Read lugbara 'Ba Ebraniani 13 Bible Online

'Ba Ebraniani 13 - lugbara bible

'Ba Ebraniani 13

¹Leta adripini yi lezuri ma ovu ’dani.

²Emi ma avi omu a’izu avasi wa’diru ku, te geri ’dinilerisi ’ba azini a’i mira malaika omu yiniru, nikokoru.

³Emi ma ega ’ba arujoa ’diyi ma e’yo, ekile ’ba ovupi arujoa yi be tualu ’diyile emi ma ega vini ’ba ovupi inzaza ’diyi ma e’yo, ekile emi ngulupini ovule rua berile.

⁴E’yo oku bizani ma ovu inzizaru ’ba dria ma eselia, azini e’yo agupi pini yi ecizu oku beri ma ovu ezazaru ku; a’disiku Munguni nga ’ba mile aci be ’diyi pi ma e’yo li ’ba ali o’bapi ’diyi beni.

⁵Ava silingi lezuri ma ovu emi ma asisilea ku, afa emini ovuzu yi be ’diyi ma fu dri emini ra; a’disiku eri ma ngulupi ’yo ra, Ma ngani ece mi aza kozu ku, ma ngani mi ku ku indi.

⁶Ka’dini ama ’yo ani asi tezasi, Opini ’ba ma aza kopiri, ma ngani ru ku; ’ba eco ma ruaa a’di ’yezaru ya?

⁷Emi ma ega ’ba emi dri cepi, e’yo Munguni olupi emi tia ’diyi ma e’yo; emi ma ega adriza yini ma kalati asizuri ma e’yo, emi bi a’ita yini ma vuti.

⁸Yesu Kristo ojani i ku, aje, andru, kpere ’dani ’dani.

⁹Imbata andini o’diru ndu ndu ’diyi ma se emi ku; te eri onyiru asini okpo isuzu ’yeta anzutirisi, afa nyazasi ku, ’ba acipi e’yo ’diyi ma alia ’diyi isuni ani orodri ku.

¹⁰Ama ovu pari edeta edezuri be, te ’ba bere ma azi ngapi ’diyi econi nyakaniri nyazaru ku.

¹¹Te anyapa atalau edeta edepi agapi rarini yi ma ari ejile pari alatararu ma alia edetaru e’yo onzi edezu ’diyi ma avu ovu vezaru pari hema asozuri ma tia amve.

¹²E’yo ’dirisi Yesu indi ovu ecandizaru aku tilia amve, eri ma ’ba ani ’ba alatararu i ma ngulupi ma arisi beni.

¹³E’yo ’dirisi ama ma fu eri vu pari hema asozuri ma tia amve, drinza nyazu eri be.

¹⁴Te ’doa ama ovuni aku ovupi ’dani ’daniri be ku, te ama aku ngapi ovupi ndori ndru’i.

¹⁵Yesusi ama ma ede ani edeta inzitaniri Mungu dri etuzu etuzu, ’di efi ama tile eri ma ru e’dapi ’diyini ’yaleri’i.

¹⁶Te emi ma avi e’yo onyiru ’yezu azini afa feza fezu ’ba dri ku, a’disiku Mungu le edeta awa’dinile ’diyi tu.

¹⁷Emi eri ’ba emi dri cepi ’diyi ma e’yo, emi ma ovu yi ma palaa inzitasi; yini emi orindi ma agei tele, ekile ’ba ngapi afa ma kalafe ecepi ’diyilerisi. Yi ma ’ye ’diri ayikosi, te candisi ku; yi ka ’ye candisi, ngani ovu orodriru emi dri ku.

¹⁸Emi zi Mungu amasi, te ama ni adaru ama ovu asisile alaru be, ama le acizu alaru e’yo dria ma alia.

¹⁹Ma matu ’ba emi vu aga ra emi ma ’ye ’dinile, ma ma mvi ani emi vu mbeleru beni.

²⁰Te Mungu asi anzuruni Opi amani Yesu ’ba kabilo ocepi amboro nderi engapi ’ba draza ma eselia; aziza ’dani ’daniri ma arisiri,

²¹ma ede emi ovuzo fudri ci afa onyiru driasi e’yo erini leleri ’yezu, e’yo ovupi onyiru eri ma miliari ’yezu ama alia, Yesu Kristosi; diza ma ovu eri vu ’dani ewule ewule. Amena.

²²Te ma azi emi tia, adripi, emi ma a’i e’yo asi omizani ’dori, te ma si waraga emi dri e’yo weresi ’do.

²³Emi ma ni, tru adripi amani ’Timoteoni ’bo; eri ka eca mbele, ma nga emi ndre eri be tualu.

²⁴Emi zi ’ba emi dri cepi ’diyi dria ci ci, ’ba alatararu ’diyi be dria. ’Ba engapi ’’Italiaa ’diyi zi emi ci ci.

²⁵’Yeta anzutiri ma ovu emi be dria. Amena.