Read lugbara 2 Yohana 1 Bible Online

2 Yohana 1 - lugbara bible

2 Yohana 1

¹Atalau, oku ovupi pezaruri pi vu anzi erini be, mani lele e’yo adaru ma alia ’diyi; ma’i a’dule ku, te ’bale dria e’yo adaru nipi ’bo ’diyi;

²e’yo adaru ovupi ama aliari ma e’yosi, eri nga ovu ama be ’dani ’dani:

³’Yeta anzutiri pi, yiki pie, asi anzuru be, engapi Mungu Ata vu azini Yesu Kristo Mvi Atani vuri nga ovu ama be, e’yo adaru azini leta avasiri ma alia.

⁴Ma ovu ayikosi tu mani anzi mini’diyi ma azi isule yini aciria e’yo adam ma aliarisi, ekile amani azita a’ile Ata vurile.

⁵Te curu’do ma zi mi, oku la, ekile mani azita o’diru sile mi vurile ku, te azita nde ovupi ama be okokeleri’i, kini, ama ma le ama.

⁶Leta eri ’di, amani acizu azita erini ’diyi vusiri’i; azita nderi ’di, ekile emini erile okokelerile ’dini emi ma aci ani eri ma alia.

⁷A’disiku ’ba ’ba icipi ’diyi efu nyakua kakau, yi ’ba e’dapi kini Yesu Kristo emuni rua ’bani be ku ’diyi. ’Diri ’ba ’ba icipiri azini ari’bo Kristoni.

⁸Emi ma ovu mile be lemi ngulupi ma agei tezu, afa emini azi ngazu ’bo ’diyi kazu avizu emi dri ku, te emi ma isu oyani dria beni.

⁹’Ba dria nzupi drile yi drisi, tepi ’imbata Kristoni ma alia ku ’diyi, ovuni Mungu be ku; te ’ba ovupi limbata nde ma alia ’daniri, ’ba ’diri ovu Ata be, Mvi be indi.

¹⁰’Ba azini ka eca emi vu, ka imbata ’diri eji ku, emi ma a’i eri jo emini ma alia ku, emi ma fe eri dri i zi mi ci ci ku;

¹¹a’disiku ’ba i zi mi ci ci fepi eri driri, eri ti eci eri be azi onzi erini ’yele ’diyisi.

¹²Ma ovu e’yo be kakau sizu emi vu, te ma leni yi si waraga bi ma dria vinosi ku, te ma le avasi muzu emi vu, e’yo ’yozu emi be milia milia, ’dini ayiko emini ma ga ani tre beni.

¹³Amvipi mini ovupi pezaruri ma anzi zi di mi ci ci.