Read lugbara 'Ba E'yo Lipi 'Diyini 12 Bible Online

'Ba E'yo Lipi 'Diyini 12 - lugbara bible

'Ba E'yo Lipi 'Diyini 12

¹Anzi Efiraimuni oku yi tualu, yi zo muzu angu andraleruria; yi ’yo Yefita ma tia, Mi zo ndra mu a’di ’dizu anzi Amonini be ra, mi omveni ndra ama muzu mi be ku a’disi ya? Ama mi vile jo eve mi dria ’dia acisi.

²Yefita ’yo yi ma tia, Ma’i ’ba ma vile ’diyi be, ama ’di a’di ambo anzi Amonini be; te mani emi omveria emi pani ndra ma yi ma dria ku.

³Te ma ka ndre emi pani ma ku, ma ji di ma adi dra dri, ma zo mu a’di ’dizu Amoni anzipi be, azini Yehova fe yi ma dria ra; emi di emu ma vu o’du ’disi a’di ’dizu ma be a’disi ya?

⁴Yefita nga di ’ba Gileadia ’diyi oku dria tualu, yi nga a’di ’di ’ba Efiraimuni be; ’ba Gileadia ’diyi ofu ’ba Efiraimuni, a’disiku yi ’yo, Emi ’ba Gileadini, emi ’ba Efiraimuni apapi ra, ovupi Efiraimu pi ma eselia agadua Manase be ’diyi.

⁵’Ba Gileadia ’diyi yi pa kiji yi Yoridanini zozu ’diyi Efiraimu vualeru. Te eri ovu ’dini, ’ba Efiraimuni apapi ’diyi ma azi ka ’yo, Mi fe ma zo ’aa’dasi fo! ’ba Gileadia ’diyi nga di ’yo tinia, Mi ’ba Efiraimuni ya? Eri ka ’yo, Yo;

⁶yi nga di ’yo eri tia, Mi ’yo curu’do Sihiboleti; te eri ’yo Siboleti, erini ndra ecole eri omvele kilili kurisi; ka’dini yi nga eri bi ci, fu eri kiji Yoridani zozuria ani. ’Dini ’ba Efiraimuni o’de etu ’dasi alifu kali su drini iri.

⁷Yefita nga e’yo ’ba Israelini li eli azia. Yefita ’ba Gileadiari dra di ra, sa eri aku amboru Gileadia ’diyi ma azi ma alia.

⁸Eri ma vutia lbizani ’ba Betelehemuari li e’yo ’ba Israelinini.

⁹Eri ovu ndra agupianzi be kali na; ope ezoanzi erini kali na ma ti muzu angu andinia, te eji ezoanzi kali na engazu angu andinia agianzi erini dri. Eri li e’yo Israelini eli aziri.

¹⁰Ibizani dra ra, sa eri Betelehemua.

¹¹Eri ma vutia Eloni ’ba Zebulunini li e’yo Israelinini; li e’yo Israelini eli mudri.

¹²Te Eloni ’ba Zebulunini dra ra, sa eri Aiyalonia angu Zebuluniniria.

¹³Eri ma vutia Abidoni Hileli ’ba Piratonini ma mvi li e’yo Israelinini.

¹⁴Eri ovu agupianzi be kali su, azini anzi ma anzi be kali na, nzupi akanya kariaru kali azirisi ’diyi; eri li e’yo Israelini eli aro,

¹⁵Te Abidoni Hileli ’ba Piratonini mvi dra di ra, sa eri Piratoni angu Efiraimuniaria, angu oniru ’ba Amalekiniria.