Read lugbara Yosua 21 Bible Online

Yosua 21 - lugbara bible

Yosua 21

¹Vilerisi ’ba ’wara Levini, ori’ba yi ma atapini ma drilia ’diyi, nga emu Eleazari ’ba edeta edepiri pi vu, Yosua Nuni mvi pie, ’ba ’wara suru Israeli anzipini ori’ba yi ma atapini ma drilia ’diyi be;

²nga ’yo yi tia Siloa angu Kananini ma alia kini, Yehova azi ndra ama dri Musa ma tiarisi aku fezu amani ovuzu alenia, angu ageiniari pie iribiru anyapa amani ocele ’diyi dri indio

³Ka’dinile Israeli anziyi yi nga ’ba Levini dri aku ’diyi fe tualu angu ageiniari be, engazu angu yini a’ile awurusoruri ma alia, Yehovani azile yi dririle.

⁴Odrisi ’de enyati ’ba Kohatini ma dria. Aroni ’ba edeta edepiri ma a’bianzi ovupi ’ba Levini eselia ’diyi yi isu odrisisi aku mudri drini na suru Yudani pi ma eselia, suru Simeonini pie, suru Benyaminini be.

⁵Yini odrisi ’beria, ’ba Kohatini acepi jolokoru ’diyi isu aku mudri enyati suru Efiraimuni pi ma eselia suru Danini pie, suru ali Manaseni pie.

⁶Yini vini odrisi ’beria, ’ba Gerisonini ’diyi isu aku mudri drini na, enyati suru Isakarini pi ma eselia’i suru Aserini pie, suru Nafutalini pie, suru ali Manaseni pie Basania ’dale.

⁷Merari anziyi isu yini vini aku mudri drini iri awazu enyati yini vusi suru Rubenini pi ma eselia suru Gadini pie, suru Zebulunini pie.

⁸Aku’diyi Israeli anziyini fele ’ba Levini dri tualu angu ageinia ’diyi be yini odrisi ’beria, ekile Yehovani e’yoni azile yi dri Musa ma tiarisirile.

⁹Suru Yuda anziyini ma alia suru Simeoni anziyini be, yi fe aku ’bani ecele rusi ’diyi.

¹⁰Yi ovu Aroni anziyi enyati Kohatini ovupi Levi anziyi eselia ’diyi dri, a’disizu odrisi ’beza okori ovu yini.

¹¹Yi nga yi dri Kiriati-ariba fe (Ariba nde ndra Anaki ma ati’i, angu nde bani Hebironi’i), angu nde ovu oni dria Yuda vile angua, fe aku nde ra angu ageini acepi kururi be.

¹²Te aku nderi ma amvu tualu aku nyiri nyiri erini ’diyi be yi fe Kalebu Yefune mvi dri, ma ovu afa eriniru.

¹³Te Aroni ’ba edeta edepiri ma, a’bianzi dri yi fe aku Hebironi pi angu eri ma ageiari be, eri ndra aku i ’ba ’ba fupi ’diyini apazuri, Libina pie angu eri ma ageiari be,

¹⁴Yatiri pie angu eri ma ageiari be, Esitemoa pie angu eri ma ageiari be,

¹⁵Holoni pie angu eri ma ageiari be, Debiri pie angu eri ma ageiari be,

¹⁶Aini pie angu eri ma ageiari be, Yuta pie angu eri ma ageiari be, Beti-semesi pie angu eri ma ageiari be-aku ambo ambo oromi suru iri ’diyi ma eselia;

¹⁷dika suru Benyaminini ma alia, Gibeoni pi angu eri ma ageiari be, Geba pie angu eri ma ageiari be,

¹⁸Anatoti pie angu eri ma ageiari be, Alimoni pie angu eri ma ageiari be-aku ambo ambo su.

¹⁹Aku ambo ambo Aroni ma a’bianzi ’ba edeta edepi ’diyini, dria mudri drini na tualu angu yi ma ageia ’diyi be.

²⁰Enyati Kohati ma a’bianzini ’ba Leviniru ’diyi, yi a’bianzi Kohatini acepi jolokoru ’diyi, yini odrisi yini ’beria yi isu aku yini suru Efiraimuni ma eselia.

²¹Nga yi dri Sekemu pi, ovupi aku ’ba ’ba fupi ’diyini apazuriruri fe angu eri ma ageiari be, angu oni dria Efiraimuniria, Gezeri pie angu ageiniari be,

²²Kibizaimu pie angu ageiniari be, Beti-horoni pie angu ageiniari be-yi aku ambo ambo su;

²³suru Danini ma eselia yi fe Eliteke pi angu ageiniari be, Gibetoni pie angu ageiniari be,

²⁴Aiyaloni pie angu ageiniari be, Gati-rimoni pie angu ageiniari be-yi aku ambo ambo su;

²⁵suru ali Manaseni ma eselia yi fe Taanaki pi angu ageiniari be, Gatirimoni be angu ageiniari be-aku ambo ambo iri.

²⁶Aku nde ’diyi enyati Kohati anziyi ma joloko acepi ’diyini, yi dria mudri angu ageinia ’diyi be.

²⁷Yi fe Gerisoni anziyi, ovupi ndra ’ba Levini ma enyatiru ’diyi dri, suru ali Manaseni ma alia Golani Basaniari pi, ovupi ndra aku ’ba ’ba fupi ’diyini apazuriruri, angu ageiniari be, Be-esitera be angu ageiniari be-yi aku ambo ambo iri;

²⁸sakari vile sururi eselia, Kisioni pi angu ageiniari be, Daberati pie angu ageiniari be,

²⁹Yarimuti pie angu ageiniari be, Eni-ganimu pie angu ageiniari be-aku ambo ambo su;

³⁰Aseri vile sururi eselia, Misali pi angu ageiniari be, Abidoni pie angu ageiniari be,

³¹Helikati pie angu ageiniari be, Rehobu pie angu ageiniari be-aku ambo ambo su;

³²Nafutali vile sururi eselia, Kedesi Galiliari pi angu ageiniari be, ovupi aku ’ba ’ba fupi ’diyini apazuriruri, Hamoti-dori pie angu ageiniari be, Karitani pie angu ageiniari be-aku ambo ambo na.

³³Aku ambo ambo Gerisoni anziyini enyati yini vusi ’diyi dria mudri drini na angu ageinia ’diyi be.

³⁴Enyati Merari anziyini ’ba Levini ma joloko acepi ’diyi dri, yi fe suru Zebulunini ma eselia, Yokineamu pi angu ageiniari be, Karita pie angu ageiniari be,

³⁵Dimina pie angu ageiniari pie, Nahalali pie angu ageiniari be-aku ambo ambo su;

³⁶suru Rubeni vileri ma eselia, Bezeri pi angu ageiniari be, Yahazi pie angu ageiniari be,

³⁷Kedemoti pie angu ageiniari be, Mefaati pie angu ageiniari be-aku ambo ambo su;

³⁸Suru Gadini ma eselia yi fe Ramoti Gileadiari pi angu ageiniari be, ovupi aku ’ba ’ba fupi ’diyini apazuriruri, Mahanaimu pie angu ageiniari be,

³⁹Hesiboni pie angu ageiniari be, Yazeri pie angu ageiniari be-dria aku ambo ambo su.

⁴⁰Aku ’diyi dria Merari anziyi acepi ’ba Levini ma enyatiru ’diyini, yini isule enyati vusi ’diyi, odrisi ’beza yini ndra aku ambo ambo mudri drini iri.

⁴¹Aku ambo ambo dria ’ba Levini a’ile awuruso Israeli anziyini ma eselia ’diyi, yi dria kali su drini aro angu yi ma ageia ’diyi be.

⁴²Aku ambo ambo ’diyi ovu alu alu angu yi ma agei acepi kururi be tualu; aku ambo ambo ’diyi dria ndra ’dini.

⁴³’Dini Yehova fe di ’ba Israelini dri angu dria erini oyo sole yi ma a’bipi tia fezu yi driri ra; yi nga eri ’du yiniru, nga ovu alenia.

⁴⁴Yehova nga di ava liza fe yi dri kala vusi dria, ekile e’yo dria erini oyo sole yi a’bipi tiarile; ari’ba yini dria ma eselia ’ba aluni ecopi pa sozaru yi driliani yo, Yehova fe juru yini dria yi ma dria ra.

⁴⁵E’yo onyiru dria Yehovani azile suru Israelini dri ’bori aluni avini yi dri ku; e’yo dria ’ye yi tro.