Read lugbara Yosua 4 Bible Online

Yosua 4 - lugbara bible

Yosua 4

¹Eri nga eca ’dini, suru driani zoria Yoridania ’aa’dasi ’boria, Yehova ’yo Yosua ma tia kini,

²Mi ’du ’ba mudri drini iri engazu ’ba nde ’diyi ma eselia, suruti alu alu ma ’alia ’ba alu alu,

³azini mi azi yi ma ria kini, Emi ma o’du oni mudri drini iri Yoridania agadua ’dia, pari ’ba edeta edepi ’diyini pa sozuria, emi ’du yi ji ’aa’dasi emi be, emi o’ba yi va pari emini lazuria, emini ngazu lazu ini ’dosiria.

⁴Yosua nga di ’ba mudri drini iri erini edele ngonde anzi sraelini ma eselia, suruti alu alu ma eselia ’ba alu alu ’diyi omve ra;

⁵Yosua nga di ’yo yi ma ria, Emi ma zo sanduku Yehova Mungu eminirini ma drilia Yoridania agaduasi, azini ’ba dria alu alu ma ’du oni alu i ma wusi dria indi, suruti anzi Israelini ma kalafe vusi;

⁶e’yo ’diri ma ovu ani ecetaru emi eselia’i anzi emini ka nga te emu emi zi etu drozirisi kini, Oni ’diyi ece e’yo efi ngoni ya?

⁷Emi di nga ’yo yi ma tia kini, A’disiku yi Yoridanini li i ma ti sanduku aziza Yehovanirini ma drilia toto; erini zoria Yoridaniasi rarisi, yi Yoridanini li i ti toto ra. Oni ’diyi nga ovu ecetaru egata fezu anzi Israelini dri ’dani.

⁸’Dini anzi Israelini yi ’ye kile Yosuani azile yi tiarile, yi o’du oni mudri drini iri engazu Yoridania agadua, kile Yehovani ’yole Yosua ma tiarile, suruti anzi Israelini ma kalafe vusi; yi o’du yi jizu yi be indi pari yini lazuria, yi o’ba yi va ’daa.

⁹Te Yosua odro oni mudri drini iri Yoridania agadua, pari teka ’ba edeta edepi sanduku azizani ’dupi ’diyini pa sozuria; yi ovu ’dale indi kpere o’du andru ’dorisi.

¹⁰A’disiku ’ba edeta edepi sanduku ’dupi ’diyi oso pa Yoridania agadua, de nga e’yo dria Yehovani azile Yosua ma tia ’yozu ’ba nde dri ’diyini yi deria, tro tro ekile e’yo dria Musani azile Yosua ma tiarile. ’Ba nde yi ’ye mbele mbele, yi zo ’aa’dasi ra;

¹¹eri eca ’dini, ’ba dria ka zo ’aa’dasi de ’bo, sanduku Yehovani nga di zo, ’ba edeta edepi ’diyi pie, ’ba nde ’diyi ma milia ndo.

¹²Azini anzi Rubenini piyi, anzi Gadini pie, suru Manaseni ma egalapi pie, yi zo ’aa’dasi afa ombani yini be anzi Israelini ma drilia, ekile ndra Musani ’yole yi ma tiarile;

¹³’ba ekile alifu kali sule yi otupi ngonde a’di ’dizu ’diyi zo Yehova ma milia muzu ombaa, angu senderu Yerikoniria.

¹⁴O’du ’dasi Yehova fe Yosuani ovuzu amboru anzi Israelini ma milia dria; yi ru eri ra, ekile yini ndra Musani rulerile, ewu erini ovuzu idrirurisi dria.

¹⁵Te Yehova ’yo Yosua ma tia i kini,

¹⁶Mi azi ’ba edeta edepi te sanduku e’yo eti nzezaniri ’dupi ’diyi ma tia kini yi ma etu di Yoridaniarisi ra.

¹⁷Ka’dini Yosua nga di azi ’ba edeta edepi ’diyi ma tia kini, Emi etu di Yoridaniarisi.

¹⁸Eri nga di eca ’dini, ’ba edeta edepi te sanduku aziza Yehovanirini ’dupi ’diyi ka etu Yoridani ma agaduarisi ’boria, ’ba edeta edepi ’diyi ka mu yi ma pa agele o’du o’ba angu a’wiru ma dria ’bo, yi Yoridanini nga emvi i ma paria, yini nga ti kpere aparaca tia amve ekile okorile.

¹⁹’Ba nde yi efu Yoridaniarisi o’du mudri mba okorinisi, aso hema yini Giligalia, Yeriko ma kalaa etuni efurialeru.

²⁰Azini oni mudri drini iri yini o’dule engazu Yoridania ’diyi, Yosua odro di yi Giligalia ’daa.

²¹Te eri ’yo anzi Israelini ma tia kini, Anzi emini ka nga yi ma atapi pi ozi etu drozirisi kini, Oni ’diyi ma e’yo efi ngoni ya?

²²-emi nga di fe anzi emini ma ni kini, Israeli zo Yoridani ’diri angu a’wiru ma dria.

²³A’disiku Yehova Mungu eminiri fe yi Yoridanini nzuzu emi drilia, kpere emini zoria ’aa’dasi ’boria, ekile Yehova Mungu eminirini ndra Miri Ekaru ’yelerile, erini ndra fele yi ma nzu ra kpere amani agaria ’aa’dasirile,

²⁴’dini suru oro drisi dria ’diyi ma ni dri Yehovani ovu okpo be tu; ’dini emi ma ru Yehova Mungu eminiri ’dani ’dani beni.