Read lugbara 'Ba E'yo Lipi 'Diyini 2 Bible Online

'Ba E'yo Lipi 'Diyini 2 - lugbara bible

'Ba E'yo Lipi 'Diyini 2

¹Malaika Yehovani nga etu mu engazu Giligalia cazu Bokimua. Eri ’yo ra, Ma ofu emi, emi ejizu engazu Misiriasi, ma eji emi angu nde mani oyo sozu ani emi a’bipi beria ra. Ma ’yo ndra kini, Ma ngani aziza mani emi beri nyo ku,

²te emi ma azi aziza ’ba ovupi angu ndea ’diyi be ku; emi ma onyo pari yini edeta edezu ’diyi va. Te emi erini ma o’duko ku. Emi ’ye ’dini a’disi ya?

³E’yo ’disi ma ’yo di ani, Ma ngani yi ofu dro emi miliarisi ku; te yi nga ovu ekile ocile emi ejea, azini adrou yini nga ovu embaru emi dri.

⁴Te eri nga eca ’dini, malaika Yehovani ka e’yo ’diyi ’yo anzi Israelini dria ma tia ra, ’ba nde nga di yi ma o’duko enga, wu mindresi.

⁵Yi ’da angu nderimaru Bokimu’i; yi ede edeta Yehova dri ’daa indi,

⁶Te Yosua ka ’ba nde ma ti pe muzu ’bo, anzi Israelini yi mu ’ba alu alu awuruso yini vu angu nde bizu yiniru.

⁷’Ba nde nga azi Yehova dri o’du Yosuani ma alia dria, azini o’du ’ba ’wara ovupi idriru Yosua ma vutia, azi amboru Yehovani erini ngale Israeli driri ndrepi ra ’diyinia dria.

⁸Te Yosua Nuni mvi ati’bo Yehovaniri nga di dra ra, de eli erini ca turu alu drini mudri ’bo.

⁹Sa eri angu erini ’dule awurusoruri ma kalatia Timinatiheresia, angu oni ruaa Efiraimua, oni Gaasi ma kala andraleruria.

¹⁰Te a’bianzi nde dria mu a’bipi yini drapi ’bo ’eliyi vu; a’bianzi azini enga yi ma vutia ra, yi ’ba Yehovani nipi ku, kani azi erini ndra ’yele Israeli driri nipi ku ’eliyi.

¹¹Anzi Israelini nga di e’yo ovupi onzi Yehova ma miliari ’ye’i, yi nga azi nga adrou Baaliru ’diyi dri;

¹²yi ku Yehovani, Mungu yi ma a’bipiniri ra, yi ejipi engazu angu Misiriasiri’i; yi bi Mungu andini ’diyi ma vuti, adrou ’ba nde ndra ovupi yi ma ageia ’eliyini’i, yi avu va yi dri; fe ani Yehovani ovuzu adrasi.

¹³Te yi ku Yehovani ra, yi nga azi Baali pi dri Asitaroti ’diyi be.

¹⁴’Dini adra Yehovani ko eli ti ani Israeli ma ruaa, eri nga eli yi fe ani ’ba ’ba ezapi ’diyi ma dria yi ezazu; eri fe yi jezu ari’ba yini yi ma ageia ’eliyi dri, ’dini yi econi di nga pa sozaru ari’ba yini ma milia dika ku.

¹⁵Pari yini fuzu muzuria, ka ovu ngoa ti, Yehova ma dri ovu yi ma ruaa e’yo onzi ejizu, ekile Yehovani ’yolerile, azini ekile Yehovani oyo sole yi dririle; ’dini yi asi oti tu.

¹⁶Yehova nga di fe ’ba e’yo lipi ’eliyini engazu, yi ’ba nde ’eliyi opapi ’ba yi ezapi ’diyi ma dria ’diyi.

¹⁷Te kiri yi erini ’ba yi ma e’yo lipi ’eliyi ma e’yo ku; te yi mu ali o’bazu acizu Mungu azini ma vutia, yi avu va adrou nde ’eliyi inzizu; yi oja yi kalaa mbele geri ndra yi a’bipi pini acizu azita Yehovani inzizuri kuzu; te yi ’yeni ’dini ku.

¹⁸Yehova ka ’ba e’yo lipi ’diyi fe engazu yi dri, eri ovu eli ’ba nde e’yo lipiri be, eri opa yi ari’ba yini ma dria ewu ’ba nde e’yo lipirinirisi dria; a’disiku Yehovani i asi ojalerisi awu yini wule ’ba yi inzapi ’diyisi azini ’ba yi ecandipi ’diyisiri ma e’yosi.

¹⁹Te eri nga eca ’dini, ’ba e’yo lipiri ka dra ’bo, yi asi eli vile, yi ’ye e’yo onzikanyaru aga yi ma a’bipini ndra ’yele ’diyi ra, yini adrou yini ma vuti biria, azi ngazu yi dri, yini avuzu va yi vu indi; yi kuni ’yeta yini ’diyi ku, kani geri asi mbazaniri ku indi.

²⁰’Dini adra Yehovani ko di ti Israeli ma ruaa; eri ’yo ra, Suru ’dirini aziza mani ndra azile yi a’bipi beri ezalerisi, azini yini ma o’duko erile kurisi,

²¹ma’i indi, engazu curu’do ma ngani suru ndra Yosuani kule de nga eri drani ku ’diyi ma aluni dro yi ma miliarisi ku,

²²’dini e’yo yinisi ma ma ama Israelini ani, kani yi nga geri Yehovani ma ta mba acizu alenia ekile yi a’bipini ndra tani mbale acizurile ra ya, kani yo yani.

²³’Dinile Yehova ku suru nde ’diyi, droni yi mbele ku, eri feni vini yi Yosua ma dria ku indi.