Read lugbara Yosua 7 Bible Online

Yosua 7 - lugbara bible

Yosua 7

¹Te anzi Israelini yi nga ezata eza afa trile ’diyi ma e’yosi; Zabidi Zera mvi, ma mvi Karimi, ma mvi Akani, suru Yudaniri, nga afa trile tri ’diyi ma azi o’du ra; te adra Yehovani nga ve anzi Israelini ma ruaa ani.

²Te Yosua nga ’ba ti pe engazu Yerikoasi muzu Ai ovupi Beti-aveni ma ageia, kala Betelini etuni efurialeruria, eri nga ’yo yi ma tia kini, Emi ma tu angu ’dari ma orile gazu. ’Ba yi tu Ai ma orile gazu ra.

³Yi emvi Yosua vu, yi ’yo eri tia, ’Ba ma mu dria tuzu ’dale ku, te mi ku ’ba alifu iri kani alifu na ma tu Ai ma dri jazuni; mi fe ’ba dria ma ecandi yi muzu ’dale ku, a’disiku ’ba nde yi ovu were.

⁴Ka’dini ’ba ekile alifu nale tu muzu ’dale ra; te yi apa ’ba Aja ’diyi ma drilia apa apa,

⁵azini ’ba Aja ’diyi ofu ’ba ’diyi ekile ’ba kali na drini azia, yi nga yi dro engazu aku tiliarisi kpere cazu Sebarimua, yi nga yi ofu angu eluzaria; asi ’bani nga ca corokolo yile.

⁶Yosua nga bongo ini osi ra, eri nga i eco va o’bukuru sanduku Yehovani ma drilia kpere ondresi, eri’i ’ba ’wara Israelini ’diyi pie; yi nga irifura omvu yi ma dria.

⁷Te Yosua nga ’yo, Wa wo, Opi Yehova la! mi ozo ndra ’ba ’diyi Yoridaniarisi a’di ma e’yosi ya, ama fezu ’ba Amorini ma dria, ama dri jazu ’doni ya? Ama ka ndra a’i ovuzu Yoridani tia ’aa’dasi ’dale ba fo!

⁸Opi la, ma ma ’yo ngoni ya? a’disiku Israeli yi oja nguku juruveleru ’bo!

⁹Te ’ba Kananini, angu e’ipi ’dia ’diyi be dria, yini ngaria eriria, yi nga ama ace, yi ma fe ru amanini avizu nyakuarisi ra. Te mi’ini, mi nga ’ye ngoni ru mini amboruri ma e’yosi ya?

¹⁰Te Yehova nga ’yo Yosua ma tia kini, Mi enga, mini mi ecozu o’bukuru ’doniri efini ngoni ya?

¹¹Israeli eza ’bo; ada, yi eza aziza mani mani azile yi driri ’bo; yi o’du afa trile tri ’diyi ma azi; yi ogu eri ra, yi oci e’yoni ci, afa nde o’bazu afazu yini ’diyi ma eselia.

¹²E’yo ’disi anzi Israelini econi di ani pa sozaru juru yini ma milia ku; fe di ani yini yi ma nguku ojazu juru yini vu’i ’di, a’disiku yi otri yi ceni otritasi. Ma ngani ovu emi be dika ku, pe lu emi ka afa trile triri ma dri ja emi eseliarisi ra.

¹³Ali enga uru, mi ma ede ’ba ’diyi alaru, ’yozu yi tia, Emi ’ba emi alaru dru ma e’yosi; a’disiku Yehova, Mungu Israeliniri ’yo ’dini, Afa trile triri emi eselia indi, Israeli la; emi eco pa sozaru juru emini ma milia ku, kpere emini ngaria afa trile triri nzeria emi eseliaria.

¹⁴E’yo ’disi o’bitisi yi nga emi osi ogogo suruti vusi suruti vusi ’doa; te eri nga eca ’dini, suruti nde Yehovani ngale bileri nga esi ogogo ori’ba vusi ori’ba vusi; te ori’ba Yehovani ngale bileri nga esi ogogo jo vusi jo vusi; te jo Yehovani ngale bileri, ’bani yi nga esi ogogo alu alu.

¹⁵Te eri nga eca ’dini, ’ba nde ngapi ovupi bizaru e’yo trileri beri, eri nga ovu evezaru acisi, eri’i afa erini be dria, a’disiku erini aziza Yehovani ezale, vini e’yo azazaru ’yele Israeli ma eselia indirisi.

¹⁶Drusi ’dini Yosua enga drio drio, eri osi Israeli ogogo suruti vusi suruti vusi; suruti Yudani nga ovu bizaruni;

¹⁷erini suruti Yudani ’diyi ejiria, eri nga ori’ba Zera vileri bi’i; erini ori’ba nde Zeraniri ejiria alu alu, eri nga Zabidini bi ra;

¹⁸erini ’ba eri vile akua ’diyi ejiria alu alu, bi Zabidi Zera mvi ma mvi Karimi ma mvi Akanini, suru Yudaniri.

¹⁹Yosua ’yo ani Akani tia, Mva mani, ma zi mi tia, mi fe diza Yehova Mungu ’ba Israeliniri dri, mi e’da e’yoni eri vu indi; mi ma ece ma dri e’yo mini ’yeleri; mi ma oci e’yo masi ku.

²⁰Akani omvi e’yo Yosua ria, ’yo ra, Adaru ma eza Yehova Mungu Israelini vu ’bo, ma ’ye ’dini ’dini:

²¹mani bongo ’beza onyi be Babuloniniri ndreria afa opale ombaa ’diyi ma eselia, sekeli dahaburu turu iri pie, onzi meleru nzizani sekeli kali towiri pie, yi ma li nga fi ma asia, ma nga yi o’du ra; te mi ndre, yi ovu zizaru nyakua hema mani ma alia, dahabu indi etinialeru.

²²Yosua nga ’ba ti pe, yi nga nzu hema nderia; azini mi ndre, afa ’diyi ovu zizaru hema erini ma alia, dahabu indi etinialeru.

²³Yi nga yi o’du hema aliarisi yi jizu Yosua vu, anzi Israelini vu dria indi; yi nga yi o’ba ’daa Yehova ma milia.

²⁴Vutinia Yosua pi ’ba Israelini pie dria eri be tualu, yi nga Akani Zera mvini ’du, tualu dahabu pie, bongo ’beza pie, onzi meleru pie, agianzi erini pie, ezoanzi erini pie, ti erini pie, akanya erini pie, kabilo erini pie, hema erini pie, afa erini ovuzu yi be ’diyi pie dria; yi nga yi ji E’bu Akorinia.

²⁵’Daa Yosua nga ’yo kini, Mi ecandi ama ’dini a’disi ya? Yehovani nga mi ecandi o’du andru ’dorisi indio Anzi Israelini dria nga di eri o’be onisi; yi ve yi acisi, o’be yi onisi indio.

²⁶Vilerisi yi nga oni odro nguru eri dria, eri ani indi kpere o’du andru ’dorisi; Yehova ku di ani aoko erini aciruri ra. E’yo ’disi yi nga e’bu ’dari omve E’bu Akoriniecazu kpere andru.