Read lugbara 'Ba E'yo Lipi 'Diyini 11 Bible Online

'Ba E'yo Lipi 'Diyini 11 - lugbara bible

'Ba E'yo Lipi 'Diyini 11

¹Te Yefita ’ba Gileadiari ovu ’ba okporu asi teza beri, te eri oku awuouru ma mvi, Gileadi ti Yefita ’ndeni,

²Azini oku Gileadini ti agianzi eri dri; oku erini ma anzipi ’diyi ka zo ’bo, yi dro Yefitani ra, ’yo tinia, Mi ngani awuruso a’i ama ati ma ori’ba ma eselia ku, mini ovule oku andini ma mvarisi.

³Yefita nga di apa i adripi vurisi ra, mu ovu angu Tobua; ’ba toko toko ’diyi oku yi Yefita vu, yi fu muzu eri be.

⁴Te eri nga di eca e’yo ’diri ma vutia were ’dini, anzi Amonini ’di! a’di ’ba Israelini be.

⁵Te eri ovu ndra ’dini, Amoni anzipi ka a’di ’di ’ba Israelini be, ’ba ’wara Gileadia ’diyi mu Yefitani ejizu engazu angu, Tobua ra;

⁶yi ’yo Yefita ma tia; Mi emu ovuzu opi amaniru, ama ma ’di a’di anzi Amonini be ani beni.

⁷Te Yefita nga di ’yo ’ba ’wara Gileadia ’diyi ma tia, Emi nguni ndra ma, ma drozu ma ati ma joarisi ku ya? Emi curu’do emu ma vu, emini ovule candi aliarisi a’disi ya?

⁸’Dini ’ba ’wara Gileadia ’diyi ’yo di Yefita ma tia, Ama oja di ama mi vu dika curu’do ’bo, ’dini mi ma mu ama be a’di ’dizu Amoni anzipi be ani; mi nga ovu amani opiru ’ba ovupi Gileadia ’diyi ma drilia dria.

⁹Yefita nga di ’yo ani ’ba ’wara Gileadia ’diyi ma tia, Emi ka ma eji akua dika, a’di ’dizu anzi Amonini be, azini Yehova ka yi fe ma dria ra, ma nga ovu emi drilia ra ya?

¹⁰’Ba ’wara Gileadia ’diyi nga di ’yo Yefita ma tia, Yehova nderi nga ovu ’ba e’yo ndrepiriru ama eselia; ama nga ’ye e’yo mini ’yolerile ada ada.

¹¹Yefita nga di mu ’ba ’wara Gileadia ’diyi be, ’ba nde nga eri ’ba yi ma dri cezu azini opiru yi ma drilia; azini Yefita ’yo e’yo ini dria Yehova ma milia Mizipaa.

¹²Yefita pe ojio ti opi Amoni anzipi driliari vu kini, E’yo ama eselia mi be, mini emuzu ani a’di ’dizu ma be ma vile anguari ngoni ya?

¹³’Dini opi Amoni anzipiniri omvi e’yo ojio Yefitani ti pele ’diyi ma tia kini, A’disiku Israeli, erini efuria angu Misiriniasi, pa ndra ma angu ra engazu Arinonia kpere Yabokia, cazu kpere Yoridania; curu’do e’yo ’disi mi omvi angu ’diyi dika asi anzurusi.

¹⁴Te Yefita nga ojio ti pe dika opi Amoni anzipiniri vu,

¹⁵eri ’yo tinia, Yefita ’yo ’dini: Israeli pani angu Moabuniri kani angu Amoni anzipiniri ku,

¹⁶te yini efuria Misiriasi, Israeli aci angu roko driari ma eselia ecazu Miri Ekaruria, yi emu Kadesia indi.

¹⁷Israeli nga di ojio ti pe opi Edomuari vu kini, Ma zi mi tia, mi fe ma ma aga angu nde ma aliasi; te opi Edomuari erini ku. Azini ’dinile indi eri pe ojio ti opi Moabuari vu, te eri leni ndra erizu ku. ’Ba Israelini adri ovu ani Kadesia.

¹⁸Yi nga di aci angu roko driari ma eseliasi, angu Edomuni pi nazu kalasi kalasi angu Moabuni be, yi nga emu angu Moabuni ma kala etuni efuzuriarisi, nga hema aso woke Arinoni ’aa’dasiria, te yi efini kalati Moabuni ma alia ku, Arinonini ovule kalati Moabunirisi.

¹⁹Israeli nga vini ojio ti pe Sihoni opi ’ba Amorini, opi Hesiboniari vu; Israeli ’yo tinia, Mi ku ama ma zo, ama zi mi tia, angu mi vileri ma aliasi kpere ma vile angua ani.

²⁰Te Sihoni a’ini Israelini agazu i ma kalasi ku; te Sihoni oku ’ba erini dria tualu, aso hema yini Yahazia, ’di a’di Israeli be.

²¹Te Yehova Mungu Israeliniri fe Sihoni pi ’ba erini ’diyi be dria Israeli ma dria, yi ofu yi ra; ’dini ’ba Israelini bi di angu ’ba Amorini, ovupi angu ndea ’diyini.

²²Yi bi angu ’ba Amorini ’diyini yiniru engazu Arinonia kpere Yabokia, azini engazu angu roko driaria kpere Yoridania indio

²³’Dini curu’do Yehova Mungu Israeliniri ofu ’ba Amorini angu yiniasi ’ba Israelini ma milia ’bo; te mi ma bi yi miniru ya?

²⁴Mi ngani angu nde Kemosi adrou mi vilerini fele mi driri bi’i ku ya? ’Dinile ’ba Yehova Mungu amanini Ofule angu yiniasi ama milia ’diyi, ka tro adri ’ba ngoni ti, ama nga yi ma angu bi’i.

²⁵Te curu’do mi afa onyiru Balaki Zipori mvi opi Moabuari agapi rari’i ya? Yi fu ndra yi Israeli be ra ya? ’Ba ndra omba a’di i ’dizu yi be ra ya?

²⁶Israelini ndra ovuria Hesiboni pi ma alia aku erini be, Aroeri pie aku erini be, aku ambo ambo dria ovupi Arinoni ma kalaa ’diyi pie, eli turu na, emi obini ndra yi dika etu ’dasi ku a’disi ya?

²⁷Ka’dini ma ezani mi vu ku, te mi ’ye ma onzi mi’i, a’di ’dizu ma be; Yehova ’Ba ma e’yo Lipiri ma li e’yo o’du ’disi anzi Israelini piyi ma eselia anzi Amonini beni.

²⁸Te opi Amoni anzipiniri erini e’yo ndra Yefitani ti pele ’diyi aluni ku.

²⁹Orindi Yehovani nga di eca ’Yefita ma dria, eri zo Gileadi piasi Manase be, zo vini Mizipa Gileadiariasi, engazu Mizipa Gileadiariasi eri zo anzi Amonini vu.

³⁰Te Yefita so oyo Yehova vu ra kini, Mi ka nga anzi Amonini ’diyi fe ma dria adaru ra,

³¹eri nga di ovu ’dini, afa dria efupi ma vile jotilea dri fuzu ma be, mani emviria asi anzuru be engazu Amoni anzipi vuri, eri nga ovu Yehovani, ma nga eri ede edeta vezauriru ra,

³²’Dinile Yefita nga di zo mu anzi Amonini vu, a’di ’dizu yi be; te Yehova fe yi eri ma dria.

³³Eri nga yi ofu engazu Aroeria kpere mini ecaria Minitia, ofu aku ambo ambo kali iri ’diyi kpere Abeli-keramimua futa amborusi. ’Dinile anzi Amonini ovu di ndezaru anzi Israelini ma drilia ra.

³⁴Te Yefita nga emu Mizipaa i vile joa; te mi lu, eri ma zi efu dri fuzu eri be ari were aiyoro be ruaari eri ma dria, emu ongo tusi; isu de eri ovu zamva erini alu kodikodi; eri be agupiamva kani zamva azini aluni yo.

³⁵Eri nga eca ’dini, eri ka eri ndre ra eri osi bongo ini ra, eri ’yo, Eyowaye, ma zi la! mi omvi ma va tu, mi ’ba ma ecandipi ’diyi ma azi; mani ma tile zile Yehova dri ’borisi, te ma econi oja vile ku.

³⁶Eri ’yo tinia, Ma ati, mi zi mi tile Yehova dri ’bo; mi ’ye ma be ekile efupi mi tilia ’borile, a’disiku Yehova ofe mi dri aroti ari’ba mini ma ruaa, ada anzi Amonini ma ruaa.

³⁷Eri ’yo i ati ma tia, Mi ku afa ’di ma ’ye i ma vu ani; mi ku ma ma ovu nga mba iri, ’dini ma ma mu sizu va oni eselea, e’yo mani ovuzu aliriaruri wuzu, ma’i ma agyi be.

³⁸’Dini eri ’yo ra, Mi mu. Eri pe tini ovuzu nga mba iri; eri mu ra, eri’i agyi erini pie, mu wuzu aliria erinisi oni dria.

³⁹Eri nga eca mba iririni i deria eri emvi i ati vu, eri ’ye eri be ekile oyo erini solerile ra. Te eri nini nga de agupi ku. E’yo nde ndra azitaru Israeli ma alia, kini,

⁴⁰ezoanzi Israelini mu eli vusi eli vusi avico ’bazu Yefita ’ba Gileadini ma zi ma e’yosi o’du su eli alu alu ma alia.