Read lugbara Yosua 18 Bible Online

Yosua 18 - lugbara bible

Yosua 18

¹’Ba ongulumuru dria Israeli anzipiruri nga yi oku tualu Siloa, yi nga hema ti ecizaniri aso ’daa; te angu nderi ovu ndezaru yi ma drilia ’bo.

²Te Israeli anzipi vile suru ace aziri, angu esele yini isupi nga ku ’diyi.

³Yosua nga bani ’yo anzi Israelini ma tia, kini, Emi drini aka ovusi ’dini cazu ewu ngopi, emini tezu fikokoru angu Yehova Mungu emi atapini ndra fele emi dri ’diri nyazu kuru beni ya?

⁴Emi ma pe di ’ba na na suru vusi, ma nga yi ti pe, yi ma nga, ma aci angu nde ma alesi, yi ma si angu nde ma e’yo ani awuruso yini vusi, yi ma nga di emvi ma vu ndo.

⁵Yi ma awa eri esele be aziri, ’ba Yudani ma adri esele yini be ’dani kala urulerua, suru Yusufuni indi ma adri esele yini be kala andralerua.

⁶Emi ka nga de angu ma e’yo osizu ’bo, ma efu esele anguni aziri, emi ma eji di ma dri osiza nde ’diyi ’doa; mani bani ngazu di odrisi ’bezu emi dri Yehova Mungu emini ma milia dia.

⁷’Ba Levini ngani esele anguni isu emi eselia ku, azi edeta edezu Yehova dririni ovule awuruso yinirisi; azini indi ’ba Gadini piyi, ’ba Rubenini pie, suru Manase vileri ma ali be, yi bi awuruso yini Yoridani tia ’aa’dasi kala etuni efuzurialeru ’bo, Musa ati’bo Yehovanini fele yi driri.

⁸’Ba ’diyi nga di dri ko mu ani: te Yosua azi ’ba mupi angu osipi ’diyi ma tia kini, Emi ma mu, emi ma aci angu ’ diri ma alesi, emi ma osi di e’yoni yi ci, vilerisi emi ma emvi ma vu ndo; te ma’i ma nga di odrisi ’be emi dri Yehova ma milia Siloa ’doa.

⁹’Ba ’dayi nga di mu ra, yi nga aga angu nde ma alesi, yi nga eri ma e’yo osi buku alia aku vusi aku vusi, eri ma efu angu esele aziri beni; yi nga di mvi pari ’bani hema asozuria Yosua vu Siloa ndo.

¹⁰Yosua nga di odrisi ’be yi dri Yehova ma milia Siloa; Yosua awa di angu anzi sraelini dri esele yini vusi ’dale ra.

¹¹Odrisi nga ’de Benyamini anzipi ma dria enyati yini vusi, angu odrisi ndeni fele yi driri ma esele e’do fu anzi Yudani pi ma eselia Yusufu anzipi be ’disi.

¹²Lokiri yini andraleruri e’do yi ara Yoridania; lokiri nde nga tu Yeriko ma tia kala andralerurisi, idri i tuzu angu oni eseliaria etuni ’derialeru; efuza asizaniri roko Beti-aveni vileria.

¹³Engazu ’darisi lokiri nde idri i cazu Luzia, Luzi tia dri fezu uruleru (Luzini bani Beteli’i); angu ma lokiri si vini Ataroti-adaria, oni ovupi Betihoroni eleri ma kala uruleruri ma tia.

¹⁴Vilerisi lokiri idri vini i ti cozu kala etu ’devuleru luzu uruleru engazu oni ovupi Beti-horoni ma drilia kala uruleruriasi, efuza asizaniri ovu Kiriati-baalia (aku nde bani Kiriati-yearimu’i) ovupi aku Yuda anzipiniri. ’Diri bani kalati woko etuni’derialeruri’i.

¹⁵Kalati woko urulerini e’do Kiriati-yearimu ma kalati asizuria; lokiri nde enga ’dalerisi fu kala etuni ’derialeru, fu cazu yi a’di Nefitoaniria;

¹⁶engazu’darisi lokiri si va cazu oni ovupi a’bu Hinomu mvini driliari ma kalati asizuria, oni nde eri a’bu Refaimunia andraleru; si vini a’bu Hinomu vusi angu ’ba Yebusini ma tiasi uruleru, idri vini i sizu Eni-rogelia;

¹⁷idri i ti cozu andraleru fuzu Eni-semesia, efuzu cazu vini kpere Geliloti i otipi angu tuza Adumimuni beria; vilerisi si kata Bohani Rubeni mviniria;

¹⁸engazu ’darisi idri i agazu kala andraleru Araba vuleruriasi, vilerisi elu vini i Arabaa ’dia;

¹⁹Lokiri ma vu aga vini kpere Beti-hogila tiasi kala andraleruria; fuza asizaniri ca oji andraleru Miri A’iruniria Yoridani ma asiza drile fepi uruleruria: ’diri bani lokiri uruleruri

²⁰Te Yoridanini eri ma lokiri woko etuni efurialeruri’i. ’Diri ndra angu Benyamini ma anzipini yini isule awurusoru enyati yini vusi, lokiri ageini ecizuri vusiri.

²¹Aku ambo ambo suru Benyamini anzipini isule awurusoru enyati yini vusi ’diyi yi ’di: Yeriko pi, Beti-hogila pi, Emeki-kezizi pi,

²²Beti-araba pi, Zemaraimu pi, Beteli pi;

²³Avimu pi, Para pi, Ofira pi,

²⁴Kefari-amoni pi, Ofini pi, Geba pie; yi bani aku ambo ambo mudri drini iri, aku nyiri nyiri yini ’diyi be:

²⁵Gibeoni pi, Rama pi, Beeroti pi,

²⁶Misipe pi, Kefira pi, Moza pi,

²⁷Rekemu pi, Iripeeli pi, Tarala pi,

²⁸Zela pi, Elefu pi, Yebusi (bani Yerusalemu’i) pi, Gibeati pi, Kiriati pie; yi bani aku ambo ambo mudri drini su, aku nyiri nyiri yini ’diyi be. ’Diri angu Benyamini anzipini isule awurusoru enyati yini vusiri.