Read lugbara E'yo Eceza 17 Bible Online

E'yo Eceza 17 - lugbara bible

E'yo Eceza 17

¹Te malaika aziri ovupi okele be aziri ’diyi ma azi alu emu ra, nga e’yo ’yo ma be kini, Mi emu ’doa, ma nga oku awuouru ali o’bapi tu ripi yi kakau ma driari ma e’yo liza lile driniari ece mi dri;

²eri’i opi amboru nyakua ’diyini ndra ali o’bazu eri beri, ’ba ovupi nyakua ’diyini atizu patiefi ma su eri ma ali o’bazanirisiri’i.

³Te eri ’du ma Orindi alia jizu roko dria, ma ne Okuni riria nguru ekaru ma dria, nguru nderi ma rua ga tre ru Mungu o’dazu ’diyisi, eri dri be aziri, o’yu be mudri.

⁴Oku nderi su bongo okalakokalaruri pi i ruaa bongo ekaruri be, su vini i ruaa mele pi onyiafaru, oni aje nyapi tu ’diyi pie, nyoro ndrizaru aje nyapi tu ’diyi pie, eri ma dria okelea meleru afa ngule onzi ’diyi pini gazu alenia tre afa alatara kokoru eri ma ali o’bazani ’diyi beri;

⁵si ru eri andretia e’yo zizaru ’dini: BABULONI AMBORU, OKU AWUOURU ALI O’BAPI ’DIYI PI MA ANDRI E’YO NGULE ONZI NYAKUA ’DIYI BERI’I.

⁶Ma ne oku nderi ovu atizaru ’ba alatararu ’diyi ma arisi, azini ’ba Yesu ma e’yo eti nzepi ’diyi ma arisi indi. Ma ka eri ne ra, ma osu tu osuta amborusi.

⁷Malaika nga di ’yo ma tia, Mi osu a’disi ya? Ma nga e’yo zizaru oku nde pini ece mi dri, nguru eri jipi ovupi dri be aziri o’yu mudriri be.

⁸Nguru mini ndreleri ’lovu ndra indi, te eri curu’do yo, te eri ’ye efu ’bile asikokoruria muzu dri jazu; ’ba ovupi nyakua, yini yi ma ru sile buku idrini ma alia engazu ewu nyaku ma eti ’bazuria ku ’diyi nga osu osu yini nguru ndreria, a’disiku eri ndra indi, te eri curu’do yo, te eri nga eca ndo.

⁹Asisile ondua beri eri ’do’i: dri aziri yi oni izuru aziri, okuni rizu yi ma dria ’diyi;

¹⁰opi aziri yi indi, towi ’diyi o’de ’bo, aluri ace indi, aziniri ecani nga ku; eri ka nga emu ra eri ma ovu ewu were.

¹¹Nguru ovupi ndra indi te curu’do yori, eri ma ngulupi vini opi arori’i, eri ovu ’ba aziri ’diyi ma azi alu, te eri mu dri ja ra.

¹²O’yu mudri mini ndrele ’diyi yi opi mudri opi nyapi nga ku: ’diyi, te yi nga okpo isu ovuzu opiru sawa alu, nguru nde be tualu.

¹³Yi ovu asisile be alu, nga okpo yini fe okpo opiruri be nguru nderi dri;

¹⁴yi nga a’di ’di Kabilomva be, te Kabilomvani nga yi aga ra, erini ovule Opi opini azini Meleki melekinirisi, azini ’ba ovupi eri be ’diyi yi ’ba omvele, ’ba opele, ’ba asi adaru be ’diyi.

¹⁵Eri ’yo ma tia, Yi nde mini ndrele oku awuouru ali o’bapirini rizu driniari, ’diri ’ba pie, ’ba ongulumuru pie, suru pie, ti ’yoza pie.

¹⁶O’yu mudri mini ndrele ’diyi azini nguru nde yi nga oku awuouru ali o’bapiri ngu onzi; yi nga eri ku pirini azini pililiru, nga za eri ruaari nya, nga eri eve acisi kieikiei,

¹⁷a’disiku Mungu ’ba e’yo yi asia e’yo erini leleri ’yezu, ovuzu asisile be alu, opi nyaza yini fezu nguru dri, cazu kpere e’yo Munguni ’yole ’diyini ngazu yi ’yezuria.

¹⁸Oku mini ndrele ’diri eri aku amboru opi nyapi opi nyakua ’diyi ma driari’i.