Read lugbara 'Ba Ebraniani 7 Bible Online

'Ba Ebraniani 7 - lugbara bible

'Ba Ebraniani 7

¹Te Melekizedeki ’diri, opi Salemua, atalau edeta edepi Mungu Uru Turini, dri fupi Iburahimu be erini emviria yini ’ba opiru ’diyi ofuzu ’bori ma vutia, asi ndriza fepi eri dri,

²Iburahimuni vini afa dria ma esele mudri ma azi aluri awazu eri driri. Okorisi eri opi e’yo kililirurini (ru erini ma efi ’dini) azini vini eri opi Salemuari, efini opi asi anzuruni;

³ata kokoru, ayia: kokoru, a’bi kokoru, ovupi o’du erini e’dozuri be ku, azini asiza idriniri be ku indi, te ovupi ekile Mvi Mungunileri, eri ovu atalau edeta edepiriru ’dani.

⁴Te emi ega nga, ’ba ’diri ovu amboru tu ngopi, Iburahimu ama a’bi amboruni afa opaza ma esele mudri ma azi aluri fezu eri driri ya

⁵Adaru Levi ma anziyi azi edeta fedezuri bipi ’diyi ovu azita be afa ma esele mudri ma azi alu a’izu ’ba vu, adaru adripi yini vu, ekile azitani ’yolerile, ’ba nde ’diyi ka ovu Iburahimu ma orini ti.

⁶Te ’ba yini eri ma a’bi lazu yi ma eselia kuri, eri a’i afa ma esele mudri ma azi alu Iburahimu vu, azini fe asi ndriza ’ba ovupi aziza beri dri.

⁷’Ba econi agata gazaru e’yo ’dirisi ku, ’ba wereri adri asi ndriza isu ’ba ambo eri agapi rari vu.

⁸’Doa ’ba ecopi drapi ’diyi adri afa ma esele mudri ma azi aluri a’i ra; te ’dale, ’ba yini eri ma e’yo eti nzele kini eri idriruri a’ini.

⁹Azini ama eco ’yozaru, Levini indi, ’ba afa ma esele mudri ma azi alu a’ipiri fe afa ma esele mudri Ira azi alu ’bo, geri Iburahimu ma aliarisi;

¹⁰te eri ovu ndra nga i a’bi ma rua alia, de Melekizedekini dri furia eri beria.

¹¹Te azi ’ba Levini edeta edezuri ka ndra eco ’ba ’bazu dri fuzu ci (te ’ba isu ndra azita azi nde ’dirisi), ika’dini atalau edeta edepi azini efupi ekile peza Melekizedekini pezurile, i ovupi omvezaru peza Aronini pezurile kuri ma enga a’disi ya?

¹²’Di ni azi atalauni edeta edezuri ka ovu ’ojazaru, azita ma oja i indi ada.

¹³A’disiku ’ba yini e’yo ’diri ’yozu erisiri eri suru andini, te ’ba aluni engapi suru nde ’diri ma aliari azi pari edeta edezuriari ngapini yo.

¹⁴A’disiku ’ba dria ni adaru kini Opi amani enga Yuda alia; te Musa ’yoni atalau edeta edepi ’diyi ma e’yo suru nderi ma tia aluni ku.

¹⁵Te e’yo ’diri ovu nizaru onyiru aga ra, atalau edeta edepi aziniri ka enga ekile peza Melekizedekini pezurile,

¹⁶ovupi ’bazaru azita e’yo ruani azizurisi ku, te okpo idri ecopi depi kurinisiri.

¹⁷A’disiku yi nze e’yo erini ma eti ’dini, Mi ovu atalau edeta edepiriru ’dani ’dani, ekile peza Melekizedekini pezurile.

¹⁸’Dini yi ’ba azita okori tokoru erini ovule okpo kokoru azini orodri kokorurisi

¹⁹(a’disiku azita nde ’bani afa aluni dri fuzu ci kililiru ku); azini yi ofi asi teza onyiru aga ra, amani ani esizu Mungu vu ogogori.

²⁰Eri ovuni oyo soza kokoru ku.

²¹Te ’ba ’dayi oro ’bazaru atalau edeta edepi ’diyiru oyo soza kokoru, te eri’i ovu ’bazaru oyo soza be, ekile ’ba e’yo ’yopi eri ma tiarini ’yolerile, kini, Opi so oyo ’bo, eri ngani i oja ku, Mi ovu atalau edeta edepiriru ’dani ’dani.

²²Te e’yo ’dirisi Yesu eca toboru aziza agapi rari azizu.

²³Adaru atalau edeta edepi ’dayi ovu kakau, a’disiku dra oga yini ovuko ’dani ’danini;

²⁴te eri’i, erini ovule ’dani ’danirisi, eri ovu azi edeta edezu ecopi i depi kuri be.,

²⁵E’yo ’dirisi indi eri eco ’ba sipi Mungu vu ogogo erisi ’diyi opazaru teke teke, erini ovule idriru ’dani ’dani Mungu zizu yi dririsi.

²⁶Te atalau edeta edepi agapi ra ’dinileri fu dri amasi ’yeke, eri alatararu, asi onzi kokoru, ondi kokoru, i esele copi ’ba e’yo ezapi I’diyi be ndu, ovupi ’bazaru uru aga, ’bu rari.

²⁷Leni eri ma ede edeta o’du vusi o’du vusi, kile atalau edeta edepi agapi ra ’dayile, okorisi i ma ngulupi ma e’yo onzi edezu, vilerisi ’ba ma e’yo onzi edezu ndo, ’dini ku; eri ’ye ’di pale alu fudri e’yo driasi ra, erini ndra i ngulupi feria edetaro,

²⁸A’disiku azitani adri ’ba ovupi okpo kokoru.’Uyi ope ’bazu atalau edeta edepi agapi ra ’diyiru; te e’yo oyo soza nderini, ecapi azita nde ma vutiari, eri ’ba Mvi ecopi dri fupi ci kililiru ’bo ’dani ’daniruri’i.