Read lugbara E'yo Eceza 14 Bible Online

E'yo Eceza 14 - lugbara bible

E'yo Eceza 14

¹Ma ndre ra, te mi ne,Kabilo mva so pa ori Zionia, azini eri be ’ba alifu turu alu drini kali su drini su, ovupi ru erini be azini Ati ma ru be sizaru yi ma andretia ’diyi.

²Ma eri o’duko engazu ’bua, ekile yi kakau ma o’dukole, azini ekile o’duko angu liza amborunirile; o’duko mani erileri ovu ekile ’ba o’di copi ’diyini o’di colerile,

³yi ngo ekile ongo o’dirule oguga ma drilia, azini anyapa idriru su ’diyi pi ma drilia ’ba ’wara ’diyi be. ’Ba aluni econi ongo ’diri nizaru ku pe lu ’ba alifu turu alu drini kali au drini su, yini jele nyakua ’diyi.

⁴’Ba ’diyi yi ’ba e’yo ezapi okusi ku ’diyi, te yi mba yi ma ta alaru; ’ba ’diyi yi ’ba Kabilomva ma vuti bipi geri dria erini muzuria ’diyi; je ndra yi ’ba ma eselia ovuzu anya bipi okoriru Mungu vu Kabilomva be;

⁵inzo yi ma tilia yo, yi ovu e’yo onzi kokoru.

⁶Ma ndre malaika azinini saria ’bu eselia agadua, ovuzu e’yo baru ’dani ’daniri be oluzu ’ba nyakua ’diyi ma tia, suru dria pi ma tia, enyati pie, ti ’yoza pie, ’ba pie dria;

⁷eri ’yo o’duko urusi kini, Emi ma ru Mungu, emi ma fe diza eri dri, etu ’erini e’yo lizurini ecale ’borisi; emi ma inzi ’ba ’bu pi ’bapi nyaku pie, miri pie, yi a’di pie driari’i.

⁸Malaika azini iriri bi vutini, kini, Babuloni amboruri e’de va ’bo, eri e’de va ’bo, ndra suru dria i emvupi awu erini ali o’bazuri ma patiefi ma susiri’i.

⁹Malaika azini nari bi yi ma vuti ’yo o’duko urusi kini, ’Ba azini ka nguru pi inzi wura erini be ra, ka eceta a’i i ma andretia kani i ma dri agelia,

¹⁰eri nga vini patiefi su Mungu ma adrani, osule osakokoru okelea aoko erinirini ma aliari mvu indi; yi nga eri ecandi aci pisi baruti be, malaika alatararu piyi ma milia Kabilomva be.

¹¹Aci yi ecandizuri ma acika tu uru ’dani ’dani; ’ba nguru pi inzipi wura erini ’diyi pi lini ava etusi inisi ku, ’ba ndra ru erini ma eceta a’ipi ’diyi be.

¹²’Ba alatararu azita Munguni ma ta mbapi a’ita Yesuni be ’diyi ma asi tezari ’di’i.

¹³Ma eri o’duko engapi ’buari kini, Mi si Drileba ’ba odraza ngapi odrapi Opi ma alia engazu curu’do ’diyi dri. Eri ’dini ada, Orindi ’yo ra, yi ma li ande azi okporu yini ’diyi ma vutia, te ’yeta yini bi yi vuti!

¹⁴Ma ndre ra, te mi ne, iriti emveru indi; ma ndre ’ba azini ekile mvi ’banile erini riria iriti nde ma dria, ekilaza meleruri ovu eri ma dria, drinia eli cizaru anya lozuri indi.

¹⁵Malaika azini efu hekaluasi oyozu o’duko urusi ’ba ripi iriti driari ma tia kini, Mi ’ba eli mini, mi, a’disiku etu anya lozuri eca ’bo, afa kaza nyakuniri ’wi ’bo.

¹⁶’Ba ripi iriti driari nga di eli ini ’be nyakua, yi nga ani afa kaza nyakuni lo.

¹⁷Malaika azini efu hekalu ovupi ’buariasi, eri indi ovu eli cizaruri be.

¹⁸Malaika azini ovupi okpo be aci driari efu pari edeta edezuria, nga oyu o’duko urusi ’ba ovupi eli cizaru beri ma tia kini, Mi ’ba eli cizaru mini, mi oti zabibu nyakuari ma efi kapi nguluru ’diyi, eri ma efini nile ’borisi.

¹⁹Malaika nde nga di eli ini ’be nyakua, nga zabibu nyakuari ma efi oti ani, nga yi o’be afa ambo patiefi ma su nzizu adra Mungunirini ma alia;

²⁰yi nga di patiefi tu pasi pari suni nzizuri ma alia aku ageia amve, ari nga efu afa patiefi ma su nzizuri ma alia, tizu cazu baka akanya ma ti ojazuri vu, kpere ekile mailo turu irile ’dipi.