Read lugbara 'Ba Ebraniani 8 Bible Online

'Ba Ebraniani 8 - lugbara bible

'Ba Ebraniani 8

¹’Dini e’yo amani ’yoleri ma dri ambori ’di’i: ama ovu atalau edeta edepi agapi rari be ’dinile, ripi va oguna Diza Ndrizarurini ma dri ndiria ’bua,

²ovupi atalau pari alatararuri pi ma azi ngapi, bere adaru Opini asoleni, ’bani asoleni kuri beri.

³Yi ’ba atalau edeta edepi agapi rari dria alu alu afa feza piyi fezu edeta be; e’yo ’dirisi le atalau ’diri indi ma ovu afa erini ngale feleri be.

⁴Eri ka te ovu nyakua, ngani te ovu atalau edeta edepiriru ku, a’disiku ’ba afa feza fepi kile azitani ’yolerile ’diyi yi indi.

⁵’Ba ’diyi yi eceta azini endrilendri pari ’buariniri ma azi nga; ekile Munguni Musani imbalerile, Musani ’yeria bere ederia ’dini, eri ’yo kini, Mi ndre onyiru mi ma ede afa dria ekile eceta ecele mi dri oni ma driarile.

⁶Te curu’do Kristo isu azi onyiru agapi rari ’bo, erini ovule ’ba ’ba ecipi Mungu be e’yo eciza onyiru agapi ra, azile aziza agapi ra ’diyi berisirisi.

⁷’Dini aziza okori ka ovu ezata kokoru, yi ngani ndra pari azini ndru aziza iriri ofizu ku

⁸Te erini egaria yi ma dria, eri ’yo ra kini: Emi ne, o’duni emu ra, Opi ’yo ra, o’du nde ’diyisi ma nga aziza o’diru ’ba ori’ba Israelini pi dri ori’ba Yudani be;

⁹ekile ndra mani azile yi ma a’bipi tia o’du mani yi ma dri bizu yi dri cezu yi ofuzu angu Misiriarisi ’dinile ku; te yi ovuni aziza mani ma alia ’dani ku, azini ma egani e’yo yini ku, Opi ’yo ra.

¹⁰Te aziza mani ngale azile ori’ba sraelini be o’du ’dayi ma vutiari eri ’di’i, Opi ’yo ra: Ma nga azita mani ’ba asisile yini ma alia, ma nga yi si yi ma asia; ma nga ovu Mungu yini, yi nga ovu ’ba mani.

¹¹Yi alu alu ngani ’ba eri vile akuari imba ku, yi alu alu ngani vini adripi yini imba ku, kini, Mi ma ni Opini; a’disiku yi driani ngale ma nile rarisi, engazu ’ba were turi vu cazu ’ba yini ’wara agapiri vu.

¹²A’disiku mani ngale yiki ’bale e’yo onzi yinisirisi, te ma ngani yi ma ezata ega dika ku.

¹³Erini ’yoria, Aziza o’diru, ’dinile, eri ’ba aziza okori okuru ’bo. Te afa i ojapi okuru azini ecapi dezaruri, ace were eri nga avi ra.