Read lugbara E'yo Eceza 16 Bible Online

E'yo Eceza 16 - lugbara bible

E'yo Eceza 16

¹Ma eri o’duko amboru efupi hekalu nde ma aliarini ’yoria malaika aziri ma tia kini, Emi mu, emi oda adra Munguni okele aziri ma aliari nyaku ma dria.

²Aluri mu ra, nga di afa okele ini ma aliari da nyaku ma dria; eri nga ofu beleru ma suza be onzikanyaru ’ba ovupi eceta nguruni be, azini eri ma wura inzipi ’diyi ma ruaa.

³Iriri nga afa okele ini ma aliari da miri ma dria; eri nga ofu ari ’ba avunirile, afa idriru ovupi miri ma alia’diyi odra dria ra,

⁴Nari nga afa okele ini ma aliari da yi ara pi ma dria yi a’di be; eri ofu ariru.

⁵Ma eri malaika yi nde ’diyinirini ’yoria kini, Mi ovupi curu’do, azini andrari, mi ’Ba Alatararuni, mi kililiru mini e’yo lile ’dinirisi.

⁶Yini ’ba alatararu ’diyi pi ma ari adale ’ba nabiru ’diyi berisi, ’dini mi fe yi dri ari mvuzu ani. Te e’yo nde fu dri yi dri trotro!

⁷Te ma eri pari edeta edezurini ’yoria kini, Ada, Opi Mungu, Okpo E’i la, e’yo liza mini ’diyi yi adaru azini kililiru.

⁸Suri nga afa okele ini ma aliari da etu ma dria; fe eri dri ’ba ozazu acisi;

⁹nga ’ba ove drita okporurisi, ’ba yi nga di ani Mungu ovupi okpo be inzata ’diyi ma driari ma ru o’da ra, te yi ojani yi asi diza fezu eri dri ku.

¹⁰Towiri nga afa okele ini ma aliari da oguna nguruni ma dria; angu erini nyaleri bi iniru, ’ba yi nya yi ma andre yi ma ruani sulerisi,

¹¹yi o’da vini Mungu ’buari ma ru, rua suza yini ma e’yosi bele yini be, te ti, yi ojani yi asi ’yemi yini kuzu ku.

¹²Aziari nga afa okele ini ma aliari da yi ara amboru Ufirate ma dria; yiniri nga nzu dria, geri edezu opi amboru engapi kala etuni efurialeruria ’diyi dri,

¹³Ma ndre orindi na alatara kokoru ’diyi ekile odrukodrule, yini efuria uri ma tilia, azini nguru ma tilia, azini nabi inzoruri ma tilia;

¹⁴yi orindi onzi, tali ’yepi ’diyi; yi efu mu yi erezu opi amboru wudrikurua ’diyi vusi dria, yi okuzu tualu omba ’bazu o’du amboru Mungu Okpo E’iruni pelerisi.

¹⁵(Mi ne, ma emu oguoule! ’Ba tepi mile be, afa suza ini ma ta mbapiri eri drilebaru, eri kazu acizu pililiru ku, ’ba kazu drinza erini ndrezu ku!)

¹⁶Yi nga opi nde ’diyi oku tualu pari yini omvele! Ebrania tisi Hari-Magedoni’iria,

¹⁷Aziriri nga afa okele ini ma aliari da oli alia; o’duko amboru nga efu hekalu ma alia engazu oguna opiniri vu, ’yozu kini, ’Ye i ’bo.

¹⁸Ovi pi nga ga, o’duko pie, angu liza pie; oyakia amboru oya angu indi, engazu ’bani ovuria nyaku ma driaria ti, oyakia azini amboru okpo be ’donileri ’yeni ndra i ’dinile ku.

¹⁹Aku amboruri nga i ale ali esele be na, azini aku ’ba jururu ’diyini nga yi asu ra, Mungu nga vini Babuloni amboruri ma e’yo ega indi, okelea aoko erini adraruri ma patiefi ma su beri fezu eri dri.

²⁰Angu yi lipi miri ma alia ’diyi nga apa ra, ’ba isuni oni izuru ’diyi dika ku;

²¹si amboru, alu alu dria nzipi ekile onzini nzilerile ’diyi o’de ’buasi va ’ba ma dria; ’ba yi nga Mungu ma ru o’da inzata sinirisi, a’disiku inzata nderini ovule amboru turisi.