Read lugbara Yosua 8 Bible Online

Yosua 8 - lugbara bible

Yosua 8

¹Vilerisi Yehova ’yo Yosua ma tia, Mi ru ku, mi asi ma oti ku indi; mi ma ’du ’ba ombani ’diyi dria muzu mi be, te mi nga, mi tu Aja; mi ne, ma fe opi Ajari pi mi dria ’bo, ’ba erini ’diyi pie, aku erini pie, angu erini pie dria;

²te mi ma ’ye Aini opi erini be, kile mini ndra Yerikoni ’yele opi erini berile, te afa alenia opale ’diyi, tualu anyapa yini akua ’diyi be, emi nga yi o’du emi ngulupi dri afa emini opale ’diyiru; mi ma ’ba asikari azini zizaru yi mbazu, aku! nde ma ngukualeru ci.

³Yosua nga di enga, ’ba ombaru ’diyi be dria, tuzu Aja; Yosua ope ’ba alifu kali na, ’ba okporu a’di ’dizu ’diyi, nga yi ti pe muzu inisi.

⁴Eri nga yi azi ra kini, Emi lu, emi ma zi emi aku ’diri kalaa vutinialeru eri mbazu; emi ma mu aku nde be re tu ku, te emi dria ma ovu ngonde;

⁵te ma’i, tualu ’ba ma vu ’diyi be dria, ama nga esi aku nde vu inyia. Te eri nga eca ’dini, yini ngaria furia omba ’bazu ama be, pamileko i okorisi, ama nga apa yisi ra;

⁶bani yini ngazu efuzu ama vutia, ecazu kpere amani yi esezu aku be re; a’disi ya, yi nga ’yo ra, Yi apa amasi kile okorile. ’Dini ama nga apa yisi apa apa;

⁷te emi’i emini di ngaria engaria pari emini emi zizuria, emi nga aku nderi pa; a’disiku Yehova Mungu emini nga eri fe emi dria,

⁸Eri nga eca ovu ’dini, emini ngaria aku paria ’borisi, emi ma eve aku nde acisi, ’yezu ekile Yehovani ’yolerile.

⁹Yosua nga di yi ti pe; yi nga mu pari yi zizuria, yi nga te Beteli pi ma eselia Ai be, kala Aini etuni ’derialeruria; te Yosua nga la ini ’dasi ’ba ma eselia.

¹⁰Drusi ’dini Yosua nga enga drio drio, eri nga ’ba ongulumuru oku, vutinia eri nga tu, eri’i tualu ’ba ’wara Israelini be, ’ba drilia muzu Aja.

¹¹Azini ’ba dria, yi ’ba a’di ’dipi ovupi eri be ’diyi, yi tu uru, esi ogogo ca aku nde ma drilia, yi nga yi ma hema aso Ai ma kala andraleruria; isu de yi ma esele Ai beria e’bu ci.

¹²Eri nga ’ba ’du ekile alifu towile, eri nga yi ’ba ku pari yi zizu Beteli pi ma eselia Ai be, aku ma kala etuni’derialeruria.

¹³Yi nga di ’ba nde oti yi paria ’dini, yi asikari ongulumuru dria ovupi aku nde ma kala andraleruria ’diyi pi, ’ba yi mbapi zizaru aku kala etuni ’dezurialeru ’diyi be. Te ini ’dasi Yosua nga mu fi e’bu ma alia.

¹⁴Eri nga eca ’dini, opi Ajari ka e’yo nderi ndre ra, eri’i ’ba aku ndea ’diyi be yi ’ye mbele mbele, yi enga o’biti drio drio muzu ’ba Israelini vu a’di ’dizu yi be, eri’i ’ba erini be dria, etu yini pelerisi, Araba ma drilia; te eri nini kini ’ba yi zipi eri mbapi aku ma ngukualeru ’diyi indi ’diniri ku.

¹⁵Te Yosua pi ’ba Israelini be dria, yi ’ye ekile ’ba ndele ombaa ’bo ’diyile yi drilia, yi nzu vini indi geri muzu rokoaleruria.

¹⁶Te yi nga ’ba dria ovupi aku nde alia ’diyi oku muzu yi vuti drozu; yi nga di Yosua ma vuti dro, ’ba nga yi drile se ani aku yiniri be ziri.

¹⁷’Ba aluani acepi Aja kani Betelia fupi Israeli ma vuti dropi kuni yo; yi ku akutile mgboru, yi ri Israeli ma vuti dro’i.

¹⁸Yehova nga ’yo ani Yosua tia kini, Mi eju aju ovupi mi driari Ai vuleru; a’disiku ma nga eri fe mi dria. Yosua nga aju i driari eju aku nde vuleru ani.

¹⁹Erini i dri ejuria ’boria, coti ’ba te yi ozipi ’diyi enga mbele pari yiniriarisi, nga nzu fi aku alia, nga eri pa ra; yi nga ’ye mbele mbele eri evezu acisi.

²⁰’Ba Aini yini yi ojaria angu ndreria yi vutia, yi lu, te mi ne, acika akuniri tu ’bua uru; te okpo yini nzuzu ’dole kani ’dale yo, coti ’ba te apapi rokoa ’diyi nga yi oja ’ba te yi dropi ’diyi vu.

²¹Yosua piyi ’ba Israelini ’diyi be dria ka ndre ’ba yi ozipi ’diyi pa aku ’bo, azini acika akuniri tu uru indi, yi nga yi oja dika, yi nga ’ba Aini fu.

²²Azini ’ba nde ’dayi nga efu vini aku ma eseliarisi, yi nga omba ’ba yi be; ’dini ’ba ’diyi yi ovu ’ba Israelini ma eselia, ’ba azini ’diyi ’dale, ’ba azini ’diyi ’dole; yi nga yi ofu ra, ’ba aluni acepi i papi rani yo.

²³Te yi nga opi Aini bi ji idriru ’dani, ji Yosua vu.

²⁴Eri nga di eca ’dini, ’ba Israelini ka de ’ba Aini ’diyi ofu dria pari yini yi drozuria amve kani roko dria ’dinile, azini yini ovuria fuzaru dria sei si cizarurisi kpere yini deria teketeke ’bo, ’dini ’ba Israelini dria nga mvi Aja, nga yi ofu seisi ndo.

²⁵Yi’i dria ovupi fuzaru o’du ’dasi agupi oku pie ’diyi, yi alifu mudri drini iri; ’ba Aini ’diyi odra di dria.

²⁶A’disiku Yosua omvini i dri te aju ejuzuri ku de nga eri jani ’ba Aini ma dri teketeke ku.

²⁷’Ba Israelini opa kiri anyapa aku ndea afa azini ’diyi be a’dule, afa yiniru, ekile Yehovani azile Yosua tiarile.

²⁸Yosua nga di aku Aini eve teketeke ra, eri nga eri oja andruru, eri nga kiri ngururu ’dani kpere andru.

²⁹Eri nga opi Ainiri ’i pati sia eri kuzu ’daa kpere ondresi; te etuni ’deria ’boria Yosua nga azi yi ma osi avu erini pati siarisi va, ma ’ba eri pari fizu aku ma kalitilealaruria, vilerisi yi nga oni odro drinia nguru, eri ani kpere andru indi.

³⁰Eri nga eca ’dini, Yosua nga pari edetani si Yehova Mungu Israeliniri dri oni Ebali ma dria,

³¹ekile Musa ati’bo Yehovanini ndra azile anzi sraelini ma tiarile, ekile erini ovule sizaru azita Musani ma aliarile, eri ede pari edetani oni onzele pi pi ’bani opale ayasi ku ’diyisi; yi nga anyapa fe edetaru Yehova dri evezaru, yi nga vini edeta asi anzuruni ’diyi fe drinia indio

³²Te pari ’daa eri nga azita Musaniri ma siza iriri si oni nde ma dria, erini sile anzi Israelini ma miliari.

³³Anzi Israelini dria, emunyale piyi tualu angu e’ipi be, ’ba ’wara yini pie, ’ba yi dri cepi ’diyi pie, ’ba e’yo yini lipi ’diyi pie dria, oso pa sanduku ma kala ’doleria azini kala ’daleria, ’ba edeta edepi ’ba Levini sanduku aziza Yehovanirini ’dupi ’diyi ma drilia; yi ma azini co ti oni Gerizimu vuleru, ali azini co ti oni Ebali vuleru; ekile Musa ati’bo Yehovani erini ndra azilerile, yi ma fe asi ndriza ’ba Israelini dri oko.

³⁴Vilerisi eri nga azita ma e’yo la dria, asi ndriza pi tritani be tro tro, ekile yini ovule sizaru buku azitani ma aliarile dria.

³⁵E’yo dria Musani azile ’diyi ma alia e’yo azini Yosuani lale anzi Israelini ma bilia okuta yiniria kuni yo, yi’i oku yipi pie, anzi yini pie, omu yini emupi ’a’api yi be ’diyi pie dria.