Read lugbara E'yo Eceza 13 Bible Online

E'yo Eceza 13 - lugbara bible

E'yo Eceza 13

¹Ma ndre nguruni efuria miri alia, eri o’yu be mudri, dri erini ’diyi aziri, o’yu erini ’diyi ma dria oku opini mudri indi, dri erini ’diyi ma dria ru Mungu o’daro ’diyi indi.

²Nguru mani ndreleri si i o’dule, paniri nguru dubaru ma pale, tileniri kami ma tilele. Uri fe okpo ini pi eri dri, oguna iniri pie, okpo amboru opini pie.

³Ma ndre so dri erini ma azi alu ekile kaile, te bele erini ’yezu drazuri ati ra, te wudrikuru dria osu tu nguru ma e’yosi, vutini biro.

⁴Yi nga uri inzi, erini okpo opiniri fele nguru dririsi, nga vini nguruni inzi indi kini, A’dini ovu nguruleni ya? A’di eco omba ’bazaru eri beni ya?

⁵Fe eri dri ti e’yo amboru ’diyi pi ’yozo, o’data Mungu o’dazuri be; yi fe okpo eri dri e’yo ’yezu mba kali su drini iri.

⁶Eri zi i ma tile Mungu o’dazu, ru erini pi o’daro pari erini adrizuri pie, ’ba ovupi ’bua ’diyi pie.

⁷Fe eri dri omba ’bazu ’ba alatararu be, yi agazu, Fe vini okpo opiniri eri dri enyati pi ma dria, ’ba pie, ti ’yoza pie, suru pie dria.

⁸’Ba dria ovupi nyakua ’diyi nga eri inzi, yi ’ba dria alu alu yini yi ma ru sile Kabilomva ovupi fuzaru engazu ewu nyaku ma eti ’bazuriari vile buku idriniri ma alia ku ’diyi.

⁹’Ba azini ka ovu bile be, eri ma eri ra:

¹⁰Yi ka e’yo li ’ba ’bazu aruru, yi nga eri ’ba aruru; ’ba azini ka ’ba fu seisi, ma fu eri seisi. E’yo teza ’ba alatararu ’diyini, a’ita yini be eri ’do’i.

¹¹Ma ndre nguru azinini efuria nyakuarisi; eri ovu o’yu be iri ekile kabilomvale, eri ’yo e’yo ekile urile.

¹²Eri ’ye e’yo okpo dria nguru okorinirisi eri ma milia. Eri fe nyaku ’ba ovupi alenia ’diyi be ma inzi nguru okori, eri’i bele erini ndra ’yewi drazurini atizu rari.

¹³Eri ’ye eceta amboru ndu ndu, ecazu kpere erini aci feria esizu ’buarisi va nyakua ’ba ma milia.

¹⁴Eri ici ’ba ovupi nyakua ’diyi eceta yini fele eri dri ’yezu nguru ma milia ’diyisi, ’yozu ’ba ovupi nyakua ’diyi ma tia kini yi ma ede nguru yini sole seisi te ovupi idriruri ma wura.

¹⁵Fe erini ava fezu wura nguruni dri, ’dini wura nde nguruniri ma ’yo e’yo ani, ma fe vini ’ba dria wura nguruni inzipi ku ’diyi ma ovu fuzaru kai ra.

¹⁶Eri fe yi ma ’ba eceta ’ba dria ma dri ndiria kani yi ma andretia, ’ba wereru ’diyi pi ’ba ’wara be, ’ba afa e’iru ’diyi pi ’ba alioru be, ’ba kari’baru ’diyi pi ’ba ati’baru ’diyi be dria,

¹⁷’dini ’ba aluni econi afa jezaru kani afa ozizaru ku, pe kiri ’ba ovupi eceta nderi beri a’dule, eceta nderi ovu ru nguruni kani ru erini ma namba.

¹⁸Ondua ’do’i: ’ba ovupi ondua beri ma a nguru nde ma namba; eri ’ba ma namba ra, namba erini ovu turu azia drini kali azia drini azia.