Read lugbara 2 Petero 3 Bible Online

2 Petero 3 - lugbara bible

2 Petero 3

¹’Ba mani lele ’diyi, ’diri bani waraga mani sile emi vu iriri’i, te yi ma alia iri tro ma fe asisile emini alarurini engazu e’yo egazu dika;

²emi ma ega e’yo nabi alatararu ’diyini ondrile drio ’diyi pi, azita Opi ’Ba ’ba Papirini fele geri ’ba ti opele emini ’diyi vurisiri be.

³Te emi ma ni e’yo ’diri okorisi, kini, ewu tim asizurisi ’ba e’yo onzopi ’diyi yi nga eca e’yo onzozu, acizu li yini ma vutia,

⁴’yozu kini, E’yo aziza azile emviza erinisiri ngoa ya? Te engazu ewu ama a’bipini o’du kozuria kpere curu’do, afa dria adri ekile yini adrile engazu nyaku eti ’bazuriarile,

⁵Te yi ma dri avi e’yo ’dirisi aka, kini, ’bu pi ovu indi e’yo ’yoza Mungunisi andra drio, nyaku efupi miri ma alia i okupi miri ma aliari be;

⁶e’yo nde ’diyisi wudrikuru ewu ’dasiri ja ndra dri ra, yini tile driniarisi.

⁷Te ’bu curu’dori pi nyaku be, yi ovu ta mbazaru ari tezu e’yo ’yoza ndesi, kpere cazu o’du Munguni e’yo lizu azini ’ba Mungu rupi ku ’diyi ma dri jazuria.

⁸Te ’ba mani le1e ’diyi, e’yo alu ’diri ma avi emi dri ku, kini, o’du alu ovu Opi dri ekile eli alifu alule, te eli alifu alu ’diyi ovu ekile o’du alule.

⁹Opi icini i dri e’yo aziza erinisi, ’ba azi ’diyini dri iciza egalerile ku, te eri ma asi te emisi te te, erini lele ’ba aluni ma ja dri ku, te ’ba dria ma oja yi asi rarisi.

¹⁰Te o’du Opini nga eca oguouni ecalerile, te o’du ndesi ’buni nga dri ja noza amboru be, te afa dria yi nga aka acisi, te nyaku pi afa ’yele alenia ’diyi be nga ovu vezaru teketeke ra.

¹¹Afa ’diyi dria ka nga ovu dri jazaru ’dinile, emi ma ovu di ani ’ba ngoniru ka ya? Emi ma ovu adriza alatararu be Mungu inzizu,

¹²o’du Mungunirini ecazuri ma mile gazu, lezu avasi eri ma eca mbeleru. O’du nde ’dirisi ’buni nga ti ko ve ra, nga aka ra, te afa dria yi nga ra acini yi velerisi!

¹³Te ama’i, ama ’bu, o’diru pi ma mile ga nyaku o’diru be, pari e’yo kililirurini ovuzu alenia, erini azileri,

¹⁴E’yo ’disi, ’ba mani lele ’diyi, emini e’yo ’diyi ma mile garia, emi ma ’ye asi driasi eri ma isu emi asi anzuru be, ondi kokoru, azini drinza i kokoru.

¹⁵Te emi ega kini asi teza Opi amanirini eri patani; ekile Paulo adripi amani lelerini sile emi vu, ondua ovupi fezaru eri dririsirile.

¹⁶Eri ’yo e’yo e’yo ’diyi ma dria waraga erini ma alia dria, Te e’yo jazini waraga nde ma alia yi ewaru nizu; ’ba e’yo nipi ku ’diyi pi oja e’yo nde onzi, ’ba pa sopi okporu ku ’diyi be, ekile yini e’yo siza azini ojale onzi yi ma ngulupi dri jazurile,

¹⁷E’yo ’disi, emi ’ba mani lele ’diyi, emini e’yo ’diri nile driorisi, emi ma te emi agei, abaza ’ba azi onzi ’yepi ’diyini kazu emi sezu e’dezu, emini ani pa soza emmi okporuri kuzu ku.

¹⁸Te emi ma zo ’yeta anzutiri Opi amani Yesu Kristo ama Papiriniri pisi nita erini be. Diza ma ovu eri vu curu’do azini ’dani ’dani, Amena.