Read lugbara Yakoboni 1 Bible Online

Yakoboni 1 - lugbara bible

Yakoboni 1

¹Yakobo, ati’bo Munguni azini Opi Yesu Kristoniri, Suru mudri drini iri yi erepi ndu ndu ’diyi vu: Ma zi emi ci ci,

²Emi ka ovu obeta ndu ndu ma alia, ma adripi, e’yo ’diri ma ovu emi dri ayikoru,

³emini niria o’biza a’ita emini o’bizuri eri asi teza eji.

⁴Emi ku asi teza ma de azi ini dri fuzu ’yeke, emi ma ovu ani fudri ci afa dria be ’yeke, emini ani ecezu e’yo alunisi ku.

⁵Te ’ba azini emi eselia ka ece onduasi ra, eri ma zi Mungu afa fepi ’ba dria dri avasi, egapi ’ba dria kuri ma tia, eri nga ovu fezaro eri dri.

⁶Te eri ma zi a’itasi, abaza kokoru, te ’ba asisile abaza beri si ekile yi mbuza mirini olini drole azini adile ’dale’dolerile.

⁷Agu nderi ma ega, i asia kini i nga afa azini isu Opi dri, ’dini ku;

⁸eri ’ba asi iri be, oyapi oya geri ini ma aliasi driari’i.

⁹Te adripi valeruri ma ovu ayiko be yini eri ’bale ururisi,

¹⁰azini ’ba afa e’iruri ma ovu vini ayiko be yini eri ’bale valerisi, erini ngale lule va ekile ase fulerisi.

¹¹Te etuni adri efu oli aciru be, eri fe aseni onyu onyu; funi nga lu va, wura ndriza erini nga avi ra. ’Dinile alu indi ’ba afa e’iruri nga dri ja acita erini ma alia ra.

¹²’Ba pa sopi obeta ma alia ci asi tezasiri eri drilebaru, a’disiku eri ka nga o’bita eri o’bizuri aga ’bo, eri nga ekilaza idrini Opini ndra azile ’ba eri lepi ’diyi driri isu ra.

¹³’Ba ovupi obezaruri ma ’yo kini, Mungu obe mani, ’dini aluni ku; te ’ba econi Mungu obezaru e’yo onzisi ku, Mungu obeni vini ’ba ku indi;

¹⁴te ’ba alu alu ovu obezaru li erinini eri sele jile bileni ewilerisi.

¹⁵’Di ma vutia, li ka mva isu i alia ’bo, eri ti ezatani; te ezata nde ka mba ra, eri osi dratani.

¹⁶Adripi mani lele ’diyi la, ’ba, ma ici emi ku.

¹⁷Afa feza onyiru dria, azini feta kililiru ’diyi dria ibi enga uru, esizu va engazu Ata diza beri vu, Ata nde i ojapi ku ovupi endrilendri ojataniri be kuri’i.

¹⁸Eri asini lelerisi, eri ti ama e’yo adarurisi, ama ma ovu ani afa erini ’bale ’diyi ma esele afa kapi okoriru.

¹⁹Adripi mani lele ’diyi, emi ma ni ’diri. ’Ba dria ma ovu e’yo erizu mbele, e’yo ’yozu e’yere, adra ’bazu mbele ku,

²⁰a’disiku adra ’bani ’yeni e’yo kililiru Munguniri ku.

²¹E’yo ’disi emi ma nze e’yo ondiru dria, azini asi onzi karakarau agapi rari pie, yi ’bezu amve, emi ma a’i e’yo ovupi sazaru emi asia ecopi orindi emini papiri asi e’yeresi.

²²Te emi ma ovu ’ba e’yo ’yepi ’diyiru, te ’ba e’yo eripi bilesi toko ’yepi ku yi ngulupi icipi inzosi ’diyiru ku.

²³Te ’ba ka ovu ’ba e’yo eripi bilesi toko ’yepi kuriru, eri ovu ekile ’ba i ma ngulupi ma mileti ndrepi mandara ma aliarile;

²⁴te eri ka i mileti ama ’bo, eri mu ra, coti mileti erini te e’dapi ngoni yari avi eri dri ra.

²⁵Te ’ba lupi azita kililiru trutaniri ma aliari, ka adri alenia ’dani, ka ovu ’ba e’yo eripi avipi mbeleri’i ku, te ’ba ’yeta ’yepi rari’i, ’ba ’diri eri nga ovu drilebaru erini ’yeta ’yeria.

²⁶’Ba azini ka ega i ma asia i bi dini Mungu inzizuri ’bo, de nga eri ombeni i andre ku, te eri ici i ma asi, dini agu ’dirini Mungu inzizuri eri toko.

²⁷Dini Mungu inzizu alaru ezata kokoru Mungu Ata ma miliari eri ’di’i imvoanzi pi andrizu awuzi pie ocoko yini ma alia, azini ’bani i ma agei tezu e’yo nyakuni kazu eri ezazu ku.