Read lugbara E'yo Eceza 22 Bible Online

E'yo Eceza 22 - lugbara bible

E'yo Eceza 22

¹Eri ece ma dri yi ara idrini, mile be alatararu glasile, efupi oguna Mungu pini ma alia Kabilomva beria,

²rapi geri amboru erini ma eselia agaduari; yi ara ma tia ’aa’dosi azini ’aa’dasi pati idrini indi, efi ’yapi suruti ndu ndu mudri drini iri, efi kapi mba vusi mba vusiri; pati nde ma bi ovu aroni suru ma azo atizu.

³Otrita ngani ovu dika ’de: ku, te oguna Mungu pini Kabilomva beri nga ovu alenia; ati’ba erini yi nga azi nga eri inzizu,

⁴yi nga mile erini ndre, eri ma runi nga ovu yi ma andretia.

⁵Ini ngani ovu dika ku; yi leni diza talani kani diza etuni ku, a’disiku Opi Munguni ngale diza fele yi drinirisi; yi nga opi nya ’dani ’dani.

⁶Eri ’yo ma tia, E’yo ’diyi yi e’yo ’yole asi adasi, azini adaru ’diyi. Opi, Mungu nabi ma orindiniri, epe malaika erini ma ti e’yo ngapi yi ’yepi mbele ’diyi ecezu ati’ba erini ma tia.

⁷Mi ne, ma emu mbele. ’Ba e’yo ondriza buku ’diri ma aliari ta mbapiri eri drilebaru.

⁸Ma’i, Yohana, ma ’ba e’yo ’diyi eripiri azini ndrepiri. Mani eriria, mani ndreria, ma eco ma va malaika e’yo ’diyi ecepi ma driri ma palaa eri inzizu;

⁹te eri ’yo ma tia, Mi ’ye ’dini ku! Ma ovu ati’boni mile trotro azini adripi mini nabiru ’diyile, azini ’ba e’yo buku ’diri ma aliari ta mbapi ’diyile. Mi inzi Mungu’i.

¹⁰Eri ’yo ma tia, Mi ’ba eceta e’yo ondriza buku ’diri ma alia ’diyi ma dria tini ecizu ci ku, a’disiku ewuniri myia.

¹¹’Ba e’yo ezapiri ma eza nga ini ’dani, ’ba ovupi onzikanyaruri ma ovu nga ini onzikanyaru ’dani, ’ba ovupi kililiruri ma ’ye nga ini kililiru ’dani, ’ba ovupi alatararuri ma ovu nga ini alatararu ’dani.

¹²Mi ne, ma emu mbele, panga mani ovu ma be, mani ngazu ani ’ba dria alu alu ofezu azi yinini ovulerile.

¹³Ma Alifa’i azini Omega’i, okori azini vileri, e’dozani azini asizani,

¹⁴’Ba afa suza yini ojipi ’diyi yi drilebaru, ’dini yi ma eco ani muzu pati idriniri vu, ma fi ani kalitilesi aku nde ma alia.

¹⁵Amveleru oce yi indi, ’ba oleru pie, ’ba ali o’bapi ’diyi pie, ’ba ’ba ’dipi ’diyi pie, ’ba wura toko inzipi ’diyi pie, ’ba dria inzo lepi azini lipi ’diyi pie.

¹⁶Ma Yesu’i, ma pe malaika mani ma ti e’yo ’diyi ma eti nzezu emi tia kanisa dri. Ma ovu oja Daudini azini ori erini, ’bi’bio leleuru dipi angu trasiri’i.

¹⁷Orindi pi amuruou be yi ’yo ra, Emi emu. ’Ba e’yo eripiri ma ’yo indi, Emi emu. ’Ba ovupi yi avijosiri ma emu; ’ba lepiri ma mvu yi idriniri tokoru.

¹⁸Ma e’yo eti nze ’ba dria e’yo ondriza buku ’diri ma aliari eripi ’diyi ma tia, kini: ’Ba azini ka e’yo azini o’ba e’yo ’diyi ma dria, Munguni nga inzata ovupi sizaru buku ’diri ma alia ’diyi o’ba eri ma dria;

¹⁹’ba azini ka e’yo sile buku e’yo ondriza ’dirini ma alia ’diyi ma azi nze, Munguni nga pari erini nze pati idrini pi vusi aku alatararuri be ra, yini e’yoni sile buku ’diri ma alia’diyi.

²⁰’Ba e’yo ’diyi ma eti nzepiri ’yo ’dini, Adada, ma emu mbele. Amena, Mi emu fo, Opi Yesu!

²¹’Yeta anzutiri Opi Yesuni ma ovu ’ba alatararu be dria. Amena.