Read lugbara E'yo Eceza 11 Bible Online

E'yo Eceza 11 - lugbara bible

E'yo Eceza 11

¹Fe ma dri ozu ekile kalile, ’yo kini: Mi enga, mi o’bi hekalu Munguni pi, pari edeta edezuri be, ’ba inzipi alenia ’diyi pie,

²te mi ku irii ovupi hekalu ma ageia amveri; mi o’bi eri ku, yini eri fele ’ba jururu ’diyi dri ’borisi, yi nga aku alatararu otu yi pa agelesi va mba kali su drini iri.

³Ma nga okpo fe ’ba mani e’yo eti nzepi iri ’diyi dri, yi nga e’yo ondri o’du alifu alu drini turu iri drini kali azia, koliba be yi ma ruaa.

⁴’Ba ’diyi ovu mizeitu pati iri azini talapati iri, pa osopi Opi nyaku driliari ma milia ’diyi.

⁵’Ba azini ka le yi ’yezu onzi, aci efu yi ma tilia ari’ba yini dri ja; ’ba azini ka le yi ’ye onzi, eri ma nga ovu fuzaru ’dinile.

⁶Yi ovu okpo be ’bu ma ti opizu ci, ozoo ma ’di o’du yini ondrizurisi ku beni, azini yi ovu okpo be yi ara ojazu ariru, azini nyaku ezazu dra ndu ndu driasi, etu yini leleri vusi dria.

⁷Yi ka nga e’yo eti nzeza yini de ra, nguru efupi ’bile asikokoruriari nga omba ’ba yi be, nga yi aga okposi ra, nga yi ofu ra,

⁸avu yini la geria aku amboru ’bani omvele ti orindirurisi Sodomu’i azini Misiri’i, pari ’bani Opi yini ’dizu pati alaza ma ruaari ma alia.

⁹’Ba efupi ’ba piyi ma eselia, suruti pie, ti ’yoza pie, suru pie ’diyi ma azi ndre avu yini o’du na ali be ra, te yi a’ini avu yini sazu ’bilia ku.

¹⁰’Ba ovupi nyakua ’diyi ovu ani ayikosi yi ma e’yosi, yi ’ye e’yo ayikoru, afa feza fezu yi ma eselia, nabi iri ’diyini ndra ’ba ovupi nyakua ’diyi inzale ransi.

¹¹O’du na ali be ma vutia orindi idrini engapi Mungu vuri fi yi lalia, yi oso pa urulesi; azini uri amborubi’ba nde yi ndre pi ’diyira.

¹²Yi leri o’duko amboru engapi ’buarini ’yoria yi tia, ’dini, Emi etu uru ’dole Yi tu di uru ’bua iriti ma alia, de ari’ba yini ji yi ndre si.

¹³Etu ’dasi oyakia amboru nga angu oya ra, aku nderi ma esele mudri ma azi aluri asu iva; ’ba alifu aziri odra oyakia nderisi, ’ba acepi ’diyi ovu ani urisi, nga diza fe Mungu ’buari dri.

¹⁴Candi iriri de i ra; mi ne, candi nari emu mbele.

¹⁵Malaika aziriri vu guka ra, ’duko amboru ovu ’bua kini, Opi nyaza wudrikuruni oja i opi nyaza Opi amaniriniru, azini Kristo eriniriniru, eri nga opi nya ’dani ’dani.

¹⁶’Ba ’wara kali iri drini su ripi oguna yini dria Mungu drilia ’diyi eco yi va o’bukuru Mungu inzizu,

¹⁷kini, Ama ’yo awa’difo mi tia, Opi Mungu, Okpo E’ini, ovupi curu’do indi azini ndrari, mini okpo mini amboru ’dule opi nyazurisi.

¹⁸Suru yi ovu ndra adrasi, te adra miniri pi emu ra, ewu mini ’ba draza ’diyi ma e’yo lizuri be, mini ani oya ofezu ati’ba mini ’ba nabiru ’diyi pi dri ’ba alatararu ’diyi pie, ’ba mi ru rupi ’diyi pie, ’ba nyiri ’diyi pie ’ba ’wara ’diyi pie dria, mini vini ’ba nyaku dri japi ’diyi ma dri jazuri’i.

¹⁹Zi hekalu Munguni ovupi ’buari mgboru, yi ndre sanduku e’yo aziza erinirini hekalua; ovi gaza pi nga ovu indi o’duko pie, angu liza pie, oyakia pie, ozoo si amboru beri pie dria.