Read lugbara 1 Petero 3 Bible Online

1 Petero 3 - lugbara bible

1 Petero 3

¹’Dinile emi oku ’diyi, emi ma ovu inzitasi agupi emi ngulupini ’diyi vu, ’dini agupi ka e’yo a’i ku ti, yi ’ma oja yi asi, e’yo oluza kokoru, oku yini ma adriza ma e’yosi,

²yini adriza emini alaru inzita beri ndrelerisi.

³Edeza emini ma ovu edeza rua amvelerurini, kani dribi cazu, kani onyiafa meleru ’dini ’diyi osuzu, kani bongo suzu afusi, ’dini ku;

⁴te eri ovu agu emi asia e’dapi ku, i edepi onyiafa ecopi mapi kurisiri’i, onyiafa nderi eri orindi afu kokoru e’yere, ovupi Mungu ma milia afa aje be amboruri’i.

⁵Te oku alatararu asi ’bapi Mungu dria asi tezasi ’diyi adri ndra yi ede ’dinile, agupi yi ma ngulupini ma e’yo inzizu,

⁶ekile Sarani e’yo Iburahimuni inzile, eri omvezu opi’irile. Te emi’i, emi ovu anzi erini emi ka ’ye onyiru, emi asi ka oti urisi ku.

⁷’Dinile emi agupiru ’diyi, emi ma ovu oku emini vu nita be, emini nile yi ovu okpo be wererisi, inzita fezu yi dri, emini idri fele ’yeta anzutirisiri isule awurusoru yi be tualurisi; e’yo kazu zita emini Mungu zizuri ogazu ku.

⁸E’yo vile asizuri ’di, emi dria ma ovu asisile be alu, emi ma ovu yikisi, emi ma le emi emi eselia adripile emi ma ovu asi ndriza be, afu kokoru.

⁹Emi ma ofe e’yo onzile e’yo onzi ma ariotiru ku, kani o’data o’data ma ariotiru ku indi; te parinia emi ma fe asi ndriza’i, a’disiku omve ndra emi e’yo ’dirisi, emi ma a’i ani asi ndriza awitaru beni.

¹⁰Awa’dini, ’Ba idri lepi avasi o’du onyiru ’diyi ndrezuri, eri ma oga i andre, kazu e’yo onzi, ’yozu ku, ma oga vini i ti, kazu e’yo lokiriru ’yozu ku indi;

¹¹eri ma ona i e’yo onzisi, ma ’ye e’yo onyiru; eri ma du asi anzururi, ma bi vutini.

¹²Te mile Opini ovu ’ba kililiru ’diyi ma dria, azini bile erini ovu zita yini erizu. Te mile Opini ovu ombaru ’ba azi onzi ’yepi ’diyi vu.

¹³Te emi ka ovu avaru e’yo onyiru ’yezu, a’dini nga emi inzani ya?

¹⁴Te ’ba ka emi ecandi e’yo kililirurisi, emi drilebaru. Emi ma ’ye yisi urisi ku, emi asi ma oti ku indi,

¹⁵te emi ma inzi Kristo, eri ’bazu Opiru emi asia. Emi ma ovu edezaru etuzu e’yo omviza omvizu ’ba dria e’yo teza ovupi emi asiari ma e’yo zipi ’diyi ma tia, te ma omvi e’yo asi e’yeresi azini ruta be.

¹⁶Emi ma ovu asisile be onyiru Mungu vu, dini ’bani emi ru ’yoria onzi, drinza ma bi ani ’ba adriza emini onyiru Kristo ma aliari o’dapiri.

¹⁷Emini candi isuzu e’yo onyiru emini ’yelerisiri, Mungu ka le ra, ovu onyiru aga emini candi isuzu e’yo onzi emini ’yelerisiri ra.

¹⁸Te Kristo indi dra pale alu ’ba ma e’yo onzisi, ’ba kililiruri ’ba onzi ma paria, i ama jizu Mungu vu; fu ndra eri i ruasi ra, te fe eri dri idri dika orindisi;

¹⁹e’yo ’diri ma alia indi eri mu ndra e’yo oluzu orindi ovupi arujoa ’diyi tia,

²⁰yi ndra ’ba e’yo gapi si ’diyi, ewu Noa ngare Munguni tezu asi tezasiri ma alia, yini de maburu ederia; maburu ndesi ’ba were, kiri ’ba aro a’dule, pa yi yi ma aliani.

²¹Te e’yo curu’do; e’yo ndraka ’darini eceleri, eri baputizi; eri pa emi ojita ondi ruani ojizurisi ku, te e’yo omvizu asisile onyiru be Mungu vurisi, engata Yesu Kristonirisi;

²²eri mu ’bua ’bo, ovu curu’do Mungu ma dri ndiria, malaika piyini de ovuria eri ma palaa, opi pie, okpo pie dria.