Read lugbara 1 Petero 2 Bible Online

1 Petero 2 - lugbara bible

1 Petero 2

¹E’yo ’disi emi ma ku asi onzi dris ja toli pie dria, lokiri pie, a’ya pie, ’ba ma ru ’yozu onziri pie dria

²Ekile odekua osipi o’diru ’diyile emi ma le lesu orindini toli kokoruri avasi, emi ma zo ani erisi cazu pata vu;

³emi ka ajini o’bi ’bo, vazu Opini asi ndriza be.

⁴Emi emu eri vu, eri oni idriru ’bani gale si te Munguni peleni, aje amboru beri’i;

⁵te emi indi, emi ovu ekile oni idriru ’diyile, si emi ovuzu jo orindiniru, emini ngazu ovuzu suru kuhanini alatararuriru, edeta orindini Munguni ecole a’ile Yesu Kristo ma e’yosi ’diyi edezu.

⁶Erini ovule sizaru e’yo siza ma aliarisi: Mi lu, ma oni ’ba Zionia, eri oni opele jo kala ’bazu, aje be amboruri’i, te ’ba eri a’ipiri ngani ovu drinzasi ku.

⁷Emi eri a’ipi ’diyi vu eri aje be amboru, te ’ba eri a’ipi ku ’diyi vu, Oni ’ba jo sipi ’diyini gale siri, oni ’diri ofu ovuzu jo kalati ma oni driruri’i;

⁸azini Oni ’ba pa sipiri azini oni kumuru; yi osi yi ma pa yini gale e’yo erika sirisi, ekile erini ovule pezaru yi dririle.

⁹Te emi ovu suru pele rari, suru opini kuhaniruri, suru alatararu, ’ba Munguni lele ovuzu i ma ’baru ’diyi, emi ma ece ani ’ba emi omvepi angu iniruri kuzu fizu diza ini osutaruri ma aliari ma onyi.

¹⁰Lani ndra emi sururu ku, te curu’do emi ovu suru Munguniri; emi isuni ndra yiki ku, te curu’do emi isu yiki ’bo.

¹¹’Ba mani lele ’diyi, ma matu ’ba emi vu emi ma ga li ruani omba ’bapi orindi ’bani be ’diyi si, ekile ’ba ani’baru acipi aci ’diyile.

¹²Adriza emini ma ovu onyiru juru eselia, ’dini yi ka emi ru ’yo onzi ekile emi ’ba azi onzi ’yepi ’diyile ti, yini ’yeta onviru emini ndrelerisi yi ma nga ru Munguni inzi ani o’du erini yi andrizurisi.

¹³Emi ma eri azita ’bani dria Opi ma e’yosi, kani azita meleki amboruni erini ovule ’ba dria ma driliarisi,

¹⁴kani azita ’ba gavenaru ’diyini, opini yi ti pele ’ba azi onzi ’yepi ’diyi ofezu e’yo onzi yinisi azini ’ba azi onyiru ’yepi ’diyi ma ru inzizurisi.

¹⁵E’yo Munguni lele ma ovu ’yezaruri eri ’di, emi ma ombe ’ba ondua kokoru e’yo ’yepi aniakosi ’diyi ma ti ci, ’yeta onyiru emini ’yele ’diyisi.

¹⁶Emi ma ovu ’ba otrule ’bo ’diyile, te emi ma ovu truta emini be bongo ’bezale e’yo onzi zizu ku; te emi ma ovu ati’ba Munguniru,

¹⁷Emi ma inzi ’ba dria, Emi ma le adripiyi. Emi ma ru Mungu. Emi ma fe inzita meleki dri.

¹⁸Emi ati’ba azi ngapi joa ’diyi, emi ma inzi ambo emini ma e’yo ruta driasi; emi ma inzi ambo onyiru asi ndriza be ’diyi a’dule ku, te ambo asi be okangaliru ’diyi indi.

¹⁹Te ’ba ka candi nya e’yo kokoru, erini asisile fele e’yo Munguni ma driarisi, ’di e’yo onyiruni.

²⁰Te emi ka e’yo eza ra, yi ka emi co e’yonisi, emi ka eri a’i asi tezasi, ru onyiru emini isule aniri ngoni ya? Te emi ka ’ye onyiru, yi ka emi ecandi e’yonisi, emi ka eri a’i asi tezasi, ’di e’yo onyiru Mungu ma milia.

²¹Te omve ndra emi e’yo ’dirisi, a’disiku Kristo ecandi ’ndra i emisi, e’yo ecetaru kuzu emi dri, emi ma bi ani eri ma vuti acizu eri ma pamvusi.

²²Eri ’yeni e’yo onzi aluni ku; yi isuni vini lokiri eri ma tilia ku.

²³Yini eri o’daria eri omvini o’data ma arioti ku; yini eri ecandiria eri omvini e’yo uri fezu yi dri ku; te eri ku e’yo ini ’ba e’yo lipi kililiruri dri.

²⁴Eri’i eri ma ngulupi ’du e’yo onzi amani rua ini ma alia pati ruaa, amani ani drazu e’yo onzi vu, ama ma ovu idriru e’yo kililiru vu beni; te cota erinisi emi ovu atizaru.

²⁵Awa’dini, emi avi ndra gerisi kabilole, te curu’do emi emvi ’Ba kabilo Ocepi, azini orindi emini ma e’vo Ndreoiri vu ’bo.