Read lugbara E'yo Eceza 19 Bible Online

E'yo Eceza 19 - lugbara bible

E'yo Eceza 19

¹E’yo ’diyi ma vutia ma eri o’duko ekile o’duko amboru ’ba ongulumuru kakau ’bua ’diyinirile, ’yozu kini, Haleluya! Pata pi, diza pie, okpo pie oro Mungu amanirini,

²a’disiku e’yo liza erini oro adaru azini kililiru; eri li oku awuouru ali o’bapi tu nyaku ezapi ali o’baza erinisiri ma e’yo ’bo, azini eri ofe ari ati’ba ini ’diyini ma arioti eri dria.

³Yi nga ’yo pale iri, Haleluya! Acika erini tu uru ’dani ’dani.

⁴’Ba ’wara kali iri drini su ’diyi pi eco yi va Mungu ripi oguga driari inzizu, anyapa idriru su ’diyi be, kini, Amena. Haleluya!

⁵O’duko nga di efu oguga vu, kini, Emi inzi Mungu amani, emi ati’ba erini dria, emi ’ba eri rupi ’diyi, ’ba nyiri ’ba ’wara pie dria.

⁶Ma eri ekile o’duko ’ba ongulumuru kakau ’diyinirile, azini ekile yi kakau ma o’dukole, azini o’duko angu liza okporu ’diyinirile, kini, Haleluya! Opi Mungu amani, Okpo E’iri eri angu nya opiruni.

⁷Ama ma ovu ayikosi, nyona be tu, ama ma fe diza eri dri, a’disiku o’du Kabilomvani oku bizuri eca ’bo, amuruou erini ede i ’bo;

⁸fe erini bongo mile be nyiriari suzu i ruaa dizaru, alarubongo mile be nyiriari eri ’yeta kililiru ’ba alatararu ’diyini.

⁹Eri ’yo ma tia, Mi si ’dini, ’Ba omvele omu Kabilomvani oku bizuri nyazu ’diyi yi drilebaru. Eri ’yo ma tia, E’yo ’diyi yi e’yo adaru Munguni ’diyi.

¹⁰Ma nga di ma eco va eri ma palaa eri inzizu, te eri ’yo ma tia, Mi ’ye ’dini ku! Ma ovu ati’boni trotro mile, azini adripi mini e’yo Yesuni ma eti nzepi ’diyile. Mi inzi Mungu’i. A’disiku e’yo Yesuni ma eti nzeza eri orindi e’yo oluza nabilerini.

¹¹Ma ndre ’bu zi i ti mgboru, te mi ne, akanya emveru! ’Da ’ba ripi driniari ma ru Asi Ada’i azini Adaru’i; eri e’yo li azini a’di ’di e’yo kililirurisi.

¹²Mileni di aci ma andre drilele, oku ndrizaru kakau ovu eri ma dria; eri ru be sizaru, te ’ba aluni nini ku, kiri eri ma ngulupi nini.

¹³Eri su bongo yini sule ari ma aliari i ruaa, omve runi E’yo Munguni’i.

¹⁴Asikari ongulumuru ’bua, ripi akanya emveru ma dria, bongo mile be nyiriari emveru azini alaru supi yi ruaa ’diyi bi vutini.

¹⁵Sei cizaru efu eri ma tilia, eri ma oga suru ndu ndu ani, eri nga yi oce kali ayarusi; eri nga tu pari aoko adraru Mungu Okpo E’ini ma patiefi ma su nzizuri ma dria.

¹⁶Si ru bongo erini ma ruaa, azini eri ma opilia ’dini, MELEKI MELEKINI AZINI OPI OPINI.

¹⁷Ma ndre malaika aluni pa soria etu ma alia, eri oyu o’duko urusi ’yozu aria dria sapi ’bu ma eselia ’agadua ’diyi ma tia kini, Emi emu, i emi oku emi tualu omu amboru Mungunia,

¹⁸emi ma nya opi piyi zaru, ’ba asikari dri cepi ’diyi pie, ’ba ombaru ’diyi pie azini akanya za pie, ’ba ripi yi ma dria ’diyi pie, ma nya ’ba dria zaru, kari’ba pie ati’ba be, ’ba nyiri ’diyi pie, ’ba ’wara be.

¹⁹Ma ndre nguru nderi, opi nyakua ’diyi pie, asikari ongulumuru yini be, oku yi tualu a’di ’dizu ’ba ripi akanya driari be, asikari ongulumuru erini pie.

²⁰Yi bi nguru pi nabi inzoru tali erini ani ’ba ovupi eceta nguruni be eri ma wura inzipi ’diyi icizu ’diyi ’yepi eri ma miliari be. O’be yi iri tro idriru aci mirile vepi barutisiri ma alia.

²¹Ofu ’ba acepi ’diyi sei, ’ba ripi akanya ma driarini, efupi eri ma tiliarisi; aria dria nga di tra za yinisi.