Read lugbara Yosua 3 Bible Online

Yosua 3 - lugbara bible

Yosua 3

¹Yosua enga o’biti kula kula, yi enga ’dale Sitimuarisi, mu Yoridania, eri’i anzi Israelini be dria; yi la ’daa de nga yi zoni ku.

²Eri nga eca ’dini o’du na ma vutia, ’ba ’ba dri cepi ’diyi nga aga trei pari ’bani hema asozuri ma eselesi,

³nga e’yoni azi ’ba ma tia kini, Emini ngaria sanduku aziza Yehova Mungu eminirini ndreria, ’ba edeta edepi ’ba Levini ’diyini eri ’duria, emi di nga pari emini ku muzu eri vuti bizu.

⁴Emi eseleni nga ovu sanduku nderi be ekile yini oconi o’bile wuale alifu iri ’dipirile; emi etru emi eri vu inyia ku; emi ma ni geri emini bileri ani, emini zole nga geri ’disi oku kurisi.

⁵Te Yosua nga ’yo ’ba nde ma tia, Emi ’ba emi alaru; a’disiku drusi Yehovani nga e’yo osutaru ’ye emi eselia.

⁶Dika Yosua nga ’yo ’ba edeta edepi ’diyi ma tia kini, Emi ma ’du sanduku azizaniri, emi ma aga ’aa’dasi ’ba ma drilia. Yi ’du sanduku azizaniri ra, yi mu ’ba drilia ani.

⁷Yehova nga di ’yo Yosua ma tia, O’du andru ’dirisi ma nga e’do mi ’bazu amboru Israeli ma milia dria, yi ma ni ani kini, ma nga ovu mi be tualu ekile mani ndra ovule Musa berile.

⁸Te mi ma azi ’ba edeta edepi sanduku azizani ’dupi ’diyi ma tia kini, Emi ka nga eca yi Yoridanini ma kutia ’bo, eri i nga pa oso ci Yoridani ma alia.

⁹Yosua nga ’yo anzi Israelini ma tia, Emi emu ’doa, emi ma eri e’yo Yehova Mungu eminirini.

¹⁰Yosua nga di ’yo, Geri ’dirisi emi nga ni kini Mungu idriru indi emi eselia, azini ada ada eri nga ’ba Kananini piyi odro emi driliasi ecekokoru, ’ba Hitini pie, ’ba Hivini pie, ’ba Perizini pie, ’ba Girigasini pie, ’ba Amorini pie, ’ba Yebusini pie dria.

¹¹Emi ndre, sanduku aziza Yehova wudrikuru drianirini aga emi drilia fizu Yoridania.

¹²Ka’dini emi ma ope ’ba mudri drini iri suru Israelini ma eselia, suruti vusi dria ’ba alu alu.

¹³Eri nga eca ’dini, ’ba edeta edepi sanduku aziza Yehova opi wudrikuru drianirini ’dupi ’diyi ma pa agele ka nga pa so yi Yoridanini ma alia, ma nga geri oga yi Yoridanini dri, ada yi engapi uruleruri; yi nderi nga pa so ngulumu amule ci.

¹⁴Eri nga di eca ’dini, ’bani hema yini kuria, Yoridanini zozu, ’ba edeta edepi ’diyi ovu de sanduku azizaniri ’duria ’ba nde ma milia;

¹⁵’ba sanduku ’dupi ’diyi ka ca Yoridania ’bo, ’ba edeta edepi sanduku nde ’dupi ’diyi ka pa so yi kutia ’daa (isu e’bu Yoridanini adri ti kpere aparaca tia amve, ewu anya lozanisi dria),

¹⁶’dini yi engapi uruleruri nga pa so ci, nga i oku nguluru ekile amule ziri ’dale Adamu aku ovupi Zaretani ma kalaaria, azini yi rapi va miri Arabaa, ada Miri A’iruriari, li i ti toto; re ’ba nde yi zo ani pari i otipi Yeriko beria ra.

¹⁷’Ba edeta edepi sanduku aziza Yehovanirini ’dupi ’diyi oso pa angu a’wi dria Yoridania agadua, te ’ba Israelini dria zo angu a’wiru ma driasi, suru driani zoria Yoridania ’aa’dasi ’boria.