Read lugbara E'yo Eceza 21 Bible Online

E'yo Eceza 21 - lugbara bible

E'yo Eceza 21

¹Ma ndre ’bu o’diru nyaku o’dire be; a’disiku ’bu okori pi nyaku okori be aga ’bo, yi mirini dika yo.

²Ma ndre vini aku alatararu, Yerusalemu o’diruri, erini esiria ’buarisi va engazu Mungu vu, edezaru ngonde ekile amuruouni i osule onyiafasi agupi ini dririle;

³ma eri o’duko amboruni efuria oguna vu ’yozu kini, Mi ne, pari Munguni ovuzuri ovu ’ba be, eri nga ovu yi be tualu, yi nga ovu ’ba erini, Mungu ngulupini nga ovu yi be, nga ovu Mungu yini;

⁴eri nga mindre ini yi ma miliasi dria, dra ngani ovu dika ku, awu wuza pi lulu gaza pie, rua suza pie, ngani ovu dika ku; e’yo Oko ’diyi aga ’bo.

⁵Eri’i ripi oguna driari ’yo ra, Mi ne, ma afa dria ’ba o’diru. Eri ’yo ra, Mi si, a’disiku e’yo ’diyi yi e’yo ’yole asi adasi azini adaru ’diyi.

⁶Eri ’yo ma tia, Yi ’ye yi ’bo! Ma Alifa’i azini Omega’i, ’di e’dozani azini asizani, Ma nga yi a’di yi idrinirini fe toko avasi ’ba ovupi yi avijo beri dri.

⁷’Ba agapiri nga afa ’diyi isu i ma afaru, ma nga ovu Mungu erini, eri nga ovu mva mani.

⁸Te ’ba uriouru ’diyi pi, ’ba a’ipi ku ’diyi pie, ’ba afa ngule onziri ’yepi ’diyi pie, ’ba ’ba ’dipi ’diyi pie, ’ba ali o’bapi ’diyi pie, ’ba oleru ’diyi pie, ’ba wura toko inzipi ’diyi pie, ’ba dria inzo jipi ’diyi pie, pari yini nga ovu aci mirile vepi aci pisi baruti beri ma alia; ’diri dra iriri’i.

⁹Malaika aziri ovupi okele azuri inzata aziri vile asizu ’diyini gazu yi ma alia tre ’diyi be ’diyi ma azi alu nga emu e’yo ’yo ma be kini, Mi emu ’dole, ma nga mi dri amuruou, oku Kabilomvaniri ece.

¹⁰Eri nga ma ’du Orindi alia, ji oni amboru azini izuru ma dria, nga ma dri aku alatararu Yerusalemuni ece, erini esiria ’buarisi va engazu Mungu vu,

¹¹eri diza Munguni be, diza erini ovu ekile oni aje nyapi agapi turi ma dizale, ekile oni jasipe ovupi alaru glasilerile.

¹²Eri abi kaliru be amboru azini izuru, kali nde ma tile yi mudri drini iri, kalitile ’diyi ma alia malaika mudri drini iri indi; si ru kalitile ’diyi ma dria ci, ’diyi anzi Israelini ma suru mudri drini iri ’diyini;

¹³woke etuni efurialeruria kalitile na, woko andraleruria kalitile na, woke uruleruria kalitile na, woke etuni ’derialeruria kalitile na.

¹⁴Abi kaliru aku ageiari ovu ndu be mudri drini iri, si ru mudri drini iri yi ma ruaa ci, ’ba mudri drini iri Kabilomvani ti opele ’diyini.

¹⁵’Ba e’yo nzepi ma beri ovu ozu i afa o’bizu edele melesiri be aku pi o’bizu, kalitileni ’diyi pie, abini pie.

¹⁶Aku nde ma kalati su dria trotro, oconi ovu trotro walani be; eri nga aku o’bi ozusi, isu eri ekile mailo alifu alu turi towile; oconi pie;walani pie, izuni ururi pie ovu dria trotro.

¹⁷Eri nga abini o’bi ra, isu eri wuale turu alu drini kali su drini su, ’bani adrile o’bile wualesirile, te malaika o’bini.

¹⁸Si abi rua asipesi, te aku nde ovu mele alaru ekile oni talatala alarurile.

¹⁹Ede abi kaliru aku ageiari ma ndu ndrizaru oni ndu ndu dria aje nyapi tu ’diyisi; abi ndu okori jasipeni, iriri eri safirani, nari eri kalakedoni, suri eri emerodeni,

²⁰towiri eri sara donukisini, aziari eri sadiusini, aziriri eri kurusolitoni, arori beruleni, oromiri eri topazeni, mudriri eri kurusoparasoni, mudri drini aluri eri huakintoni, mudri drini iriri eri ametusitoni.

²¹Kalitile mudri drini iri yi nyoro ndrizaru aje nyapi tu mudri drini iri ’diyi, kalitile alu alu vusi nyoro alu alu, geri amboru aku eselesiri eri mele alaru, ekile oni talatala dizarurile.

²²Ma ndreni hekalu aku nde ma alia ku, a’disiku Opi Mungu Okpo E’i pi Kabilomva be yi ovu hekalu erini.

²³Aku nde leni etu pi mba be dizu eri ma alia ku, a’disiku diza Mungunini dile eri ma alianirisi, Kabilomva ovu tala eriniruni.

²⁴Suru yi nga aci diza erini ma alia; opi nyakua ’diyi nga diza yini inzitaruri eji alenia,

²⁵yi ngani kalitile erini opi etusi aluni ku-inini ovule ’dale yorisi;

²⁶yi nga diza suruni pi eji ofi alenia inzita yini be.

²⁷Te afa dria alatara kokoru ’diyi pi ngani fi alenia aluni ku, ’ba afa ngule onziri ’yepi ’diyi pie, ’ba inzo lipi ’diyi pie, te kiri ’ba runi sile Kabilomva ma buku idriniri ma alia ’diyi nga fini.