Read lugbara 1 Timoteo 2 Bible Online

1 Timoteo 2 - lugbara bible

1 Timoteo 2

¹E’yo ’dirisi ma azi okorisi, matu, ’baza pi ’yozu ’ba driasi, zi ziza pie, awa’difo feza pie,

²opi piyisi, ’ba dria ovupi ’ba drilia ’diyi pie, kini ama ma adri e’yereru be azini asi anzuru alia, adriza ’bani ani Mungu inzizurisi inzita be dria.

³’Diri ovu onyiru azini a’izaru Mungu ama,apiri,ma milia,

⁴lepi ’ba dria ma ovu pazaru, azini yi ma eca e’yo adaru nizuri.

⁵A’disiku Mungu ovu alu, azini ’ba ’ba ecipi Mungu be tualori eri alu indi, eri’i eri ’bani, Kristo Yesu’i,

⁶eri i ngulupi fepi arotiru ’ba dria onzezuri; e’yo eti nzezaniri ovu kuzaru ewunini dri furia,

⁷’Ba ma e’yo ’diri oluzu ojiouru azini ’ba ti peleriru (ma ’yo e’yo adaru, ma lini inzo ku), ’ba ’ba jururu ’diyi, imbapi, a’ita ma alia azini e’yo adaru ma aliariru.

⁸E’yo ’dirisi ma le ’ba agupiru ’diyi ma zi Mungu pari dri dria, dri lalatararu ejuzu uru, adra kokoru azini agata gaza kokoru;

⁹dinile Oku ma ede yi rua afa suza ’yekerisi, drinza onyiru pisi asi e’yereri be; dri’bi cazasi ku, kani melesi, kani nyorosi, kani bongo aje nyapi ambo’rurisi ku indi,

¹⁰te ’yeta onyiru ’diyisi, a’disiku e’yo ’diyi si oku e’dapi yi ’ba Mungu inzipi ’diyiru ’diyi si si.

¹¹Oku ma oni e’yo asi i e’yeresi inzita dria ma alia.

¹²Te ma a’ini oku ma imba ’ba ku, eri ma ce agupi ma dri ku; te eri ma ovu je,yere.

¹³’Ba ndra Adamuni oko, vilerisi Eva’i;

¹⁴icini ndra Adamuni ku, te oku nde ovupi icizaruri e’de lezata ma aliani.

¹⁵Te eri nga ovu pazaru e’yo mva osizanisi, yi ka ovu a’ita pi ma alia ’dani, leta pie, asi alatararu pie, asi e’yeresi.