Read lugbara 1 Yohana 5 Bible Online

1 Yohana 5 - lugbara bible

1 Yohana 5

¹’Ba dria Yesuni a’ipi eri Kristo’iri, isu Mungu ti erini; ’ba dria ata ’ba tipiri lepi rari le ’ba erini tileri indi.

²Ama ni ama le anzi Munguni e’yo ’disi, amani Mungu lele azini azita erini ’yele rarisi.

³Leta amani Mungu lezuri ’di, amani azita erini ma ta mbazuri’i. Te azita erini ovuni nzizaru ku.

⁴A’disiku afa dria Munguni tile ’diyi aga nyaku ra; te agaza nyakuni agazu rari eri ’eli, a’ita amani,;

⁵’Ba nyakuni agapiri eri a’eli’i ya? Eri ’ba Yesuni a’ipi eri Mungu ma Mvi’iri ku ya?

⁶’Ba emupi yi pisi ari beri eri ’eli, Yesu Kristo’i; eri emuni yisi a’dule ku, te yi pisi ari be.

⁷Orindi eri e’yo eti nzeni, Orindini ovule e’yo adanirisi.

⁸Afa e’yo eti nzepi ’diyi yi na, Orindi pi, yi pi, ari pie; yi na tro eci yi e’yo alu ’yozu.

⁹Ama ka e’yo ’bani eti nzeleri a’i ra, e’yo eti Munguni nzeleniri aga ra; te ’diri e’yo eti nzeza Munguni nzeleri, erini nzele i Mvi ma e’yosiri’i.

¹⁰’Ba Mvi Munguni a’ipiri ovu e’yo eti nzeza nderi be i ma alia. Te ’ba Mungu a’ipi kuri ’ba Mungu ’ba inzo lipiriru ’bo, erini e’yo eti Munguni nzele i Mvi ma e’yosiniri a’ile kurisi.

¹¹E’yo eti nzeza nderi eri ’di, kini, Mungu fe ama dri idri ’dani ’daniri, azini idri ’diri ovu Mvi ini ma alia.

¹²’Ba ovupi Mvi beri ’ovu idri nderi be ra; ’ba ovupi Mvi Munguni be kuri ovuni idri nderi be ku.

¹³Ma si e’yo ’diyi emi dri, emi ’ba Mvi Munguni ma ru a’ipi ’diyi, emi ma ni ani emi ovu idri ’dani ’daniri be.

¹⁴Asi teza uri kokoru amani ovuzu ani eri be eri ma miliari eri ’eli, ama ka afa erini lele feleri zi, eri ama eri ra.

¹⁵Ama ka ni ra eri ama eri e’yo dria amani zilerisi ra, ama ni ra ama isu e’yo amani zile eri vu ’diyi ra.

¹⁶’Ba azini ka i adripi ndre erini e’yo onzi ’bani drazu ani kuri ’yeria, eri nga zi ra, Munguni nga idri fe eri dri ’ba nde e’yo onzi ’bani drazu ani kuri ’yepi ’diyi ma e’yosi. E’yo onzi ’bani drazu ani rari indi; ma ’yoni eri ma zi e’yo nde ’dirisi ku.

¹⁷Azi onzi dria yi e’yo onzini, te e’yo onzi ’bani drazu ani kuri eri indi.

¹⁸Ama ni ra ’ba dria Munguni tileniri ovuni e’yo onzi ’yeria ku, te ’ba Munguni tileri adri eri ma ta, mbani, azini ’ba onziri eloni ani eri ma rua ku.

¹⁹Ama ni ra ama ’ba Munguni, azini wudrikuru dria ovu ’ba onziri ma palaa.

²⁰Ama ni ra Mvi Munguni eca ’bo, eri fe ama dri ondua ’bo, amani ani ’ba adaruri nizu; ama ovu Mvi erini Yesu Kristo ’ba adaruri ma alia. ’Ba ’diri eri Mungu adaruri’i, eri vini idri ’dani ’daniri’i indi.

²¹Anzi nyiri nyiri mani, emi te emi agei wura inzile inzi ’diyi ma e’yosi.