Read lugbara Yosua 20 Bible Online

Yosua 20 - lugbara bible

Yosua 20

¹Yehova nga ’yo Yosua tia kini,

²Mi ma ’yo Israeli anzipi ma tia kini, Emi ope emi dri aku ambo ambo ’bani apazu ’diyi, mani ndra ’yole emi tia Musa ma tisirile,

³’ba ’ba fupiri ma apa alenia beni, eri ka i agyini ’di eri fuzu aka ku, kani e’yoni nizu ra ’dini kuria; emi ma apa ani aku nde ’diyia emi ta mbazu ’ba lepi avu arioti ofepirisi beni.

⁴Eri ma apa aku ’diyi ma azi alu alia, eri ma so pa kalitile fizu akuniria, e’yo erini ezaleri ’yozu ’ba ’wara aku ’dirini ’diyi ma bilia ani; yi ma a’i eri aku yinia pari fezu eri ma ovu yi eselia ani.

⁵’Ba avu ’di ma arioti ofepiri ka eri vuti dro, yi ma ofu ’ba ’ba fupi ’dari fezu eri dria ku; erini i agyini ’dile aniakosirisi, kani erini agu nde ngule i asia drio kurisi.

⁶Eri’i eri nga ovu aku ’dari ma alia kpere erini ngaria pa soria ’ba ongulumuru drilia, yini ngaria eri ma e’yo liria, de nga ’ba edeta edepi amboru o’du ’dasiri drani ku: bani ’ba ’ba fupiri nga ani di emvi i vile akua, kpere i vile joa ndo, eri nga di emvi aku ndra erini ibizu apazu aleniasiria.

⁷Yi nga ani Kedesi pi ope angu Galilini ma alia angu oniru Nafutalinia, Sekemu pie angu oniru Efiraimunia, Kiriati-ariba (eri Hebironi’i) pie angu oniru Yudania.

⁸Dika Yoridani tia kala ’aa’dasi Yeriko ma kala etuni efurialeru, yi nga suru Rubenini alia aku Beseri ovupi rokoa angu senderuari pi ope, Ramoti i Gileadiari pie suru Gadini ma alia, Golani Basaniari pie suru Manaseni ma alia.

⁹’Diyi aku ovupi opezaru i Israeli anzipi yi dri dria, ani’ba ovupi ’yi ma eselea ’diyi dri indi, ’ba dria alu alu i agyini fupi aka kuri ma ovu fuzaru ’ba lepi avu arioti ofepiri dri ku, kpere erini pa soria ’ba ongulumuru drilia.