Read lugbara 1 Yohana 1 Bible Online

1 Yohana 1 - lugbara bible

1 Yohana 1

¹E’yo ovupi okokele, e’yo amani erile ’be, e’yo amani ndrele ama milesi ’bo, e’yo amani lule vunia, amani ruani elole ama drisi, E’yo idriniri ma e’yosiri-

²idri ece ira, ama ndre eri ’be, ama e’yo eti nze, idri ’dani ’daniri ma e’yo oluzu emi tia, idri nde ovupi ndra Ata be, il ecepi ama driri’i-

³e’yo amani ndrele ra, amani erile ’bori, ama olu emi tia indi, emi ma eci ti ani ama be; ti ecita amani ovu Ata be azini Mvi erini Yesu Kristo be indi.

⁴Ama si e’yo ’diyi, ayiko amani ma ga tre ani.

⁵E’yo oluza amani erile eri vu, amani olule emi tiari eri ’di’i: Mungu eri dizani, eri ma alia angu biza aluni yo.

⁶Ama ka ’yo ra ama ovu ti ecizu eri be, de ama aci angu biza ma alia indi, ama inzo li, ama ’yeni e’yo adaruri ku;

⁷te ama ka aci diza ma alia, erini ovule diza ma aliarile, ama ovu ti ecizu ama eselia, Yesu Mvi erini ma arini ama oji e’yo onzisi dria.

⁸Ama ka ’yo ra ama ovuni e’yo onzi be ku, ama ici ama ngulupi ceni, e’yo adaruri ama alia yo.

⁹Ama ka e’yo onzi amani e’da, eri ovu adam azini kililiru e’yo onzi amani wuzu, ama ojizu e’yo kililiru kurisi dria.

¹⁰Ama ka ’yo ra ama ’yeni e’yo onzi ku, ama ’ba eri ’ba inzo lipiriru, azini e’yo erini ama alia yo.