Read lugbara 'Ba E'yo Lipi 'Diyini 18 Bible Online

'Ba E'yo Lipi 'Diyini 18 - lugbara bible

'Ba E'yo Lipi 'Diyini 18

¹O’du nde ’dayisi isu de opi Israeli ma drilia yo. Azini o’du nde ’dayisi suru Danini nga angu awurusoru nda yi dri yini ngazu ovuzu aleniari; a’disiku cazu o’du nde ’dasi awuruso yini e’deni nga yi dria suru Israelini ma eselia ku.

²Te anzi Danini nga ’ba towi ma ti pe ori’ba yini ma eselia, engazu kalafe yini ma alia dria, ’ba asi teza be ’diyi, pe yi ti engazu Zora pia Esitaoli be, muzu angu ma orile gazu, aleni ndazu; te yi ’yo yi ma tia, Emi mu angu nderi ma orile gazu. Te yi emu angu oni ruaa Efiraimuniria, ca Mika vile joa, yi ovu ’daa.

³Yini ovuria Mika vile jo ma tia ogogo, yi ama karilau ’ba Levini ’di ma o’duko ra; yi yi kalaa, ’yo tinia, A’di eji mi ’doani ya? Mi a’di ’ye pari ’do ma alia ya? ’Dia mini a’di afani ya?

⁴Te eri ’yo yi ma tia, Mika ’ye ma be ’dini ’dini: eri oya ofe ma dri, ma ofu di eri ma atalau edeta edepiriru.

⁵Yi ’yo eri ma tia, Ama zi mi tia, mi zi e’yo amaza Mungu ma tia, ama ma ni ani kani geri amani ngazu muzuri nga ovu drilebaru yani.

⁶Te atalau edeta edepiri ’yo yi ma tia, Emi mu asi anzuru be; geri emini muzuri ovu Yehova ma milia.

⁷’Ba nde towi ’diyi ko dri mu ra emu Laisia, yi ndre ’ba nde ’dale ’diyi ra kini yi ovu e’yo ’yaasi ekile ’ba Zidonia ’diyini adrile e’yere e’yo ’yaasirile; ’ba azinini ovule angu nde ma alia okpo be drinza fezu yi dri e’yo azinisi kurisi, yi ovu ’ba Zidonia ’diyi be re, ecini vini yi ’ba azini be ko,

⁸Yi nga di mvi adripi yini vu Zora pia Esitaoli be; adripi yini ’yo yi ma tia, Emi ’yo ngoni ya?

⁹Te yi ’yo yi ma tia, Emi enga, ama mu a’di ’dizu yi be; amani angu nderi ndrele ’borisi, te mi lu, eri onyiru tu. Emi ri oye ya? Emi ma ovu ovusi muzu fizu angu nderi bizu ku.

¹⁰Emi ka mu ra, emi nga ca ’ba ovupi e’yo ’yaasi ’diyi vu. Te angu nderi walaru; Munguni eri fele emi dria ’borisi, eri angu afa azini nyakuari, ka ovu ngoni ngoni ti, ma alioni ’ba fuzu kuri’i.

¹¹Te ’ba turu azia enga ’daarisi, yi ori’ba Danini ma eselia engapi Zora pi ma alia Esitaoli be, afa ombani ombepi yi ma ruaa ’diyi.

¹²Yi tu mu hema aso Kiriatiyearimu ovupi Yudaaria. E’yo ’disi ’da ani angu nderi ma ru Mahanedani’i kpere curu’do; mi lu, angu nde ovu Kiriati-yearimu ma ngukua.

¹³Yi nga aga ’daarisi muzu angu oni ruaa Efiraimuniria, yi ca Mika vile joa,

¹⁴’Ba towi mupi angu Laisini ma orile gapi ’diyi omvi e’yo, ’yo yi adripi ma tia, Emi ni kini jo ’diyi ma alia koti alinaruri pi yi indi, terafini pie, wura inzile inziri pie, wura edele aya akapi acisiri pie dria ra ya? Curu’do e’yo ’disi emi ega e’yo emini ngale ’yeleri.

¹⁵Yi nga yi oja kalaaleru ’dia, ca karilau ’ba Levini vile joa, ada kpere Mika vile joa, yi zi eri e’yo erinisi.

¹⁶’Ba turu azia afa ombani ombepi yi ma ruaa ovupi anzi Daniniru ’diyi, yi nga pa oso pari fizu kalitilearia;

¹⁷te ’ba towi mupi angu ma orile gapi ’diyi etu uru, emu efizu ’dia, opa wura inzile inziri pi, koti alinaruri pie, terafini pie, wura edele aya akapi acisiri be, de isu atalau edeta edepiri so pa pari fizu kalitilearia, ’ba turu azia afa ombani ombepi yi ma ruaa ’diyi be.

¹⁸’Ba ’diyi ka fi Mika vile joa, wura inzile inziri pi ejizu koti alinaruri pie, terafini pie, wura edele aya akapi acisiri be, atalau edeta edepiri nga ’yo yi tia, Emi a’di ’ye ya?

¹⁹Te yi ’yo eri ma tia, Mi adri ciri, mi ’ba mi dri mi tia ci, mi mu ama be, ovuzu ama dri ataru azini atalau edeta edepiriru. Eri ovu onyiru mi dri ovuzu atalau edeta edepiriru ’ba alu dri aga kani mini ovuzu atalau edeta edepiriru suru alu pi dri azini ori’ba Israelini dri ya?

²⁰Te atalau edeta edepiri nde ma asi ovu ayikosi, ’du koti alinaruri pi, terafini pie, wura inzile inziri be, mu ’ba nde ma eselia.

²¹’Dini yi nga yi oja mu ra, yi o’ba anzi pi anyapa pie, afa yini pie yi drilia.

²²Yini ovuria jo Mikani be re, ’ba agupiru ovupi jo be ogogo jo Mikani be ’diyi nga yi oku tualu, dro anzi Danini ma vuti, isu yi ra.

²³Te yi wu anzi Danini ’diyi vu. E’yo ’disi yi oja yi ma andreti yi vu, ’yo Mika ma tia, A’di ’ye mini ya, mini etuzu ani ’ba ongulumuru be ’dini?

²⁴’Dini eri ’yo ra, Emi opa adrou mani, mani edele ’diyi pi, atalau mani edeta edepiri be ra, emi mu ra, ma ace di a’di afa be ya? Emi di ’yo ma tia, A’di ’ye mini ya, ngoni ngoni ya?

²⁵Te anzi Danini ’yo tinia, Mi o’duko ma ovu erizaru ama eselia ’dia ku, ’ba aokoru ’diyi kazu e’dezu mi dria ku, mi kazu mi idri avizu ku, ’ba mi vile joa ’diyi ma idri kazu avizu ku indi.

²⁶’Dini anzi Danini ’diyi mu yini ra; te Mika ndre kini yi okporu aga ira, eri atri mvi i vile joa vile.

²⁷Yi o’du afa Mikani edele ’diyi pi atalau erini edeta edepiri be, emu Laisia, ’ba ovupi e’yere e’yo ’yaasi ’diyi vu, yi ofu yi sei ma sisi ra, ve aku nderi acisi indi.

²⁸Te ’ba aluni yi papini yo, a’disiku erini ovule Zidoni be ziririsi, azini yini yi ecile ’ba azini be kurisi. Aku nde ovu ndra e’bu Beti-rehobu ma tiari ma alia. Yi nga di aku amboru si ’daa, nga ovu alenia.

²⁹Yi ’da aku nde ma ru Dani’i, a’bi yini Dani ma ru vusi, ’ba ndra yini osile Israeli driri; te aku nderi ma ru ndra okorisi Laisi’i.

³⁰’Dini anzi Danini ’diyi edre yi dri wura inzile inzi nderi ra; azini Yonatani Gerisomu Musa mvi ma mvi pi anzi erini be ovu atalau edeta edepi ’diyiru suru Danini dri, kpere o’du yini angu nderi bizu ati’borurisi.

³¹’Dini edre di wura inzile inzi Mikani edeleri yi dri, ewu dria jo Munguni ovuzu Siloarisi.