Read lugbara E'yo Eceza 20 Bible Online

E'yo Eceza 20 - lugbara bible

E'yo Eceza 20

¹Ma ndre malaikani esiria ’buarisi va, eri ovu fungua ’bile asikokoruniri be, azini anziriku amboru ovu eri dria.

²Eri bi uri nderi, uri oku drio ovupi ’Ba asu Supiri azini Satani’iri, nga eri ombe eli alifu alu,

³eri ’bezu ’bile asikokoruri ma alia, nga tini eci ci, nga oderi ’ba drinia ecetaru, eri kazu suru icizu dika ku de nga eli alifu alu ’diyi deni yi ku, te ’di ma vutia eri ma ovu truzaru ewu weresi.

⁴Ma ndre oguna opini, ’ba ori yi ma dria, fe yi dri e’yo lizu. Ma ndre vini ’ba yini drini olile Yesu ma e’yo eti nzezasi azini e’yo Mungunisi ’diyi ma orindi, azini ’ba nguru pi inzipi wura erini be ku, eceta nderi a’ipi yi andretia azini yi dri agelea ku ’diyi. Yi nga enga idriru, yi nga opi nya Kristo be eli alifu alu.

⁵Te ’ba draza azini acepi ’diyi engani idriru ku de nga eli alifu alu ’diyi deni yi ku. ’Di engata okori’i.

⁶’Ba pari isupi engata okori ma aliari eri drilebaru azini alatararu! Dra iriri ovuni okpo be ’ba nde ’diyi elozu ku, te yi nga ovu atalau edeta edepi Mungu pini Kristo be ’diyini, yi nga opi nya eri be eli alifu alu.

⁷Eli alifu alu ka yi de ra yi nga Satanini tru arujo iniasi,

⁸eri nga efu suru ovupi wudrikuru ma kala su ’diyia ’diyi icizu, ’di Gogi pi Magogi be, yi okuzu tualu a’di ’dizu; kalafe yini ovu ekile cinya miriarile,

⁹Yi etu angu wudrikuru ma eselesi, nga aku okporu ’ba alatararu ’diyini ma agei ace kuru, aku lele turi be; te aci nga ibi e’de ’buarisi va, nya yi teketeke,

¹⁰te yi nga ’Ba asu Supi yi icipiri ’be ad mirile vepi barutisi, pari nguru pini ovuzu nabi inzoru beri ma alia, nga yi ecandi etusi inisi ’dani ’dani.

¹¹Te ma ndre oguna emveru amboru, ’ba ripi driniari be; nyaku pi apa eri ma milia ’bu be ra, isuni pari yi dri dika ku,

¹²Ma ndre ’ba draza, ’ba ’wara piyi ’ba nyiri be, yini pa soria oguna opini ma drilia; buku yi ovu zizaru. Yi nga buku azini alu zi indi, ’di buku idriniri’i. Yi nga ’ba odraza ’diyi ma e’yo li e’yo yini ovupi sizaru buku ’diyi ma aliarile, ’yeta yini vusi.

¹³Miri ofu ’ba draza ovupi eri ma alia ’diyi, Dra pi Pari ’ba drazaniri be ofu vini ’ba draza yi ma alia ’diyi indi; yi li ’ba dria alu alu ma e’yo ’yeta yini vusi.

¹⁴Yi nga di Dra pi o’be Pari ’ba drazaniri be ad mirileri ma alia. ’Di dra iriri, aci mirileri’i;

¹⁵ka ’ba azini isu ovupi ru sikokoru buku idriniri ma aliari, yi nga eri ’be aci mirileri ma alia.