Read lugbara 'Ba E'yo Lipi 'Diyini 9 Bible Online

'Ba E'yo Lipi 'Diyini 9 - lugbara bible

'Ba E'yo Lipi 'Diyini 9

¹Abimeleki Yerubaali mvi nga di mu Sekemuaua i andri ma adripi vu, ’yo yi tia azini ori’ba andri ma ati vile joa ’diyi be dria kini,

²Emi ’yo e’yo, ma zi emi tia, ’ba Sekemua ’diyi ma bilia dria, kini, Kani eri onyiru emi dri anzi dria Yerubaalini kali aziri ’diyi ma nya opi emi drilia, aga kani ’ba aluni opi nyazu emi driari ya? Emi ma ega alu indi ma ovu fala emini za emini be indi.

³Eri ma andri ma adripi nga di e’yo ’diyi olu dria ’ba Sekemua ’diyi ma bilia e’yo erinisi ra; yi nga di yi ma asi ’ba Abimeleki ma vuti bizu ani, yini ’yole kini, Eri ama adripi’irisi.

⁴Yi nga eri dri silingi dahaburu fe kali aziri engazu jo Baali-beritinia, Abimeleki nga ani ’ba toko toko acipi saaru ’diyima oya ofe yini eri vuti bizu.

⁵Te eri mu fi i ati vile jo Ofiraaria, ofu i adripi anzi Yerubaalini, ’ba kali aziri ’diyi, oni alu ma dria; te Yotamu Yerubaali ma mvi vileri aceni, erini i zile rarisi.

⁶Te ’ba dria Sekemua ’diyi nga yi oku tualu, ori’ba Miloni ’diyi be dria, nga Abimelekini ’ba opiru kumara pati idiaru Sekemuari ma tia.

⁷Te yi ka e’yoni olu Yotamu ma tia ’bo, eri mu pa so oni Gerizimu ma dria, enga i ma o’duko uru, oyu uru ’yo yi ma tia kini, Emi eri ma, emi ’ba Sekemua ’diyi la, Mungu ma eri emi ma e’yo ani.

⁸Pati dria mu etu alusi odu osuzu opi ma dria opi nyazu yi ma drilia; yi ’yo mizeitu pati ma tia, Mi nya opi ama drilia mi’i.

⁹Te mizeitu pati ’yo yi ma tia, Ma eco te odu mani kuzaru, yini ani masi Mungu pi inzizu ’ba be, ma ma mu ma oya ’dile azini ’dole pati azini ’diyi ma drilia ya?

¹⁰Pati piyi nga ’yo elio pati ma tia, Mi emu opi nyazu ama drilia mi’i.

¹¹Te elio pati ’yo yi ma tia, Ma eco te aluza mani kuzaru, efi onyiru maniri be, ma ma mu ma oya ’dile azini ’dole pati azini ’diyi ma drilia ya?

¹²Pati piyi nga vini ’yo zabibu pati ma tia kini, Mi emu opi nyazu ama drilia mi’i.

¹³Te zabibu pati ’yo yi ma tia, Ma eco te patiefi su mani ayiko fepi Mungu pi dri ’ba beri kuzaru, ma ma mu ma oya ’dile azini ’dole pati azini ’diyi ma drilia ya?

¹⁴’Dini pati dria nga di ’yo pati oci beri ma tia, Mi emu opi nyazu ama drilia mi’i.

¹⁵Te pati oci beri ’yo pati nde ’diyi ma tia, Emi ka odu osu ma dria ovuzu opiru emi drilia e’yo adasi, emi emu di a’ita ’ba ma endria; te ka’dini ku ad ma efu pati oci beri ma aliasi, ma ve mario pati Lebanonia ’diyi ra.

¹⁶Curu’do e’yo ’disi, emi ka ndra ’ye adaru e’yo kililirisi, emini Abimelekini ’bazu opirurisi, azini emi ka ndra ’ye onyiru Yerubaali pi be ori’ba pie, emi ka ndra e’yo dri fupi ’yeta eri ma drini ’yeleri beri ’ye, eri dri ra-

¹⁷te ma ati ’di a’di emisi, adi i ma idri dra dri, opa emi ’ba Midianini ma dria ra;

¹⁸te emi enga a’di ’dizu ma ati ma ori’ba ma ruaa o’du ’disi, emi ofu anzi erini, ’ba kali aziri ’diyi oni alu ma dria, emi ’ba Abimeleki oku erini ati’boruri ma mvini opiru ’ba Sekemua ’diyi ma drilia, erini ovule adripi eminirisi-

¹⁹te ti, emi ka ’ye adaru e’yo kililirisi Yerubaali pi vu ori’ba erini pie o’du ’disi ra, emi ma ovu di ani ayikosi Abimelekisi, azini eri ma ovu vini alu ayikosi emisi;

²⁰te ka’dini ku, aci ma efu Abimeleki ma aliasi, ma nya ’ba Sekemua ’diyi ra, ori’ba Miloni pie; azini aci ma efu ’ba Sekemua ’diyi piyi ma aliasi ori’ba Miloni be, ma nya Abimelekini ra.

²¹’Dini Yotamu nzu apa ra, eri mu Beeria, eri ovu ’dale, Abimeleki i ma adripi ma urisi.

²²Abimeleki ovu di opimvaru Israeli ma drilia eli na.

²³Te Mungu nga orindi onzi ti epe Abimeleki pi ma eselia ’ba Sekemua ’diyi be; ’dini ’ba Sekemua ’diyi ’ye lokirisi Abimeleki vu;

²⁴’dini e’yo onzi ndra ’yele anzi kali aziri Yerubaalini ’diyi ma ruaari ma eca ani, azini ari yini ma ovu yi adripi Abimeleki ma dria, eri yi ofupiri’i, azini ’ba Sekemua ’diyi ma dria, yi ’ba okpo fepi dri erini dri adripi erini ofuzu ’diyi.

²⁵’Ba Sekemua ’diyi o’ba ’ba amba mbapi ’diyi eri tezu oni dria, azini yi opa afa ’ba dria emupi ’dasi ’diyini ra; te yi olu e’yoni Abimeleki ma tia ra.

²⁶Azini Gaali Ebedi mvi emu i adripi be, zo kpere ca Sekemua; ’ba Sekemua’diyi ’ba asi eri ma dria ra.

²⁷’Dini yi fu mu nga alia, mu zabibu patiefi okuzu, yi nzi suni pasi ra, yi ’ba omu inzitaru, fi di adrou yini ma joa, yi tri Abimelekini indi.

²⁸’Dini Gaali Ebedi mvi nga di ’yo kini, Abimelekini a’di’i ya, azini Sekemu eri a’di’i ya, amani azi ngazu yi dri ani beni? Eri ovuni Yerubaali mvi’i ku ya? ’Ba ’ba dri cepi eri ma palaari Zebuli’i ku ya? Emi ma nga azi ’ba Hamori Sekemu ati vile ’diyi drini; te ama ma nga azi eri dri a’disi ya?

²⁹Mungu ka te ba ’diyi fe ma dri rarisi! Ma te Abimelekini ofu ’diarisi ra. Eri nga di ’yo Abimeleki ma tia, Mi o’ba asikari mini kakau, mi efu amve.

³⁰Zebuli ’ba aku nderi, fila dri cepiri ka e’yo Gaali Ebedi mvini ’yole ’diyi eri ra, adra erini ve aciru.

³¹Eri nga di ’ba ti pe Abimeleki vu oyokolosi kini, Mi lu, Gaali Ebedi mvi pi adripi be eca Sekemua ’bo; te mi lu, yi omi aku nderi okposia’di’dizu mi be.

³²Curu’do e’yo ’disi mi ma enga inisi, ’ba ovupi mi be’diyi be, emi mu yi te nga alia.

³³Te eri nga ovu ’dini, o’bitisi, etuni efuzu ’boria, mi ma enga drio, nzuzu a’di ’dizu aku nderi be; azini mi lu, eri’i ’ba ovupi eri be ’diyi be ka efu a’di ’dizu mi be ra, mi eco yi ’yezaru mini ecolerile,

³⁴Abimeleki nga di enga inisi, ’ba ovupi eri be ’diyi pie, emu ’ba Sekemua ’diyi tezu, yi awa yi esele su.

³⁵Gaali Ebedi mvi nga efu ra, nga pa kalitile fizu aku ndearia; te Abimeleki enga ra, ’ba ovupi eri be ’diyi pie, engazu pari yini yi mbazuria.

³⁶Te Gaali ka ’ba nde ndre ’bo, eri ’yo Zebuli ma i ria; Mi lu, ’ba yi esi engazu oni driarisi ’daa! Te Zebuli ’yo eri ma tia, Mi ndre mini oni endrilendri ekile ’bale’i yani.

³⁷Gaali nga di ’yo dika kini, Mi ndre, ’ba yi esi va angu agaduarisi, azini esele aluri emu geri kumara pati Meonenimuari vurisi,

³⁸Zebuli nga di ’yo tinia, Tile mini curu’do ngoa ya, ndra ’yopi kini, Abimelekini a’di’i ya, amani azi ngazu eri dri ani beni-ri? ’Ba ’diyi ovuni ’ba ndra mini edele ede ’diyi’i ku ya? Mi fu di, mua’di ’dizu yi be.

³⁹Gaali nga di fu ’ba Sekemua ’diyi ma drilia ra, ’di a’di Abimeleki be ra.

⁴⁰Te Abimeleki dro eri, eri apa drilenia ra; ’ba kakau o’de ebi be kpere pari ’bani fizu kalitilearia.

⁴¹Abimeleki nga di ovu Arumaa; azini Zebuli nga di Gaalini dro adripi erini pie, yi ma ovu Sekemua ku beni.

⁴²Nga eca drusi ’dini, ’ba nde fu mu nga alia ra. Yi olu e’yoni Abimeleki ma tia ra.

⁴³Eri ’du ’ba nde yi, awa yi esele na, amba mbazu nga alia; te eri ndre, mi lu, ’ba yi efu aku ndeasi, eri nga di enga a’di ’dizu yi be, yi ofuzu.

⁴⁴Abimeleki pi ’ba eri be awale ongulumu vusi ’diyi pie, yi afi rri nzuzu drile, pa sozu pari fizu aku nde ma kalitilearia; esele awaza yini iri ’diyi nzu ’ba dria ovupi nga alia ’diyi ma driasi, ofu yi ra.

⁴⁵Abimeleki nga a’di ’di aku nderi be o’edu nde ’dasi zu; bi aku nderi ra, ofu ’ba alenia ’diyi ra; eri ogba aku nderi va, ri a’i alenia ci.

⁴⁶’Ba dria jo izuru Sekemuari ma alia ’diyi ka e’yoni eri ra, yi fi jo Eli-beritini ma pari okporu ma alia.

⁴⁷Yi olu Abimeleki tia kini ’ba dria jo izuru Sekemuaria ’diyi oku yi tualu ’bo.

⁴⁸Abimeleki nga tu oni Zalimonia, eri’i ’ba ovupi eri be ’diyi be dria; Abimeleki nga ogara ’du i ma dria, eri ga ani pati arakala alu pati ruaarisi, ’du eri ra, ’ba eri i ma gbudria. Eri ’yo ’ba ovupi eri be ’diyi ma tia, Afa emini ndrele mani ’yeleri, emi ’ye mbele ekile mani ’yele ’borile.

⁴⁹Te ’ba dria ’ye ’dinile, ’ba dria alu alu yi oga pati arakala yini, bi Abimeleki ma vuti, o’ba yi pari okporu nde ma tia, ’ba yi ma ti acisi yi oveze ra, ’dini ’ba jo izuro Sekemuaria ’diyi odra dria indi, yi ma kalafe ekile ’ba alifu alule, agupi pie okuyi be.

⁵⁰Abimeleki nga di mu Tebezia, aso hema ’daa a’di ’dizu Tebezi be, bi eri ra.

⁵¹Te isu jo izuru okporo aku nde ma alia indi, ’ba dria agupi piyi oku pie nga apa alenia, ’ba dria ovupi aku nde ma alia ’diyi be, yi opi tini ci, tu jo izuro nde ma karia dria uru.

⁵²Abimeleki nga di eca jo izuro nderi vu, ’di a’di eri be, azini eri le ca jo izuro nderi ma tilea okposi eri evezu acisi.

⁵³Te oku alu e’be onimva anya ’izuri Abimeleki ma dria, nyo eri ma drifala ra.

⁵⁴Eri nga di karilau i vile afa ombani ’dupiri omve mbele, ’yo tinia kini, Mi enze sei mini, mi fu ma ani, ’ba kazu ’yozu masi ku kini, Oku fu erini, ’Dini karilau eri vileri nga di eri so ra, dra ra.

⁵⁵Te ’ba Israelini ka ndre kini Abimeleki dra ’bo, yi mvi ’ba dria alu alu muzu yi ma paria.

⁵⁶’Dini Mungu ofe di e’yo onzi Abimelekini, erini ndra ’yele i ati vu, erini i adripi kali aziri ’diyi ofuzuri ma avu arioti ra;

⁵⁷azini e’yo onzi dria ’ba Sekemua ’diyini ’yeleri Mungu ofe di yi ma dria, te trita Yotamu Yerubaali mvini eca yi ma dria ra.