Read lugbara Yosua 10 Bible Online

Yosua 10 - lugbara bible

Yosua 10

¹Te eri nga eca ’dini, Adonizedeki opi Yerusalemuari ka erie’yo Yosuani Aini bizu,eri dri jazu teketeke ’dinileri ’bo (erini ’yele Yeriko vu opiniri berile, ’ye vini trotro Ai vu opiniri be), eri vini e’yo ’ba Gibeonia ’diyini asi anzu a’izu ’ba Israelini vu ovuzu yi eseliari indi;

²yi ru ani tu a’disiku Gibeonini aku amboruni, eri ovu aku opiniru ’diyi ma azi, azini eri ambo aga Ainiri ra, dika ’ba alenia ’diyi dria okporu.

³E’yo ’disi Adoni-zedeki opi Yerusalemuari nga e’yo ti pe Hohamu opi Hebironiari pi vu, Piramu opi Yarimutiari pie, Yafia opi Lakisiari pie, Debiri opi Egiloniari pie, ’yozu kini,

⁴Emi etu ma vu ma aza kozu, ama ma ’di a’di Gibeoni be; erini asi anzu a’ile Yosua pi vu anzi Israelini be ’borisi.

⁵E’yo ’disi opi towi ’ba Amorini, yi opi Yerusalemuari pi, opi Hebironiari pi, opi Yarimutiari pi, opi Lakisiari pi, opi Egiloniari pie, yi oku yi tualu, nga tu uru, yi’i, asikari ongulumuru yini ’diyi be dria, yi nga hema yini aso Gibeoni drilialeru, a’di ’dizu eri be.

⁶’Ba Gibeonini ’diyi nga e’yo ti pe Yosua vu pari yini hema asozu Giligaliaria, ’yozu kini, Mi dri ma aka ati’ba mini ’diyisi ku; mi emu ama vu mbele ama pazu, ama aza kozu indi; a’disiku opi ’ba Amorini dria ovupi oni dria ’diyi oku yi tualu a’di ’dizu ama be.

⁷’Dinile Yosua nga enga Giligaliarisi, eri’i tualu ’ba ombani ’diyi be, azini ’ba okporu asi agupiru ’diyi be indi.

⁸Yehova nga ’yo Yosua tia, Mi ru yi ku, mani yi fele mi dria ’borisi; ’ba yini aluani ngapi pa sopi mi driliani yo.

⁹Ka’dini Yosua nga emu yi vu rru, erini engale Giligalia ini be rrarisi.

¹⁰Te Yehova nga fe yi ovu ndezaru ’ba Israelini ma drilia, nga yi ofu dri jata amborusi Gibeonia, nga yi odro geri angu tuza mupi Betihoroniarisi, yi dri jazu kpere Azekaa, azini kpere Makedaa indio

¹¹Te eri nga eca ’dini, yini aparia ’ba Israelini ma drilia, azini yini nga esiria angu eluza Beti-horoniaria, Yehova nga oni amboru o’be yi dria ibizu ’bua kpere Azekaa, yi odra ani ra; ’ba odrapi sisi ’diyi aga ’ba Israelinini ofule seisini ’diyi ra.

¹²Yosua nga ’yo Yehova ma tia etu Yehovani ’ba Amorini fezu odrazu anzi Israelini ma driliarisi; eri ’yo ’ba Israelini ma milia ’dini kini, Etu, mi’i, mi so pa ’dani Gibeoni ma dria, azini mi’i, Mba, mi so pa a’bu Aiyalonini ma alia.

¹³’Dini etu nga di pa so ’dani, mba nga adri vini pari alua ’dani indi, cazu kpere suru yini yi ma arioti oferia juru yini ma ruaa. ’Di ovuni sizaru buku Yasariniri ma alia ku ya? Etu so di pa ’bu agadua, ’deni mbele ku o’du alu pi ani.

¹⁴O’du azini ndra ’darile drioni yo, ’yeni vini nga i ’dini vutinia ku indi, o’du Yehovani o’duko aguni erizu rari’i; Yehovani omba ’bale ’ba Israelininirisi.

¹⁵Yosua nga di mvi ’ba Israelini be dria hema yinia Giligalia.

¹⁶Opi towi ’diyi apa ra, nga yi ozi oni gulea Makedaa.

¹⁷E’yoni nga ca Yosua bilia kini, Isu opi towi ’diyi ra, ozi yi oni gulea Makedaa.

¹⁸Yosua nga ’yo ra, Emi gu oni ambo ambo gule tilia ci, emi ’ba ’ba yi ma agei tezu indi;

¹⁹te emi ma te te ku, emi ma dro juru emini ma vuti, emi ofu yi ma azi vileru ’diyi indi, emi ku yi ma fi aku yinia ku; Yehova Mungu eminirini yi fele emi dria ’borisi.

²⁰Eri nga eca ’dini, Yosua pi anzi Israelini be yini deria yi ofuri a dri jata amborusi ’bo, cazu kpere yini yi dri jazu teke teke, de nga yi ma joloko acepi ’diyi fini aku abi kaliru beria ku,

²¹’ba dria yi nga mvi hemaa Yosua vu Makedaa asi anzuru be; ’ba aluni zini i ma ti anzi Israelini ma ruaa yi o’dazu ku.

²²Yosua nga di ’yo, Emi zi oji tile, emi ofu ani opi amboru towi ’dayi amve ma vu engazu ojiarisi.

²³Te yi ’ye ’dini, yi ofu opi amboru towi ’dayi eri vu amve engazu ojiarisi ra, yi opi Yerusalemuari pi, opi Hebironiari pi, opi Yarimutiari pi, opi Lakisiari pi, opi Egiloniari pie dria.

²⁴Te eri nga eca ’dini, yini opi ’dayi ejiria Yosua vu ’boria, Yosua nga di ’ba Israelini omve dria, eri ’yo ’ba amboru ’ba ombani mupi eri be ’diyi ma drilia ’diyi ma tia, Emi esi inyia, emi o’ba emi pa opi ’diyi ma ombelekoa. ’Dinile yi emu inyia, yi o’ba pa yi ma ombelekoa ra,

²⁵Yosua nga di ’yo yi ma tia, Uri ma bi emi ku, emi ru ku indi; emi ma ovu okporu asi teza be; Yehovani ngale ’yele ’dinile ari’ba emini omba ’bazu yi pie ’diyi vu driarisi.

²⁶Vilerisi Yosua o’di yi, ofu yi ra, eri o’i yi ma avu pati towi ma sia, yi ovu ’izaru pati sia ’daa kpere ondresi,

²⁷Te eri nga eca etuni ’deria ’dini, Yosua azi e’yoni, otru yi pati siarisi ra, o’be yi ma avu oni oji te yini yi ozizuria, yi gu oni ambo ambo ’diyi, o’ba oji tilia ci, ecazu kpere o’du andru ’dorisi.

²⁸Yosua nga di Makedani bi o’du ’dasi, fu eri sei ma sisi opi aleniari be; ja yi ma dri teke teke, ’ba idriru ’daa ’diyi pie dria; eri kuni ’ba alu acepini ku; eri ’ye opi Makedaari vu ekile erini ’yele opi Yerikoni vu ’borile.

²⁹Yosua nga aga engazu Makedaarisi ’ba Israelini pie dria, cazu Libinaa, yi ’di a’di Libina be ra

³⁰te Yehova fe eri alu indi opi amboru ’dari be ’ba Israelini ma dria; fu eri sei ma sisi, ’ba idriru alenia ’diyi pie dria; eri kuni ’ba alu acepi aleniani ku; ’ye opi ’dari ekile erini opi Yerikoni ’yelerile.

³¹Yosua nga di aga ’ba Israelini pie dria engazu Libinaarisi muzu Lakisia, hema yini asozu eri ageia, yi ’di a’di eri be ra:

³²te Yehova fe Lakisini Israeli ma dria ra, eri ’du eri o’du iririsi, fu eri sei ma sisi, ’ba idriru alenia ’diyi pie dria, ekile e’yo dria erini ’yele Libina vurile.

³³Etu ’dasi Horamu opi Gezeriari nga di emu Lakisi ma aza kozu; te Yosua fu eri ra, ’ba erini be dria, de nga eri kuni ’ba aluni acezu ku.

³⁴Yosua nga di vini aga engazu Lakisiarisi ’ba erini pie dria mu hema asozu Egiloni ma ageia, yi ’di a’di eri be ra;

³⁵yi pa eri o’du nde ’dasi, fu eri sei sisi; eri ja ’ba idriru alenia ’diyi ma dri teketeke o’du ’dasi, ekile e’yo dria erini ’yele Lakisi vurile.

³⁶Yosua nga di enga Egiloniarisi; ’ba Israelini pie dria, mu Hebironia yi ’di a’di eri be ra,

³⁷bi eri ra, fu eri sei ma sisi, opi amboru aleniari pi, aku erini pie dria, ’ba idriru alenia ’diyi pie dria; eri kuni ’ba alu acepini ku, ekile erini ’yele Egiloniarile, te eri ja drini teketeke ’ba idriru alenia ’diyi pie dria.

³⁸Yosua nga di dri atri ’ba Israelini pie dria mu Debiria, yi ’di a’di eri be,

³⁹azini eri pa eri ra, opi alenia ’daari pi, aku amboru ageinia ’diyi pie yi ofu yi sei ma sisi, ja ’ba idriru alenia ’diyi ma dri teketeke ra; kuni ’ba alu acepini ku; ekile erini ’yele Hebironiarile eri ’ye Debiri vu ’dini indi opi erini be, ekile erini ’yele Libinaa opi erini be ’borile.

⁴⁰’Dini Yosua ofu di ’ba angu ndea ’diyi dria, suru oni ruaa ’diyi pie, ’ba angu Uruleruria ’diyi pie, ’ba angu senderia ’diyi pie, ’ba angu eluzaruria ’diyi pie, opi amboru yini pie dria indi; eri kuni ’ba alu acepini ku, te eri ofu afa idriru ava ’yapi ’diyi dria dria, ekile Yehova Mungu Israelinirini azilerile,

⁴¹Yo sua ofu yi engazu Kadesi-barineaarisi kpere Gazaa, angu Goseniari be dria, kpere Gibeonia.

⁴²Opi ’diyi dria angu yini pie, Yosua opa yi pale alu o’du nde ’diyisi, a’disiku Yehova Mungu Israeliniri ’di a’di ’ba Israelinisini.

⁴³Te Yosua atri dri ra, ’ba Israelini pie dria eri be, angu yini hema asozu Giligaliaria.