Read lugbara Yosua 14 Bible Online

Yosua 14 - lugbara bible

Yosua 14

¹Angu anzi Israelinini bile awuruso yinirui angu Kananinia ’diyi yi ’di, angu nde ’ba edeta edepi Eleazari pi, Yosua Nuni mvi pie, ’ba ’wara ori’ba drilia suru anzi Israelinini vusi ’diyini awale yi drini ’diyi.

²Awuruso yini ’diyi yi isu odrisi ’bezasi, ekile Yehovani azile geri Musa ma tiarisi suru oromi ali be ’diyi ma e’yosirile.

³Musani awuruso fele suru iri ’diyi pi dri suru aliruri be Yoridani tia ’aa’dasi ’borisi; te ’ba Levini dri eri feni awuruso yini yi ma eselia ku.

⁴A’disiku anzi Yusufuni yini ovule suru iri Manase pi Efiraimu berisi; te yi feni ’ba Levini ’diyi dri esele yiniri angu nde ma alia ku, pe lu kiri aku yini adrizu ’diyi’i, angu ageinia’diyi be anyapasi lonyi yini ma ta mbazu.

⁵Ekile Yehovani azile Musa tiarile anzi Israelini ’ye bani ’dini; yi awa di angu nde ra.

⁶Anzi Yudani nga di si Yosua vu ogogo Gileadia ’dale; Kalebu Yefune mvi ’ba Kenizini ’yo tinia, kini, Mi ni e’yo Yehovani ’yole Musa ’ba Munguni ma tia Kadesibarineaa ama e’yosi mi beri ra.

⁷O’du ndra Musa ati’bo Yehovanini ma ti pezo engazu Kadesi-barineaasi emuzu angu ’diri ma orile gazurisi de ndra ma eli ca kali su ’bo; ma’i ma nga eri dri e’yo eji dika erini ovule ma asiarile.

⁸Te ti ma adripi amani muzu yi be ’diyi fe ’ba ’diyi ma asi ca ra; te ma ’ba ma asi dria ’dani Yehova Mungu mani ma vuti bizu.

⁹O’du ’darisi Musa so oyo kini, Ada, angu mi pani tule ’diri nga ovu esele miniru, angu nderi ma ovu mini mi anzipi be ’dani ’dani, mini mi asi ’bale dria Yehova Mungu mani ma vuti bizu ’dani ’danirisi.

¹⁰Curu’do mi lu, Yehova mba ma ta idriru ’bo ekile erini ’yolerile, eli ’diyi kali su drini towi engazu o’du Yehovani e’yo ’diyi ’yozu Musa tia, ’ba Israelini yini aciria roko dria ’daarisi; te mi ne, curu’do ma ovu eli be kali aro drini towi andru.

¹¹Te ti andrerisi ma ovu okpo be andra Musani ma ti eperia ’daarile; okpo manini ndra ovulerile okpo mani curu’dori eri vini ’dini tro tro, omba ’dizu kani fuzu azini emvizu.

¹²E’yo ’disi mi ma fe mani oni Yehovani e’yo ’yole erisi o’du ’dasi ’diri fo; mi ngulupini erile o’du ’dasi kini ’ba Anakini yi ’daa, azini aku yi amboru azini kali berisi: kani Yehovani nga ovu ma be yani, ma ma dro yi beni, kile Yehovani ’yolerile.

¹³Yosua nga di asi ndriza fe Kalebu Yefune mvi dri ra; nga Hebironini fe esele eriniru.

¹⁴Ka’dinile Hebironi nga ovu Kalebu Yefune mvi ’ba Kenizini dri ovuzu angu esele eriniru ecazu o’du ’diria andru, a’disiku erini i asi ’bale dria Yehova Mungu ’ba Israelinini ma vuti bizurisi,

¹⁵Andra okorisi Hebironi ma ru Kiriati-ariba’i; Ariba nderi ndra ’ba ambo agapi dria ’ba Anakini ma driliari’i. Te angu nga di ndri a’dini asilerisi ra.