Read lugbara Yosua 9 Bible Online

Yosua 9 - lugbara bible

Yosua 9

¹Opi ovupi Yoridani tia ’aa’dasi, angu oni driari pia angu senderuri pie, miri amboru Lebanoni ma drilialeruri ma tiari pie ’diyi, ’ba Hitini pie, ’ba Amorini pie, ’ba Kananini pie, ’ba Perizini pie, ’ba Hivini pie, ’ba Yebusini pie dria ka e’yo ’diyi eri ra,

²yi nga yi ti oku tualu omba ’bazu Yosua vu ’ba Israelini be asi alusi.

³Te ’ba Gibeonia ’diyi ka e’yo Yosuani ’yele Yeriko pi vu Ai beri eri ra,

⁴yi nga e’yo ’ye lokirisi, yi mu yi ojazu ekile yi ojionile, yi nga jurua deza o’du akanya yini ma dria, yi enyiriko patiefi su osuzu ’diyi o’du irikoru yi osipi ra yini mileni ecile eci ’diyi,

⁵paa yi nga enyiriko deza osu’i ecizaru indi, ruaa yi bongo iriko ’diyi osu’i; enya yini muzu yi be aciari ’wi dria a’buzaru.

⁶Vilerisi yi nga dri ko mu Yosua vu, pari yini hema asozu Giligaliaria, yi nga ’yo eri tia ’ba Israelini be, Ama enga angu ziria; e’yo ’disi emi azi di aziza ama be fo.

⁷’Ba Israelini omvi e’yo ’ba Hivini ’diyi ma tia kini, Kani emi adri ovu ama eselia ’doa yani ’dele ’di; ka’dinile ama nga eco aziza azi emi be ngoni ngoni ya?

⁸Yi ’yo Yosua tia, Ama’i ama ati’ba mini. Yosua nga yi zi, Emi a’dikoni ya? Emi enga ngoa ya?

⁹Yi nga ’yo eri tia, Ati’ba mini yi enga angu ziria tu, ama emu amani Yehova Mungu mini ma ru erilerisi; amani e’yo kuzani pi erile, e’yo dria erini ’yele angu Misiria ’diyi pie indirisi,

¹⁰amani e’yo dria erini ’yele opi Amorini iri ndra ovupi Yoridani tia ’aa’dasi ’daa ’diyi vuri erilerisi, yi Sihoni opi Hesiboniari pi Ogi opi Basani Asitarotiari be.

¹¹Ka’dinile ’ba ’wara amani ’ba ama vile angua ’diyi be dria yi nga ’yo ama tia kini, Emi ma ’du nyaka emini gerini ’diyi emi dria, emi ma mu dri fu yi be, emi ’yo yi tia, Ama’i ama ati’ba emini; emi ma azi di e’yo aziza ama be fo!

¹²Enya amani ’diri, ama o’du ndra aci be ama vile joarisi, ovuzu nyaka amani aciniriru, o’du amani aci e’dozu emuzu emi vu ’darisi; curu’do emi lu, ’wi ra, a’bu ’bo!

¹³Enyiriko patiefi suni ’diyi amani patiefi su osuria yi ma alia tre ’diyi, yi ndra vini o’diru, te emi lu, yi curu’do asizaru asizaru. Bongo amani ’diyi indi de ra, enyiriko amani paa ’diyi be, gerini ovule re turi dri.

¹⁴Ani ’ba Israelini ’du nyaka yini ma azi o’bi ra, awini e’yo zi Yehova tia ku.

¹⁵Vilerisi Yosua nga e’yo asi anzuruni ede yi be, aziza azizu yi ta mbazu idriru; ’ba ’wara ’ba ongulumuru ma drilia ’diyi so oyo yisi tro tro ’dini.

¹⁶Te eri nga eca ’dini o’du nani agaria yini aziza aziria yi be ’boria, yi eri kini de ’di ’ba ’diyi yi ’ba ovupi va yi ma jo ejelea, ’ba yi ngulupini ’a’azu yi ma eselia’diyi.

¹⁷Te anzi Israelini aci ra, yi eca aku yini ambo ambo ’diyia o’du ma ma vutia. Isu de aku ambo ambo yini ’diyi yi ’di: Gibeoni, pi: Kefira pi, Beeroti pi, Kiriati-yearimu pie.

¹⁸Te anzi Israelini funi yi ku, a’disiku ’ba ’wara ’ba ongulumuru ma drilia ’diyi so ndra oyo yisi Yehova Mungu Israeliniri ma rusi ’bo. Te ’ba ongulumuru dria yi one ’ba ’wara ’diyi ma dria.

¹⁹Te ’ba ’wara ’diyi dria ’yo ’ba ongulumuru dria tia, Ama so oyo yisi Yehova Mungu Israeliniri ma rusi ’bo; ka’dinile ama ma elo yi ma ruaa ku.

²⁰Ama nga e’yo ’diri ’ye yi dri; ama nga ku yi ma ovu, adra kazu ’dezu ama dria ku, a’disiku oyo amani sole yisiri ma e’yosi.

²¹’Ba ’wara ’yo yi tia kini, Emi ku yi ma jovu idriru; te yi ma ovu ’ba eja osipi, ’ba yi okopi ’ba ongulumuru dria dri ’diyiru; ’ba ’warani azile yi ma tiarile.

²²Yosua nga di yi omve ’yo yi tia kini, Emi ici ama lokirisi ’dini a’disi ya, kini, Ama emi be ziri tu; de ’di emi ama eselia?

²³Ka’dini emi ovu di trizaru, emi ma azi aluani ngani ece ovuzu ati’boru, kani eja osizu, kani yi ekozu Mungu mani ma joa ku.

²⁴Te yi omvi e’yo Yosua tia, ’yo ra, A’disiku yi olu ama tia ndi ndi e’yo Yehova Mungu minini e’yo azizu Musa ati’bo erini ma tia angu fezu dria emi dri, ’ba alenia ’diyi dri jazu dria emi miliarisiri ra; e’yo ’disi ama ovu urisi tu emisi idri amani ma e’yosi, ama ’ye ani e’yo ’diyi ’dini ani.

²⁵Te di, mi lu, ama ovu mi dria: erini e’dale onyiru azini ’yeke mi milia ’yezu ama vurile, mi ’ye.

²⁶Ani, ’ye yi vu ’dini, opa yi anzi Israelini a driarisi ra, kini ma oli yi ku.

²⁷O’du ’dasi Yosua nga di yi o’ba eja osizu azini yi ekozu ’ba ongulumuru dri azini pari edeta edezu Yehovaniria, ecazu kpere andru, pari erini ngale peleria.