Read lugbara E'yo Eceza 5 Bible Online

E'yo Eceza 5 - lugbara bible

E'yo Eceza 5

¹Te ma ndre ’ba ripi oguna ma driari ma dri ndiria buku indi sizaru alenia azini ngukunia, opizaru ci eceta tini opizu aziri ’diyisi.

²Ma ndre malaika okporuni e’yo oluria o’duko urusi, A’di ma onyi fu dri buku zizu azini eceta tini opizu ’diyi ondizuni ya?

³’Ba aluni ’bua, kani nyakua, kani va nyaku ma etia, ceopi buku nde zipi, kani eri ndrepini yo.

⁴Te ma wu tu yini ’ba aluni dri fupi buku zipi, kani eri ndrepini isule kurisi.

⁵Te ’ba ’wara ma azi alu ’yo ma tia, Mi wu ku; mi ne Kami suru Yudani, Ola Daudiniri, aga dri fuzu buku pi zizu, eceta erini aziri ’diyi be ra.

⁶Azini ma ndre oguna pi ma eselia anyapa idriru su ’diyi be, azini ’ba ’wara ma eselia, Kabilomvani pa soria, ekile lile ’borile, o’yuni aziri, mileni aziri, mile nde ’diyi yi Orindi Munguni aziri ti opele wudrikuru dria ma alia ’diyi.

⁷Eri emu buku ’du ’ba ripi oguna driari ma dri ndiria.

⁸Eri ka buku ’du ’bo, anyapa idriru su ’diyi pi ’ba ’wara kali iri drini su ’diyi be, yi eco yi va Kabilomva ma palaa, yi dria alu alu ovu o’di be, azini lu’bu meleru gapi obiese arikariruri be tre tre ’diyi be, yi zita ’ba alatararu ’diyini.

⁹Yi ngo ongo o’diru, ’yozu, Mi fu dri buku ’duzu, ecetani tini opizu ’diyi zizu ra, a’disiku li ndra mi ra, te ari minisi mi je ’ba Mungu dri engazu suruti dria ma eselia, ti ’yoza pie, ’ba pie, suru pie ’dria,

¹⁰mi ’ba yi ovuzu opi nyazaniru azini atalau edeta edepi ’diyiru Mungu dri; yi nga opi nya nyakua ra.

¹¹Te ma ndre ra, azini ma eri malaika kakau ina o’duko oguna ma ageia, anyapa idriru ’diyi pie, ’ba ’wara ’diyi pie; kalafe yini alifu mudri pale alifu mudri, azini alifu pale alifu lakokoru;

¹²yini ’yoria o’duko urusi, Kabilomva lile ’bori fu dri okpo pi a’izu, lonyi pie, ondua pie, okpo opiniri pie, inzita pie, diza pie, asi ndriza pie dria!

¹³Afa dria! Munguni o’bale ’diyi ’buari pie, ’nyakuari pie, nyaku etiari pie, miri driari pie, afa dria ovupi afa ’diyi ma alia ’diyi pie dria, ma eri yini ’yoria kini, Asi ndriza pi, inzita pie, dizai pie, okpo opiniri pie ma ovu ’ba ripi oguja driari vu, azini Kabilomva vu ’dani ’dani!

¹⁴Anyapa idriru su ’diyi ’yo ra, Amena! ’Ba wara eco yi i va inzizu.