Read lugbara 'Ba E'yo Lipi 'Diyini 14 Bible Online

'Ba E'yo Lipi 'Diyini 14 - lugbara bible

'Ba E'yo Lipi 'Diyini 14

¹Samisoni nga di si Timinaa, eri ndre zamva alu Timinaa ’dale, ezoanzi ’ba Filisitiaa ’diyini ma azi.

²Eri etu emu olu i ati pi ma tia i andri be, kini, Ma ndre zamva Timinaa, ezoanzi ’ba Filisitiaa ’diyini ma azi; e’yo ’disi emi eji eri ma dri okuru.

³Ati pi nga di ’yo tinia andri be, Zamva aluni ezoanzi mi adripini ma eselia yo, kani ’ba mani ma eselia dria yo, mini muzu oku ’duzu ’ba agele lile ku Filisitiaa ’diyi vu ani ya? Samisoni nga di ’yo ati ma tia, Mi eji erima dri; a’disiku eri fe ma dri ayiko tu.

⁴Te ati pi andri be nini ku kini e’yo ’di enga Yehova vu; erini e’yo ndale ’ba Filisitiaa ’diyi ma ruaarisi. Isu de etu ’dasi ’ba Filisitiaa ’diyi nya opi Israelima driliani.

⁵’Dini Samisoni pi nga di si i ati pie andri be Timinaa, yi eca amvu zabibu pati be Timinaaria. Mi lu, kami aludu efu awu be eri vu;

⁶te Orindi Yehovani eca eri ma dria okpo be, eri osi eri ekile erini te ecole ndrimva osilerile; eri ma dria afa azini yo. Te eri oluni i ati pi ma tia i andri be afa ini ’yeleri aluni ku.

⁷Te eri si andraleru mu o’yozu zamva nde be; eri fe ayiko Samisoni dri tu.

⁸Te o’du azini ma vutia eri emvi oku nde ’duzu; eri oja i kalaa kami ma avu ndrezu, te mi lu, anyuefi ongulumuru fi ovu kami avu ma ruaa, anyuoso be.

⁹Te eri nga eri ’du i ma dria, eri ji mu mbe si erini muria; eca i ati pi vu i andri be, fe yi dri, yi mbe indio Te eri oluni yi ma tia kini i bi te anyuoso ’di, enze kami avu ma ruaari ku.

¹⁰’Dini eri ma ati si oku nde vu andraleru; ’dale Samisoni ’ba omu, ekile karileni adrile ’yelerile.

¹¹Te eri nga eca ’dini, yi ka eri ndre ’bo, yi eji ’ba azini kali na ovuzu eri be.

¹²’Dini Samisoni ’yo yi ma tia, Emi fe ma ma zi e’yo o’beza emi tia; emi eco kani efini ece ma dri de nga o’du aziri omuni deni yi ku, eri isuzu ra yani, ma di nga emi dri bongo mile be nyiri ’diyi fe kali na,bongo ojaza kali na ’diyi be;

¹³te emi ka eco efini ecezu ma dri ku, emi nga ma dri bongo mile be nyiri ’diyi fe kali na, bongo ojaza kali na ’diyi be. ’Dini yi ’yo eri ma tia, Mi zi di e’yo o’beza miniri, ama ma eri nga eri ani.

¹⁴’Dini eri ’yo yi ma tia, ’Ba afa nyapi turi ma alia nyaka efuni, azini ’ba okpo beri ma alia aluza efuni.

¹⁵Te eri nga eca o’du aziririsi ’dini, yi ’yo oku Samisonini ma tia, Mi obe nga agupi mi vileri, ’dini eri ma ece nga ama dri e’yo o’beza ’diri ma efi ani, ama kazu mi vezu mi ati ma jo be acisi ku. Emi omve ama, ama ojazu alioru ya? Eri ovuni ’dini ku ya?

¹⁶’Dini oku Samisonini wu eri ma milia, ’yo tinia, Lu mi ngu ma, mi leni ma ku; mi zi e’yo o’beza ’ba mani ma anzi ma tia, te mi oluni mani ku. Te eri ’yo tinia, Mi lu, ma oluni ma ati pi tia ma andri be ku indi; ma di olu mini ya?

¹⁷Te eri wu eri ma milia o’du aziri de nga omu deni i ku; te eri nga eca o’du aziririsi ’dini, eri olu eri tia ra, erini eri omile turisi. Eri nga e’yo o’beza nderi olu ’ba erini ’diyi ma anzi ma tia ani.

¹⁸’Dini ’ba aku ndea ’diyi ’yo eri ma tia o’du azirisi de nga etu ’deni ku, Afa alupi tu anyuoso agapi rari a’di afani ya? Azini afa okporu kami agapi rari a’di afani ya? Emi ka te amvu ’ya tikaria ma vilerisi ku, emi isuni te e’yo o’beza mani ’diri ma efi ku.

¹⁹Te Orindi Yehovani eca okpo be eri ma dria, eri si andraleru Asikelonia, ofu ’ba yi eselia kali na, opa yi ma afa ra, fe bongo ojaza ’ba e’yo o’beza ma efi olupi ’diyi dri ani. Te adra erini ko ti aciru, eri tu mvi i ati ma joa.

²⁰Te yi fe Samisoni vile okuri ’ba erini ’a’azu eri beri dri, ndra erini ovuzu yi be agyiruri’i.