Read lugbara 'Ba E'yo Lipi 'Diyini 17 Bible Online

'Ba E'yo Lipi 'Diyini 17 - lugbara bible

'Ba E'yo Lipi 'Diyini 17

¹Agu alu ndra indi angu oni ruaa Efiraimuniria, runi Mika’i.

²Te eri ’yo i andri ma tia ’dini, Silingi dahaburu alifu alu drini turu alu, ndra ovupi oguzaru mi vurisi, mini ndra ani trita trizu, mini ndra e’yoni ’yozu ani ma bilia ’diyi, mi lu, dahabu nderi ovu ma vu; ma ’du eri ma’i. Te andri ’yo tinia, Yehova ma fe asi ndriza ma mvi dri fo!

³Eri nga di silingi dahaburu alifu alu drini turu alu ’diyi omvi i andri dri vile; te andri ’yo ra, Ma fe dahabu nde Yehova dri adaru, engazu ma driarisi ovuzu ma mvi ma! afaru, wura inzile inziri pi edezui wura edele aya akapi acisiri be; te ma nga eri omvi mi dri curu’do.

⁴Eri ka silingi omvi i andri dri ’bo, andri ’du silingi dahaburu turu iri, fe yi onduou oka dipiri dri, onduou nde nga wura inzile inziri pi ede dahabu ndesi wura edele aya akapi acisiri be; eri adri ndra Mika vile joa.

⁵Isu de agu Mikaru ’diri ovu de adrou lo be, eri nga koti alinaruri pi ede wura inzile terafiniruri be, nga i ma mva ma azi alu pe ndu, mva nde nga ofu atalau ini edeta edepiriru ani.

⁶O’du ’dayisi isu de opi Israeli drilia yo; ’ba dria alu alu ’ye e’yo ovupi onyiru i ngulupi ma miliari’i.

⁷Isu de karilau alu Betelehemuyudaa, ori’ba Yudani ma eselia, eri ndra ’ba Levini; eri adri ’dale.

⁸Agu nderi fu aku Betelehemuyudaariasi ra, mu ’a’azu pari erini ecozu angu isuzuria; acita erini ma alia, emu angu oni ruaa Efiraimuniria, kpere Mika vile joa.

⁹Mika nga di ’yo eri ma tia, Mi enga ngoa ya? Eri ’yo eri tia, Ma ’ba Levini engazu Betelehemu-yudaa, ma mu ’a’azu pari mani ecozu angu isuzuria.

¹⁰Mika nga di ’yo tinia, Mi ovu ma be, mi ovu mani ataru azini atalau edeta edepiriru, ma nga di mi dri silingi dahaburu fe mudri mudri eli vusi eli vusi, bongo pie, nyaka mini pie. ’Dini ’ba Levini fi di eri vu ra.

¹¹’Ba Levini ’diri a’i ovuzu eri be ra karilau nde ovu di eri dri ekile mva erini ma azile.

¹²Mika nga ani ’ba Levini ’diri pe ndu ovuzu alaru, karilau nderi ofu di eri ma atalau edeta edepiriru, ovuzu Mika vile joa.

¹³’Dini Mika nga di ’yo, Curu’do ma ni ra Yehovani nga ma ’ye onyire, mani ovule ’ba Levini be cizu mani atalau edeta edepirirurisi.