Read lugbara 'Ba E'yo Lipi 'Diyini 20 Bible Online

'Ba E'yo Lipi 'Diyini 20 - lugbara bible

'Ba E'yo Lipi 'Diyini 20

¹Anzi Israelini nga di fu amve dria, ’ba ongulumuru oku yi tualu ekile ’ba alule, engazu Daniasi cazu kpere Beeri-sebaa, ’ba angu Gileadinia ’diyi pie, Yehova vu Mizipaa.

²Azini ’ba ’wara ’bani dria, ada opi suru Israelini dria ma drilia ’diyi, nga yi e’da okuza ’ba Munguni ’diyinia, yi asikari acipi pasi alifu turu su ovupi sei be yi ma dria’diyi.

³(Te anzi Benyaminini Inga eri kini anzi Israelini yi tu uru Mizipaa.) Te anzi Israelini ’yo ra, Emi olu ama tia, e’yo onzi ’diri ’ye i ngoni ngoni ya?

⁴Te ’ba Levini, oku ’bani fuleri ma agupi, omvi e’yo kini, Ma emu Gibea Benyamininiria, ma’i oku mani ati’boruri be, lazu ’daa.

⁵’Ba Gibeaa ’diyi enga ma ruaa, ace jo agei ma dri inisi kuru; ma’iruni yi le ma fu ra, te yi uru oku mani ati’boruri okposi, eri dra ra.

⁶Ma ’du ani oku mani ati’boruri ma avu ra, oli eri nyiri nyiri, ma pe tini suru awita a’ipi angu Israelinia ’diyi ma alia dria; yini e’yo drinzaru azini onduaako ’yele angu Israeliniarisi.

⁷Emi lu, emi anzi Israelini, emi dria, emi fe di imbata onyiru azini e’yo amaza emini ’doa fo!

⁸Te ’ba dria yi enga ekile ’ba alule, kini, ’Ba amani aluni ngani mu hema inia ku, azini ama azi aluni ngani i oja muzu i vile joa ku.

⁹Te curu’do afa amani ngale ’yele Gibea vuri eri ’di: ama nga tu mu a’di ’dizu eri be amutisi odrisini awalerile;

¹⁰ama nga ’ba o’du mudri mudri ’ba turu alu alu vusi suru Israelinia dria, azini ’ba turu alu engazu ’ba alifu alu alia, azini ’ba alifu alu engazu ’ba alifu mudri ma alia, muzu nyaka ejizu ’ba nde dri, ’dini yi ka eca Gibea Benyamininiria yi ma ’ye eri, e’yo azaza dria yini ’yele Israelia ’diyi ma vusi.

¹¹’Dinile ’ba Israelini ’diyi oku yi dria a’di ’dizu aku nderi be, yi ovu ecizaru tualu ekile ’ba alule.

¹²Azini suru Israelini yi ope ’ba ti suru Benyaminini ma eselia dria, ’yozu kini, E’yo onzi i ’yepi emi eselia ’diri eri ngoni ya?

¹³E’yo ’disi curu’do emi ma fe ’ba nde, anzi Belialini ovupi Gibeaa ’diyi ama dri, ’dini ama ma ofu yi ani, ama ma wu e’yo onzi Israeli ma aliasi amve. Te Benyamini leni o’duko yi adripi anzi Israelini ’diyini erizu ku.

¹⁴Te anzi Benyaminini oku yi tualu engazu aku ambo ambo ’diyi ma alia cazu Gibeaa, muzu a’di ’dizu anzi Israelini be.

¹⁵La anzi Benyaminini ma kalafe o’du ’dasi, engazu aku ambo ambo ’diyi ma alia, yi ’ba alifu kali iri drini azia, ’ba ovupi sei be ’diyi, drinia ’ba angu Gibeaa, ovupi lazaru ’ba opeza turu aziri ’diyi yi indi.

¹⁶’Ba’diyi ma eselia dria, ’ba opeza ndra turu aziri dri eji be ’diyi; yi ma dri ndri tu, yi eco dribi efi alu ’bezaru onisi pi.

¹⁷La ’ba Benyaminini ra, te la ’ba Israelini indi, yi ’ba sei be ’diyi alifu turu su; ’ba ’diyi ndra dria ’ba omba ma e’yo nipi ’diyi.

¹⁸’Dini anzi Israelini enga ra, nga tu uru Betelia, mu e’yo amaza zizu Mungu ma tia, kini, A’dini nga tu amani oko a’dia, a’di ’dizu anzi Benyaminini beni ya? Te Yehova ’yo ra, Yudani nga tu okoni,

¹⁹Anzi Israelini nga di enga o’bitisi, hema asozu a’di ’dizu Gibea be.

²⁰’Ba Israelini nga di fu mu a’di ’dizu ’ba Benyaminini be; ’dini ’ba Israelini yi oti yi a’di ’dizu yi be Gibeaa ’daa.

²¹Te anzi Benyaminini nga efu Gibeaarisi, emu ’ba ofuzu, ’ba o’de nyakua ’ba Isralini ma eselia o’du ’dasi alifu kali iri drini iri.

²²Te ’ba nde ’ba Israelini ’diyi nga di yi ma asi omi, nga yi oti a’di ’dizu dika pari ndra yini yi otile a’di ’dizu o’du okorisiria.

²³Azini anzi Israelini tu uru mu wuzu Yehova ma milia kpere ondresi; yi zi Yehova ma tia kini, Ma nga ma osi ogogo a’di ’dizu anzi Benyamini ma adripini be dika ya? Te Yehova ’yo ra, Mi tu a’di ’dizu eri be.

²⁴’Dini anzi Israelini yi emu ogogo a’di ’dizu anzi Benyaminini be o’du pale iririsi.

²⁵Te Benyamini efu Gibearisi mu a’di ’dizu yi be o’du pale iririsi, ofu anzi Israelini dika, ’ba o’de va nyakua ’ba alifu mudri drini aro; ’ba nde dria ovupi sei be ’diyi.

²⁶E’yo ’disi anzi Israelini dria, ’ba nde be dria, tu emu Betelia, wu ra; yi ori Yehova ma milia ’daa, nyani nyaka o’du nde ’dasi ku kpere ondresi, ede edeta vezaru ’diyi pi edeta asi anzuruni ’diyi be Yehova ma milia.

²⁷Te anzi Israelini nga e’yo zi Yehova ma tia (a’disiku sanduku aziza Mungunirini ovu o’du ’dasi ’daa indi,

²⁸azini Finehasi, Eleazari Aroni mvi ma mvi, so pa drilenia o’du nde ’diyisi), ’yozu kini, Ma nga kiri mu a’di ’dizu anzi Benyamini ma adripini be dika, kani ma asi di ’dia ya? Te Yehova ’yo ra, Mi ma tu; drusi mani ngale eri fele mi driarisi.

²⁹Israeli nga di ’ba ’ba mbapi ’diyi o’ba Gibeani acezu kuru.

³⁰’Dini anzi Israelini tu a’di ’dizu anzi Benyaminini be o’du pale narisi, mu yi oti a’di ’dizu Gibea be yini ’yele etu oko ’diyisirile.

³¹Te anzi Benyaminini fu a’di ’dizu ’ba nde be, yi ovu sezaru aku ndearisi amve; yi e’do ’ba nde ocozu azini ofuzu ekile o’du oko ’diyisirile, gboko ’diyi ma alia, gboko nde ma aluri mu tuzu Betelia, aziri mu Gibeaa nga alia ’daa, yi ofu ’ba Israelini ekile kali nale.

³²Ka’dini anzi Benyaminini ’yo, Yi ovu ofuzaru ama milia va ekile okorile ’bo. Te anzi Israelini ’yo ra, Ama ma apa ra, ama di nga yi se aku ndearisi amve kpere gboko amboru ’diyi vu.

³³Azini ’ba Israelini enga uru dria pari yiniasi, oti yi a’di ’dizu Baali-tamaria; ’ba Israelini ’ba mbapi ’diyi efu okposi pari yini ma alia Maare-gebaa indi.

³⁴’Ba opeza alifu mudri engazu ’ba Israelini dria ma eselia emu a’di ’dizu Gibea be, a’di nde ovu okporu tu; te yi nini ndra kini e’yo onzi ovu yi vu ogogo ’dinini ku.

³⁵Yehova ofu ’ba Benyaminini Israeli ma drilia; anzi Israelini ofu ’ba Benyaminini o’du ’dasi alifu kali iri drini towi drini turu alu; ’ba ’diyi dria ovupi sei be ’diyi.

³⁶’Dini anzi Benyaminini ndre ’ba ofu yi ra. Te ’ba Israelini nga pari fe Benyamini dri, a’disiku yi ’ba yi asi ’ba yini o’bale ’ba mbazu a’di ’dizu Gibea be ’diyi ma dria.

³⁷’Ba ’ba mbapi ’diyi yi ’ye mbele, nzu rugbu Gibea ma dria; ’ba ’ba mbapi ’diyi osi yi ogogo, ofu ’ba aku ndea ’diyi dria sei ma sisi.

³⁸Te eceta ’ba Israelini pini edele yi ma eselia ’ba ’ba mbapi ’diyi beri eri ’dini, kini yi ma ’ba acika ma enga uru amboru iritile aku nderi ma alia.

³⁹’Ba Israelini nga yi oja a’dia; te ’ba Benyaminini e’do ’ba Israelini ocozu azini ofuzu, ’ba ekile kali nale; yini ’yolerisi, Ofu yi va ama drilia ekile a’di okori ma aliarile ’bo adaru.

⁴⁰Te acika iritileri ka ’ba enga uru aku amboru nde ma alia, acika pa sopi pirirurisi, ’ba Benyaminini nga angu ndre yi ma ngukualeru; te mi lu, aku nderi ve dria, acikani tu ’bua.

⁴¹’Ba Israelini nga di yi oja dika, te ’ba Benyaminini ma asi oti tu, yini ndrele e’yo onzi eca yi ma dria ’borisi.

⁴²E’yo ’disi yi oja yi ma nguku ’ba Israelini ma milia apazu geri angu roko driaria; te ’ba nde bi yi ma vuti a’di ’dizu okposi, azini ’ba efupi aku ambo ambo ’diyia ’diyi ofu yi agadua ’daa ra.

⁴³Yi ace ’ba Benyaminini kuru, dro yi ra, yi otu yi va pari yini ava lizuria kpere cazu angu i otipi Gibea beria etuni ef’urialeru.

⁴⁴’Dini ’ba Benyaminini o’de fuzaru alifu mudri drini aro, yi dria ’ba asi teza be ’diyi.

⁴⁵Te yi nga yi oja ra, apa angu roko driari vuleru oni Rimonia; yi nda ’ba acepi ’diyi ma joloko ’bani anya vile lolerile, ofu yi gbokoa ’ba alifu towi, bi yi ma vuti okporu kpere Gidomua, ofu yi ma azi alifu iri ra.

⁴⁶’Dini ’ba dria o’depi ’ba Benyaminini ma eselia o’du ’dasi ’diyi ndra alifu kali in drini towi, ’ba ovupi sei be ’diyi, yi dria ’ba ovupi asi teza be ’diyi.

⁴⁷Te ’ba turu azia oja yi, apa angu roko driari vuleru kpere oni Rimonia, yi ovu oni Rimoni ma dria mba su.

⁴⁸’Ba Israelini nga yi oja ’ba Benyaminini ma dria dika, nga yi ofu sei ma sisi tualu aku yini be dria, anyapa pie, afa yini isule ’dale ’diyi pie dria. Drinia aku ambo ambo yini isule ’diyi dria, yi ’ba tini vezu acisi ra.