Read lugbara E'yo Eceza 1 Bible Online

E'yo Eceza 1 - lugbara bible

E'yo Eceza 1

¹E’yo eceza Yesu Kristoni, Mu-nguni fele eri dri e’yo ngapi yi ’yepi mbele ndo ’diyi ecezu ati’ba erini ma tiari; eri pe tini malaika erini vurisi, e’yo nde ecezu ati’bo erini Yohana ma tia;

²eri’i eri nze e’yo Munguni pi ma eti, e’yo nzeza Yesu Kristoni be, ada afa dria erini ndrele ’diyi.

³’Ba e’yo ’diri lapiri pi yi drilebaru, ’ba e’yo ondriza eripi, e’yo sile aleniari ta mbapi ’diyi be; a’disiku ewuniri ogogo.

⁴Yohana si Asiaa ’diyi vu: ’Yeta anzutiri pi ma ovu emi vu asi anzuru be, engazu ’ba ovupi curu’do indi, azini ovupi andra, azini emupi ndori pi vu, orindi aziri ovupi oguna erini ma drilia ’diyi pie,

⁵Yesu Kristo pie, eri ’ba e’yo eti nzepi adaruri, ’ba tile oko ’ba draza ma eseliari, ’ba opi a’biru nyakua ’diyi ma dri cepiri,

⁶’Ba ama lepi avasi, ama trupi e’yo onzi amanisi i ma arisiri vu; eri’i ama ’bapi ovuzu opi nyazaniru azini atalau edeta edepi Mungu i ma Ataruri dri ’diyiruri’i; diza pi ma ovu ’eri vu ’dani ’dani e’yo dri cezaniri be. Amena.

⁷Mi ne, eri emu iriti be; ’ba dria yi nga eri ndre yi milesi, ’ba ndra eri sopi ’diyi nga eri ndre indi; suru dria nyakua ’diyi nga owu owu eri dri, Ma ovu ’dini, Amena,

⁸Ma Alifani azini Omegani, opi Mungu ’yo ra, ’ba ovupi curu’do indi, azini ovupi andra, azini ngapi emupiri, okpo dria ma e’i’i.

⁹Ma Yohana, emi adri, inzata isupi emi be tualu Yesusi, suru pie, asi teza pieri’i, ma ndra angu ilipi yi ma alia omvele Patamo’iria, e’yo Mungunisi azini e’yo eti nzeza Yesunisi.

¹⁰Ma ndra Orindi alia o’du Opinisi, te ma eri o’duko amboru ma ngukua, ekile gukanirile

¹¹’yozu kini, E’yo mini ndreleri mi si buku alia, mi pe tini kanisa aziri, ’diyi vu; Efeso pi vu, Simurina pie, Peregamo pie, Tuatira pie, Saridisi pie, Filadelefia pie, Laodikia pie.

¹²Ma oja di ma, o’duko e’yo ’yopi ma beri ndrezu, Ma ka ma oja ’bo, ma ndre talapati meleru aziri,

¹³te talapati nde ’diyi ma eselia ma ndre ’ba alu ekile Mvi ’banile, afa suza supi i ruaa kpere paari, anzuzaru baka melerosi eri ma agatia.

¹⁴Drini pi dribi be yi ovu emveru pambale, sile; mileni di aci ma andre drilele,

¹⁵pani ekile mola trile tri ’bale alaru aci droza ma aliarile, o’dukoni ekile yi kakau ma o’dukole.

¹⁶Eri ’du ’bi’bio aziri i ma dri ndisi; sei cizaru si be irileirileri efu eri ma tilia; andretini di ekile etu dipi okposirile.

¹⁷Ma ka eri ndre ra, ma eco ma va eri ma palaa ekile ’ba avule. Te eri ’ba i dri ndiri ma dria, kini, Mi ru ku, ma ’ba okori’i azini asizuri’i indi,

¹⁸ma vini ’ba Idriruri’i; ma dra, ndra ra, te mi ne, ma ovu di idriru kpere ’dani ’dani, azini ma ovu fungua drata pini Pari ’ba drazaniri be ’diyi be.

¹⁹E’yo ’disi mi si ani e’yo mini te ndrele ’diyi pi, e’yo ovupi curu’do indi ’diyi pie, e’yo ngapi yi ’yepi ndo ’diyi pie.

²⁰E’yo vale ku ’bi’bio aziri mini ndrele ma dri ndiri ma alia ’diyi pini, talapati meleru aziri ’diyi beri eri ’di: ’bi’bio aziri yi malaika kanisa aziri ’diyini, azini talapati aziri yi kanisa aziri ’diyi.