Read lugbara 'Ba Ebraniani 9 Bible Online

'Ba Ebraniani 9 - lugbara bible

'Ba Ebraniani 9

¹Te aziza okori ovu azita be azi inzitaniri azizu, azini eri ovu pari alatararu; nyaku ’doriari be.

²A’disiku yi ede bere okori, alenia tala pati indi, mesa pie, mikate ecetaruri pie; omve eri Pari Alatararuri’i.

³Te bongo jo ale iriri alizuri ma alialeru, bere omvele Pari Alatararu Agapi Turi indi;

⁴eri ma alia pari meleru obiese vezuri pi indi, sanduku azizani ruani a’bule melesi ciri be, sanduku nde ma alia imvu meleru ovupi mana beri pi indi kali Aronini bi idipiri pie, oni ’bararu azizani ’diyi pie;

⁵azini eri ma drilia uruleru kerubi dizani indi, endri fezu oguna yikiniri ma dria. Te afa ’diyi ma e’yo ama econi ’yozaru curu’do alu alu ku.

⁶Afa ’diyi ovu edezaru ’dinile ’bo, atalau edeta edepi ’diyi adri fi bere okori ma alia o’du dria, azi inzitani ’yezu;

⁷te bere iriri ma alia kiri atalau edeta edepi agapi rari fi, pale alu eli vusini, fini vini ari kokoru ku, te eri adri ari fe edetaru i ma ngulupisi azini ezata ’ba driani ma e’yosi indi.

⁸Orindi Alatararurini e’yo ’diri eceria ’dini, kini geri fizu pari alatararu ma aliari ovuni nga ecezaru ku, de bere okorini nga pa soria ’dani

⁹(’di ovu ecetaru ewu curu’dorisi). Bere ’diri ma alia yi adri afa feza piyi fe edeta be, te edeta ’diyi econi ’ba Mungu inzipiri ma asisile i ma e’yo onzi nizuri ’bazaru dri fuzu ci ku,

¹⁰a’disiku azita ’diyi ovu azizaru e’yo ruanisi a’dule, nyaka pi ma e’yo azizu, afa mvuza pie, ojiza ndu ndu ’diyi pie, ovupi azizaru de nga yi edeni e’yo o’diru ku’diyi.

¹¹Te Kristo ecea ’bo, eri atalau edeta edepi agapi ra e’yo onyiru ngapi ecapi ’diyiniri, eri fi pale alu iriti Pari Alatararuri ma alia, agazu bere ovupi amboru azini dri fupi ci agapi tu, ’bani edele drisi kuri ma aliasi (efini, ovuni bere nyaku ’doriari ku)

¹²eri fini ndri ma arisi ku, kani koanzi ma arisi ku, te i ma ngulupi ma arisi, erini onzeza ’ba otruzu kpere ’dani ’dani isuria ’boo

¹³Te ndri pi ma ari monio be, azini of uta tikarini cole ’ba alatara kokoru di yi ma ruaari ka eco yi ’bazaru alaru ondi ruanisi,

¹⁴ka’dini Kristo i ma ngulupi fepi edetaru ezata kokoru Mungu dri Orindi ’dani ’danirisiri ma arini nga asisile emini e’yo onzi nizuri ’ba alaru, emini azi dratani kuzu azi inzitani ngazu Mungu idriruri dri aga ra ku ya?

¹⁵E’yo ’dirisi eri ovu ’ba ’ba ecipi Mungu be e’yo aziza o’dirurisiri, te ’ba aluni drale e’yo onzi ovupi ’yezaru aziza okori ma palaa ’diyi ma arioti ofezurisi, ’ba ovupi omvezaru ’diyi ma isu aziza awita ’dani ’danirini.

¹⁶Te aziza afa awazuri ka ovu indi, ma ni ’ba afa azipiri ma drata oko.

¹⁷A’disiku aziza afa awazuri ovu okpo be kiri ’ba nderini drale ’borisi, te eri ovu okpo kokoru de nga ’ba eri azipirini ovuria idriru.

¹⁸E’yo ’dirisi e’yo aziza okori indi ovuni e’dozaru ari kokoru ku.

¹⁹’Dini Musa ka de azita dria oluzu ’ba dria ma tia ekile azitani ’yolerile ’bo, eri ’du koanzi ma ari, ndri ma ari pie, kabilo ’biko ekaruri pie, ediko bi pie, eri oya eri ani buku nde ma dria azini ’ba nde ma dria dria,

²⁰kini, ’Di ovu ari e’yo aziza Munguni azile emi vurini.

²¹’Dinile eri oya ari bere pi ma dria, afazu dria azi inzitani ngazu ’diyi be.

²²Azini ekile azitani ’yolerile, ecea ogogo afa dria ovu ’bazaru alaru arisi, azini ari raza kokoru wutani yo.

²³E’yo ’dirisi le eceta afa ’bua ’diyini ma ovu ’bazaru alaru edeta ’diyisi, te le afa ’bua ’diyi ma ngulupi ma ovu ’bazaru alaru edeta afa ’diyi agapi ra ’diyisi.

²⁴A’disiku Kristo fini pari alatararu edele drisi ovupi ecetaru pari adaruri ecezuria ku, te eri fi ’bu adaria, i e’dazu curu’do Mungu ma milia amasi.

²⁵Fini i ma ngulupi fezu edetaru pale kakau, ekile atalau edeta edepi agapi rarini file Pari Alatararuri ma alia eli vusi eli vusi, ari ovupi eriniru kuri berile ku;

²⁶ka ndra ovu ’dini, te’do isu leri ovu eceandizaru pale kakau engazu ewu nyaku eti ’bazuria. Te curu’do eri e’da di i ’bo pale alu ewuni asizuria, e’vo onzi wuzu erini i ma ngulupi fe edetaru’irisi.

²⁷Azini ekile erini ovule ’bazaru ’ba dri drazu pale alu, vurinia fizu e’yo liza ma aliarile,

²⁸dinile Kristo indi, ovuPi fezaru edetaru pale alu ’ba kakau ma e’yo onzi ’duze, nga i e’da pale liririsi, ezata kokoru, pata ejizu ’ba eri ma dri tepi ’divi dri.