Read lugbara Tito 2 Bible Online

Tito 2 - lugbara bible

Tito 2

¹Te mi’i, mi ’yo e’yo yi sipi imbata alaruri be ’diyi,

²Mi ma imba ’ba ’wara agupiru ’diyi ovuzu mile be yi agei tezu e’yo driasi, inzita i be, asi e’yere be, ovuzu okporu a’itai pi ma alia, leta pie, asi teza pie.

³Mi ma azi oku wara ’diyi ’dinile indi, acita yini ma si i ekile ’ba alaru ’diyinirile, yi ma di ’ba ma aji ku, yi, ma ovu ewa ma ati’baru ku; te yi ma ovu ’ba e’yo onyiru imbapi ’diyiru;

⁴yi ma imba ani oku o’diru ’diyi, agupi yini lezu avasi anzi yini be,

⁵yi ma ovu asi e’yere be, alaru, ’ba aku yini ma azi ngapi ’diyi, ovuzu asi onyiru be, agupi yi ma ngulupini ma e’yo inzizu, ’ba kazu e’yo Munguni o’dazu ku.

⁶Mi ma imba agupi o’diru ’diyi ’dinile indi oyuzu asi e’yere be.

⁷E’yo dria ma alia mi ma ece mi ngulupi ovuzu eceta ’yeta onyiruniriru, imbata mini alia mi ma ece e’yo lokiri kokoruri pi, e’yo inzitaruri pie,

⁸e’yo cluza alaru ’bani ecole onzozaru kuri pie, ’dini drinza ma bi ’ba ’ba dri arupiri ani, erini ovule e’yo onzi be ’yozaru ama dria aluni kurisi.

⁹Mi ma imba ati’ba opi yini inzizu, ayiko fezu yi dri e’yo driasi; yi ma omvi e’yo agatasi ku,

¹⁰yi ma ovu drisisi be ku, te yi ma ece asi adaru e’yo driasi, ifezu imbata Mungu ama Papirini i e’dazu ani ndrizaru e’yo dria ma alia.

¹¹Te ’yeta anzutiri e’da i ’bo, pata ejizu ’ba dria dri,

¹²ama imbazu ama ma ga adriza onzi amani ani Mungu inzizu kuri pi, u nyakuniri be, ama ma ovu wudrikuru curu’dori ma alia asi e’yeresi, e’yo kililiruri pie, adriza amani ani Mungu inzizuri pie;

¹³ama ma lu e’yo teza drilebaru amaniri vu, eri e’daza diza Mungu lamboru ama Papiri Yesu Kristoni e’dazuri’i,

¹⁴eri fe ndra i ngulupi amasi, eri ma onze ama e’yo onzi dria ma alia ani, azini eri ma oji ini ’ba ovuzu suru i ma ngulupiniriru, azi onyiru ’yezu asi driasi.

¹⁵Mi ma ’yo e’yo ’diyi; mi ma omi ’ba asi, mi ma ece e’yo kililiru,’ba dri okpo driasi. ’Ba aluni ma ’ba imi aparakaru ku.