Read lugbara Yosua 5 Bible Online

Yosua 5 - lugbara bible

Yosua 5

¹Eri nga di eca ’dini, opi amboru dria Amorini Yoridania ’aa’dasi kala etuni ’derialeru ’diyi, azini opi dria Kananini ovupi miri tia ’diyi pie, yi ka e’yo Yehovani fezu yi Yoridanini nzuzu anzi Israelini ma drilia kpere yini agaria ’aa’dasiri eri ’bo, yi ma asi ca ra, orindi yini aceni okpo be yi ma alia aluni dika ku indi, anzi Israelini ma urisi.

²Etu ’dasi Yehova ’yo Yosua ma tia, Mi ede ili oni kongolokorurisi, mi ma oli anzi Israelini ma agele pale iririsi dika.

³Yosua nga di ili ede oni kongolokorusi, eri nga anzi Israelini ma agele oli ani Gibeatihaaralotia.

⁴’Diri bani e’yo Yosuani yi ma agele olizuri’i: ’ba dria efupi ndra Misiriasi agupiru ’diyi, ’ba dria ombani ’diyi, yi odra dria geria roko dria yini efuzu Misiria ’boriari ma vutia.

⁵’Ba dria efupi ’diyi a’i ndra agele liza ’bo, te ’ba dria yini osile roko dria yini efuzu Misiria ’boriari ma vutia ’diyi a’ini nga agele liza ku.

⁶A’disiku anzi Israelini yi aci roko dria eli kali su, ecazu suru dria, ’ba dria ombani efupi Misiriasi ’diyini ovuria okizaru, yini o’duko Yehovani erile kurisi; te Yehova so ndra oyo yi vu kini i a’ini yi ma ndre angu Yehovani oyo sole yi ma atapi dri kini i nga fe ama dri rari ku, angu nde rapi lesu pisi anyuoso beri’i.

⁷Anzi yini, erini engale yi ma paria ’diyi, Yosua oli yi ma agele ra; yi a’ini nga agele liza ku a’disiku yi olini ndra nga yi ma agele geria ku.

⁸Eri nga eca ’dini,Vi ka suru nde ma agele oli dezu dria ’bo, yi adri pari yini vusi pari yini hema asozuria kpere yi ma bileni jaria ’boria.

⁹Yehova nga di ani ’yo Yosua ma tia, O’du ’disi ma ogu drinza Misiriniri emi dria ’bo. E’yo ’disi nga pari nderi omve ani, Giligali kpere curu’do.

¹⁰’Dinile anzi Israelini yi aso hema yini Giligalia; azini yi mba omu agaza ’ba drilesiri ma ta, mba nde ma o’du mudri drini suri ma ondresi, angu senderu Yerikoaria.

¹¹Te yi nya anya okpolo angu ndeari, omu agaza ’ba drilesiri ma vutia drusi ’dini, mikate akufi kokoru pi, akarafi ondu ozozaru pie, o’du alu nderi ma alia.

¹²Te mana de i drusi ’dini o’du yini anya okpolo angu ndeniri nyazu ’bori ma vutia ra; anzi Israelini asini di ovu mana be dika ku, te eli ’dasi yi nya afa kaza angu Kananiari’i.

¹³Eri nga vini eca ’dini Yosuani ovuria Yeriko ma tia ogogo, eri enga i mile uru, eri ndre, te mi ne, agupini pa soria eri ma drilialeru sei be i ma dria; Yosua mu vunia, ’yo tinia kini, Mi ’ba amaniru ya, kani ari’ba lamaniru ya?

¹⁴Te eri ’yo ra, Yo; te ma eca asikari ongulumuru Yehovani ’diyi ma dri cepiriru ’do. Ka’dini Yosua eco i o’bukuru va nyakua eri inzizu, ’yo tinia, Opi maniri ’yo ati’bo ini ma tia ngoni ya?

¹⁵Te ’ba asikari ongulumuru Yehovani ma dri cepiri ’yo Yosua ma tia, Mi tru enyiriko mi paa ’diyi ra, a’disiku pari mini pa sozu ’dirini ovule alatararurisi. Yosua ’ye di trotro ’dinile.