nga dri atri angu emini a’ile awitaruria eri ’duzu emnirini, angu nde Musa ati’bo Yehovanini ndra fele emi dri Yoridania ’aa’dasi etuni efurialeruri’i.

¹⁶Te yi omvi e’yo Yosua ma tia kini, E’yo dria mini azile ama tiari ama nga ’ye ra, azini pari dria mini ama ti pezuria ama nga mu ra.

¹⁷Ekile ndra amani Musa ma ti erile e’yo driasirile, ’dinile indi ama nga mi ti eri ra; te di, Yehova Mungu miniri ma adri mi be ekile erini ndra ovule Musa berile!

¹⁸Te ’ba azita mini gapi si, ngapi bile copi e’yo dria mini azile eri ma tiari vu kuri, ka ’ba ngoni ngori ti, yi nga eri fu ra. Te di mi adri okporu asi agupirusi.