Read lugbara 1 Timoteo 5 Bible Online

1 Timoteo 5 - lugbara bible

1 Timoteo 5

¹Mi ega mbazau ma dria ku, te mi tori eri ma asi ekile atale; karile ekile adripile,

²oku ’wara ’diyi ekile andripile, oku o’di ’diyi ekile amvipile, asi alarusi dria,

³Mi inzi awuzi ovupi awuzi adaru ’diyi.

⁴Te awuzi ka ovu anzi be, kani anzi ’diyi ma anzi be, yi ma ni okorisi ’ba yi vile akua ’diyi inzizu, azini aroti ofezu ’ba yi tipi ’diyi dri; ’di ovu onyiru Mungu ma milia.

⁵Te awuzi ovupi awuzi adaru, kule a’duleri, ’ba i asi Mungu vu asi tezasi, ovu ’dani matu ’bazu azini Mungu zizu inisi etusi;

⁶te awuziou asi ’bapi ayiko nyakuni ma driari dra ’bo, ka tro ovu idriru ti.

⁷Mi ma azi e’yo ’diyi, ’ba ma ovu ani asu kokoru.

⁸Te ’ba azini ka ’ba ini ’diyi ma aza ko afasi ku, tuni ’ba eri vile akua ’diyi, ka’dini eri ga a’ita nderi si, onzi erini aga ’ba a’ipi kuriniri ra.

⁹’Ba aluni ma ovu sizaru awuziru ku de nga eli erini cani kali azia ku, de eri ndra oku agupi aluni

¹⁰’ba ka eri ma e’yo eti nze onyiru, eri ka ndra anzi ini ezo onyiru, ka ndra omu a’i wa’diru, ka ndra ’ba alatararu ma pa oji, ka ndra ’ba inzale ’diyi ma aza ko, ka ndra ’yeta onyiru ma vuti bi e’yo driasi.

¹¹Te mi ma ga awuzi o’diru ’diyi ma ru i siko si, a’disiku yi ka ca ovuzu asi mbaza be Kristo gazu yi nga le mu agupia,

¹²te yi nga e’yo liza isu yini a’ita yini okori ’belerisi.

¹³Azini vini yi nga eca ovuouru, acizu saaru saaru aku tiasi aku tiasi; ovouru a’dule ku, te ’ba ru ezapi e’yo osupi ’ba ma eselia, e’yo dri fupi ku ’diyi o’yopi ’diyiru.

¹⁴E’yo ’dirisi ma le awuzi o’diro ’diyi ma mu agupia, ma oti anzi, ma te aku yini ma agei, ma fe ari’bo dri pari o’data o’dazu ku,

¹⁵A’disiku ’ba azini oja yi vile curu’do Satani ma vuti bizu ’bo.

¹⁶Oku alu a’ipiri ka ovu awuzi be, eri ma ko yi aza afasi eri’i, e’yoni kazu ovuzu nzizaru kanisa dri ku; kanisa ma ko ani awuzi ovupi awuzi adadaru ’diyi ma aza’i.

¹⁷’Ba ma la ’ba ’wara ’ba dri cepi onyiru ’diyi fudri inzita isuzu pale iri, tuni ’ba azi ngapi e’yo oluza pisi imbata be ’diyi;

¹⁸’dini e’yo siza ’yo ra, Mi ma ombe ranya ma ti erini anya turia ku, azini dika, ’Ba azi ngapiri fu dri oya erini a’izu ra.

¹⁹Mi ma a’i asu sule ’ba ’wara azini ma ruaari ku, pe kiri ’ba e’yo eti nzepi iri kani na ’diyi ma e’yosi.

²⁰Mi ma ega ’ba e’yo ezapi ’diyi ma dria ’ba dria ma milia, ’dini ’ba azini acepi ’diyi ma ovu urisi beni,

²¹Ma azi mi tia Mungu ma milia, Kristo Yesu ma milia, azini malaika erini opele ’diyi ma milia indi, mi ma mba e’yo ’diyi ma ta, mi ma li e’yo eti erikokoru ku, mi ma ’ye e’yo aluni ’ba opezasi ku.

²²Mi ti mi dri ’ba ma dria mbele ku, mi ma fi e’yo onzi ’ba azinini ma alia ku; mi mba mi ma ta ovuzu alaru ’dani.

²³Mi mvu yi a’dule dika ku, te mi mvu patiefi ma su were, azo mi lalia mi ’yepi dika dikarisi.

²⁴E’yo onzi ’ba azinini ’diyi e’da Yi ’ba ma milia, acizu yi ma drilia e’yo liza vu, te ’ba azinini ’diyi bi yi ma vuti vilerisi.

²⁵’Dinile azi,onyiru e’da yi ’ba ma milia indi; te ovupi ’dinile ku ’diyi, econi yi zizaru ku.