Read lugbara 'Ba E'yo Lipi 'Diyini 21 Bible Online

'Ba E'yo Lipi 'Diyini 21 - lugbara bible

'Ba E'yo Lipi 'Diyini 21

¹Isu de ’ba Israelini so ndra oyo Mizipaa, kini, ’Ba aluni ama eselia ngani i ma zini fe Benyamini dri okuru ku.

²’Ba nde nga di emu Betelia, ri ’dale kpere ondresi Mungu ma milia, yi enga yi ma o’duko uru wuzu okposi tu.

³Yi ’yo ra, Yehova la, Mungu Israeliniri, e’yo ’di eca Israelia ngoni ngoni ya, kini andru suru alu Israeli ma eselia avi ra?

⁴Te eri nga eca drusi’dini, ’ba nde nga enga drio drio, nga pari edeta edezuri si ’daa, nga edeta vezaru ’diyi pi ede edeta asi anzuruni ’diyi be.

⁵Anzi Israelini nga ’yo kini, Suru Israelini dria ma eselia ’ba etupi emupi okuzaa Yehova vu kuri -a’di ya? A’disiku yi so oyo amboru ’ba etupi Yehova vu Mizipaa kuri ma e’yosi, kini, Eri nga ovu fuzaru ’adaru.

⁶Te anzi Israelini oja yi ma asi Benyamini yi adripi ma e’yosi, yi ’yo ra, Yi nze suru alu ’ba Israelini ma eselia o’du ’disi ’bo.

⁷Te ama nga ’ye ngoni ’ba acepi ’diyi ma oku ma e’yosi ya, amani oyo sole Yehova ma rusi kini, Ama ngani ezoanzi amani fe yi dri okuru kurisi?

⁸Te yi ’yo, Suru Israelini ma eselia suruti etupi Yehova vu Mizipaa kuri, a’di’i ya? Te mi lu, ’ba aluni emuni ndra okuza ndea engazu Yabesi-gileadia ku.

⁹A’disiku yini ’ba ma kalafe laria, mi lu, ’ba ovupi angu Yabesi-gileadia ’diyi ma aluni yi ma eseliani yo.

¹⁰’Ba ongulumuru nga ’ba okporu tu ’diyi ma azi alifu mudri drini iri ma ti pe ’dale, azi yi tia kini, Emi mu, emi ofu ’ba ovupi angu Yabesigileadia ’diyi sei ma sisi; oku yini pie, anzi nyiri nyiri ’diyi be.

¹¹Emi nga afa ’diri ’ye’i; emi nga agupi piyi dri ja teketeke, oku dria mupi agupia ’bo ’diyi be.

¹²Te yi isu ’ba ovupi Yabesi-gileadia ’diyi ma eselia ezoanzi aliriaru nga agupi nipi ku, lapi nga agupi be ku ’diyi turu su; yi nga yi eji pari yini hema asozuria kpere Silo angu Kananiniaria.

¹³Te’ba ongulumuru dria nga ’ba ti pe e’yo ’yozu anzi Benyaminini ovupi oni Rimoniari ma dria ’diyi ma tia, olu e’yo asi anzuruni yi dri.

¹⁴Benyamini emvi di etu ’dasi; yi fe yi dri ezoanzi ndra yini opale idriru oku Yabesi-gileadia ’diyi ma eselia ’diyi; te kiri funi dri yisi ku.

¹⁵’Ba nde oja yi asi Benyamini ma e’yosi ra, a’disiku Yehovani suru Israelini ma azi anyolerisi.

¹⁶’Ba ’wara ’ba ongulumuru ma drilia ’diyi nga di ’yo, Ama nga e’yo ngoniri ’ye ’ba acepi ’diyi ma oku ma e’yosi ya, yini oku dri jale Benyamini ma alia ’borisi.

¹⁷Yi ’yo ra, Awuruso ma ovu ’ba Benyaminini apapi ’diyi dri ci, suru alu kazu ovuzu inizaru Israeli ma alia ku.

¹⁸Te ama ma fe ezoanzi amani yi dri okuru ku. A’disiku anzi Israelini yini oyo sole ’bo, kini, ’Ba oku fepi Benyamini driri ma ovu trizaro ransi,

¹⁹Te yi ’yo, Emi lu, omu Yehovani eli vusi eli vusi Siloa indi; aku nde ovu Beteli ma kala andraleruria, gboko tupi engazu Beteliasi mupi Sekemuari ma kala etuni efurialeruria, Lebona ma kala uruleruria indi.

²⁰’Dini yi nga anzi Benyaminini azi kini, Emi mu ’ba mbazu amvu zabibu pati beria,

²¹azini emi ndre; emi lu, ezoanzi Siloa ’diyi ka efu ongo tuzu, emi fu di amvu zabibu pati beriasi indi, ’ba dria alu alu ma bi ezoanzi nde Siloa ’diyi ma azi okuru, emi nga di mu, angu Benyamininia.

²²Te eri nga ovu ’dini, yi ma atapi kani adripi ka emu alini wuzu ama vu ra, ama nga ’yo, Emi fe yi asi ndrizasi ama dri fo! A’disiku ama o’duni ndra oku engazu ombaarisi ’ba yini alu alu, dri ku, emi indi, emi feni ndra yi yi dri ku; ka ndra fe ra, isu e’yo nga ovu emi dria.

²³Ami Benyaminini nga ’ye ’dinile, yi o’du yi yi ma okuru, kalafe yini vusi, ’ba ongo tupi ’diyi ma eselia; yi mu ra, mvi awuruso yinia, si aku ambo ambo ’diyi ra, ovu yi ma alia.

²⁴Anzi Israelini enga ’daarisi etu ’dasi, ’ba dria alu alu mvizu suru ini vu, azini ori’ba ini vu, yi fu ’daarisi ’ba dria alu alu muzu awuruso ini vu.

²⁵O’du nde ’dayisi isu de opi Israeli ma drilia yo; te ’ba dria alu alu ’ye e’yo ovupi onyiru i ngulupi ma miliari’i.