Read lugbara 'Ba E'yo Lipi 'Diyini 19 Bible Online

'Ba E'yo Lipi 'Diyini 19 - lugbara bible

'Ba E'yo Lipi 'Diyini 19

¹Eri nga di ecao’du ’dayisi ’dini, opi Israeli driliari ka ovu yo, isu de agu alu ’ba Levini ovu angu oni ruaa Efiraimuniri ma kala ’aa’dasiria, eri ’du oku ati’boru ini okuru engazu Betelehemu-yuda ma alia.

²’Dini oku erini eza eri ra erini ovule awuoururisi, ku eri ra, mvi i ati vile jo Betelehemuyudaaria, ovu ’dale mba su.

³Te agupi erini enga ra, mu vutinia, e’yo ’yozu asi ndrizasi eri be, eri ejizu dika. Eri mu ati’bo ini be, ji akanya iri indio Oku nderi nga eri eji i ati vile joa; oku nde ma ati ka eri ndre ra, eri ovu ayikosi yini dri fule eri berisi.

⁴Anyi erini, oku nde ma ati, oga eri ra, eri ovu eri be o’du na; ’dini yi nya, yi mvu, yi te ’daa.

⁵Te eri nga eca ’dini o’du ka ca su ’boria, yi enga o’biti drio drio, eri enga uru ’ye mu mu; te oku ma ati ’yo i mvi ma tia, Mi emu nga mi asi omizu enya were ’disi oko, mi nga di mvi geri minia ndo.

⁶’Dinile yi ri va, yi nya, yi mvu, yi iri tro tualu; te oku nde ma ati ’yo agu nderi ma tia, Ma zi mi ria onyiruni, mi a’i tezu ’dia ini be rra, mi asi ma ovu ayikosi ani.

⁷Agu nderi enga uru muzu, te eri ma anyi omi eri ra, eri la ’daa dika.

⁸’Dini eri enga o’biti drio drio o’du towisi muzu; te oku ma ati ’yo, Mi omi nga mi asi, ma zi mi tia, mi te kpere anguni biria. Yi nya, yi iri tro.

⁹Te agu nderi ka enga ’ye muzo ra, eri’i oku ati’boru erini pie, ati’bo erini pie, eri ma anyi oku ma ati ’yo eri ma tia, Mi lu, curu’do anguni ’ye ovu ondrero; ma zi mi tia, mi ma la ’dia ini be rra. Mi lu, etuni ’ye ’de ’de, mi la ’dia, ’dini mi asi ma ovu ayikosi; azini drusi emi di dri ko drio, ’dini emi ma ca akua beni.

¹⁰Te agu nderi leni la ’daa ini ’dasi ku; te eri enga uru muzo, eri ca Yebusia (’di Yerusalemu’i). Isu de akanya eri be iri enyiriko ’bani rizuri be ruaa, oku erini ati’boruri de eri be indi.

¹¹Yini ovuria Yebusia ogogo etu ace were ’ye ’de ’de; ati’bo nga di ’yo ambo iniri ma tia, Mi emu, ma zi mi tia, ama ma oja ama kalaa aku amboru ’ba Yebusini ’diria, ama ma la alenia.

¹²Te ambo eriniri ’yo eri ma tia, Ama ngani ama oja kalaa fizu aku amboru juruni ’diria ku, aku ovupi anzi Israelinini kuri; te ama nga aga mu Gibeaa.

¹³Te eri ’yo ati’bo ini ma tia, Mi emu, ama osi ama ogogo aku ’diyi ma azi alu vu, ama nga la kani Gibeaa, kani Ramaa.

¹⁴’Dinile yi aga aga, mu geri yinia; etu nga ’de yi ma dria yini ovuria va Gibeaa ovupi Benyamininiri vu ogogo.

¹⁵Yi nga di yi oja kalaa ’daa, muzu lazu Gibeaa. Te eri fi ra, ri va aku nderi ma gboko tia; ’ba alunini ovule ’daa yi ofizu lazu i vile joa kurisi.

¹⁶Te mi lu, mbazau alu ibi emu engazu i vile amvu azia ondresi; agu nderi enga ndra angu oni ruaa Efiraimuniri ma alia, te eri la Gibeaa; te ’ba angu nde ma e’ipi ’dayi ’ba Benyaminini.

¹⁷Te eri enga i ma mile uru, eri ndre ’ba engapi aciari aku nde ma gboko tia; mbazau kini, Mi mu ngoa ya? te mi ibi enga ngoa ya?

¹⁸Te eri ’yo tinia, Ama zo engazu Betelehemuyudaasi muzu angu oni ruaa Efiraimuniri ma kala ’aa’dasiria; ma enga ndra ’dale. Ma mu Betelehemuyudaa; te ma curu’do mu jo Yehovania; te ’ba aluni yo ma ofipi i vile joari.

¹⁹Te ti, ase ’wiza pi nyaka be akanya amani dri ci, enya pi patiefi ma su be ma ngulupi dri indi, ati’bo mini okureri pie, karilau ovupi ati’ba mini ’diyi beri pie dria; afa azini mani leleni yo.

²⁰Mbazau nderi kini, Asi anzuru ma ovu mi vu; te ti, afa mini leleri ka ovu ngoni ti, ma ovu ma dria; pe lu mi ma la gbokoa ’dia ku.

²¹’Dini eri nga yi ofi i vile joa, nga nyaka fe akanya dri; ’ba nde oji di yi ma pa, yi nya, yi mvu indi,

²²Yini yi ma asi feria ovuzu ayikosi, mi lu, ’ba aku ndea ’diyi, yi anzi Belialini e’yo ’yepi saaru diyi, yi ace jo nderi kuru, jotile dizu; yi ’yo jo e’i mbazaururi ma tia kini, Mi eji ’ba te fipi mi vile joari amve, ama ma ni eri ani.

²³Agu nde, jo e’iruri, fu yi vu amve, ’yo yi ma tia, Yo, ma adripi, ma zi emi tia, emi ma ’ye onzikanyaru ’dini ku; ’ba ’dirini efile ma vile joa ’borisi, emi ma ’ye e’yo ondua kokoru ’dini ku.

²⁴Emi lu, zamva ma ziruri pi oku erini ati’boruri be yi ’do; ma nga yi eji amve curu’do. Emi ma fe drinza yi dri, ma ’ye yi be e’yo ovupi onyiru emi miliari’i; te ’ba ’diri vu emi ma ’ye e’yo ondua kokoru ’dini ku.

²⁵Te ’ba nde ’diyi leni eri ma ti erizu ku. ’Dini agu nderi bi oku ati’boru eriniri, eji eri ofu eri yi vu; yi ni eri ra, yi ecandi eri ini be rra kpere o’bitisi. Te anguni ’baria atiria ’dia ’di, yi ku eri muzu ra.

²⁶Anguni ’baria atiria, oku nde nga di emu, e’de agu nderi ma jotilea, pari eri ma opini ovuzuria, kpere etuni efuria.

²⁷Opi erini enga o’bitisi, zi jotile ra, fu muzu geri inia; te mi lu, oku nde, oku erini ati’boruri e’de de va jotilea, ’ba i ma dri jotile ma etia.

²⁸Te eri ’yo tinia, Mi enga uru, ama mu di. Te ’ba e’yo omvipini yo. Eri nga di eri ma avu ’du ’ba akanya dria; agu nde enga mvi i ma paria.

²⁹Te eri ka fi i vile joa ’bo, eri e’du eli, bi i vile oku ati’boru ’diri ma avu ra, oli eri ma ale, pa pi dri pie, esele be mudri drini iri, pe tini kala angu Israelini ma aliasi dria.

³⁰Eri ovu ndra ’dini, ’ba dria afa ’diri ndrepi ’diyi ’yo ra, E’yo ’dinile ’di ’yeni nga i drio, kani ’ba ndreni nga ’dini, engazu o’du anzi Israelini efuzu Misiriasirisi kpere curu’do ku; emi ega e’yoni, emi ama, emi ’yo e’yoni.